《家里的“文物”——汤婆子》
作者：宓重行
改编、朗读：麦小姐
[上海话改编]
前两日屋里向大扫除个辰光，我太太掯出来了一只扁圆形状个铜家生，伊老兴奋个对大家宣布：“㑚来看啊，搿是阿拉屋里个‘老古董’！外加噢，搿还是我个嫁妆唻……”看到搿只物事，我也有点小激动，马上脱口而出：“搿勿是汤婆子嘛，长远勿见唻！”除脱搿只俗名，我从来呒没听到过伊有其他个大名，比方像“织物除湿取暖器”咾啥。看看搿只从前一直用个“老古董”，我突然觉着，假使将来要跟后辈们解释伊个“历史使命”脱“用法说明”，只怕是有得好讲唻。哈哈，到埃个辰光，我想搿能一本正经个来介绍伊——
冲汤婆子个辰光，手势到位个朋友是勿需要借助漏斗个，伊拉可以直接拎牢铜吊或者热水瓶对准壶口一灌而满，动作邪气潇洒。等水冲了差勿多了，拿胶圈内塞合起来，再捻紧带螺纹个外盖，一拍脗缝，就算侬拿只汤婆子丁倒过来，里向个水也是勿会漏出来个。辣辣阴冷潮湿个日脚，阿拉可以用汤婆子来烘衣裳，譬如像棉毛衫裤咾啥。一般性一两个钟头就干了，假使真个碰着大冷天，当中再调趟水，也基本搞得定了。便当还是蛮便当个，哪怕侬是去老虎灶泡水，也用勿脱几钿。烘好衣裳，假使只汤婆子到夜里睏觉前头仍旧温吞，还可以摆辣被头里向去焐焐脚，让搿点余热伴侬一夜好梦。辣我屋里，汤婆子主要是用来烘我儿子个小衣裳脱尿布个。除非是黄梅天，呒没办法，只好拿半干个衣裳摊辣铁丝网高头生了煤球炉来烘，侬想想看，搿总归是明火，危险八腊个，外加还烟了勿得了，哪能有汤婆子清爽呢！
所以啊，勿管是黄铜、不锈钢，还是陶釉个汤婆子，侪是有毛毛头个人家屋里向个标配装备。手巧个新妇会自家做只布袋袋套辣外头，防止老人用汤婆子焐被头筒个辰光烫痛脚。到第二天早浪向，拿水倒出来还可以汏手唻，一点都呒没浪费个，搿就是从小小一只汤婆子里体现出来个节能意识！难怪老早结婚个嫁妆清单里，除脱马桶、缝纫机、碗盏镬子、缎子被面、㫰衣裳竹头咾啥，汤婆子也是一样必备个居家用品，埃歇辰光还要扎好红绸带摆辣新房间里向展示拨亲眷朋友们看唻。
可能有人会问，汤婆子个实用性阿拉侪晓得了，但伊为啥要脱马桶脱㫰衣裳竹头归辣一道呢？大家勿妨来想一想，顾名思义：汤婆子代表“热”，有红红火火个意思；竹头代表“高”，有节节高升个意思；而新房间里个搿只新马桶，勿光是桶身描金箍银，肚皮里向也侪是宝货，有：鸡蛋、糖饼、炒米花、长生果，特别是鸡蛋，讨了“传宗接代”个口彩，所以搿只马桶还另有别名，叫“子孙桶”。讲出来也勿怕拨现在个年轻人笑话，搿些民间婚俗，实际浪向是寄托了物质匮乏年代，普通老百姓对于美好生活个一种乐观朴素个憧憬。搿点，相信脱我年龄相仿个朋友应该是蛮有感触个。
可能还会有人问，葛末，汤婆子做啥要叫汤婆子，勿叫“汤爷叔”呢？我是搿能理解个，也勿晓得对勿对。此地搿个“汤”，勿是指阿拉平常吃个“鸡汤”、“老鸭汤”噢，伊是“汤浇蚁穴”个“汤”，“赴汤蹈火”个“汤”，意思是踏踏滚个开水。至于后头个“婆子”，讲起来就有眼封建了，“讨娘子”辣旧社会也叫“寻一个焐被头筒个”，所以啊，汤婆子哪能会叫“汤爷叔”呢？眼看《本草纲目》里向“大补元气”个“鸡汤”已经辣“养生社会”被过度消费了，而阿拉搿只经济实用个汤婆子却一直保持“低调”。看起来，研究“文物”也勿能够神智无知啊！
万一再有人跳出来问：“现在个科技介发达，像空调、烘干机、电热毯、尿不湿咾啥，覅讲物事唻，光牌子也看花眼睛了，便当末便当个，效率又高，汤婆子末，老早好让伊‘退休’唻！”我是搿能觉着个：有些像汤婆子搿能个家用‘老古董’，伊拉个生命力并呒没完全衰竭，伊拉仍旧是有用武之地个。据我所知，已经有越来越多个人达成了搿能一种共识：假使人类过分依赖各种功能细分个小家电或者快速消费品，搿将是非常非常消耗能源个，同时，阿拉自家对自然环境个适应力脱仔抵抗力，也会越变越差。想想也是蛮吓人个啦。
汤婆子虽然简单普通，但伊也包含了勿少生活个智慧。看来，有辰光多留心一下周围，多研究研究“老古董”，还是能够有交关收获个。
用户评论