《吃一夜不如冻一夜》
作者：沈嘉禄
改编、朗读：麦小姐
[上海话改编]
讲起冬至，我觉着，现在年纪轻个搿一代人，已经拿伊“边缘化”了。
作为一个纯粹个、历史悠久个、甚至辣民间地位浪向仅次于春节个中华传统节日，近几年来，冬至个“尴尬”处境是越来越明显了。从日历浪来看，虽然伊排辣圣诞节前头，不过老少有时髦洋气个年轻人会一本正经个安排冬至计划，像斋老祖宗搿类生活，假使爷娘长辈勿准备勿提起，多数也就混过去了。冬至辣今时今日，确实勿及圣诞节闹猛。侬看搿两天呀，帅哥美女们，佮得着道伴个，会约好了去新天地、田子坊、思南公馆等等搿些“打卡圣地”采买圣诞装备；一家头个呢，也会好心想个看看北岛背背英文，临时充充电，为平安夜个party提前做好功课。
尽管是搿能，但冬至，是被主流意识形态深深个刻录辣故宫黄历浪向个，伊存在于地球围绕太阳个轨道之间，存在于冬令进补个古老习俗脱仔老中医个谆谆叮嘱之中，当然，也存在于我个童年记忆里。
小个辰光，我对时间个概念是极其模糊个，读书放学做功课，皮天拆地打相打，积零用钿买航空模型，难般也欢喜隑辣窗台边看太阳落山，天马行空个七想八想……反正一日一日也就搿能过了。直到某一天，我放夜学回到屋里，一股甜津津、油滋滋个味道横行霸道个朝我鼻头里钻。咦～是啥个物事呢？等我辣门背后挂好书包，就看到姆妈端了一碗酱油色个老胖肉出来，咚个一声摆辣台子浪，脱我讲：“来吃[口伐]，今朝是冬至。”
哇～是一大块带皮个蹄髈肉！口味是偏甜个，还有桂圆、红枣扑心扑肺个做保镖。我想，介粗相个蹄髈，大概也只有辣一年当中日子最短个搿天，再有机会化了浓妆反串登场。辣我个想象当中，搿碗肉应该是老腻个，但埃歇辰光阿拉搿点普通人家个小人，平常也呒没啥吃，肚皮里向缺少油脂脱蛋白质。所以，管伊啥个品相咾口感咾，接过来就上，一歇歇工夫只碗就朝天了。
趁了我嘬骨头个空档，姆妈抓紧机会脱我补了一节民间风俗课。我记得伊教过我一句老法言话：“冬至冬至，有铜钿个人家吃一夜，呒铜钿个人家冻一夜。”
葛末，阿拉屋里是算穷个还是富个呢？兜一圈看看，房间里既呒没红木家生也呒没壁炉冰箱，所以啊，阿拉绝对勿是啥发财人家，“吃一夜”搿种事体赛过捏鼻头做梦，是想也覅想了。还好我有一个既懂做人家又会过日脚个姆妈，伊哪能舍得让阿拉冻一夜呢？再哪能末，棉被棉袄还是有个，小炉子浪向炖了铜吊，里向个水也已经开了。不过，搿种勿上勿下个尴尬状态，我倒是一直延续至今，并且寻勿着一眼翻身个苗头。
埃个辰光，勿但是我屋里吃带皮蹄髈，阿拉整幢石库门房子里侪飘满了甜津津个香味，老母鸡、白木耳、蛤士蟆是油等等等等搿些好物事，慢悠悠个摆辣绿豆小火浪向笃，外加侪是加了交关白砂糖个！阿姨妈妈们会相互之间请教料理个窍门，比方木耳要哪能泡啊，老母鸡要笃几化辰光啊，其实，也有眼自家脱自家扎台型，再顺带便脱人家别别苗头个意思啦。条件稍为推扳眼个人家，也会大排落场个烧两只水潽蛋，里向加点老白酒或者酒酿，据说搿种吃法也是邪气补个。让我觉着最最怪个，是张家爷叔炖牛鞭，搿只老鬼三长了吓人，弹性倒蛮足，半透明个，浸辣砂锅里。我小辰光又勿懂个咾，还到处去打听啥叫啥“牛鞭”啊？长辣牛阿里搭个呀？大概是姆妈觉着我问了忒多、问个问题又比较戆，就老勿耐烦个回头我一句：“等侬大起来就晓得了。”
牛鞭炖个辰光瞎难闻，有眼像弄堂口公共厕所里个阿摩尼亚味道。姆妈脱张家爷叔出主意，叫伊黄酒多摆点，手覅抖。过了几日天，搿眼牛鞭起了物理变化，一砂锅个宝贝侪发出来了，推扳眼拿砂锅盖头也顶翻脱。搿辰光，一向严肃来死个张家爷叔，两眼放光，面孔高头也拉开了无比幸福个笑容。要到几年之后，我再晓得了牛鞭个威力，多亏赵忠祥老师辣《动物世界》里为我扫盲。除脱看电视，另外还有一桩发生辣身边个实例，就是阿拉弄堂口有一个中年男人，呒没老婆个，有趟伊吃了一大碗牛鞭之后，轧12路公交车到十六铺去，结果拨人家当调戏妇女个流氓打得来臭要死。
现在啊，啥人还会辣冬至日脚吃一碗甜了发齁个蹄髈呢？至于蒲桃芝麻搿类个补品，估计也只剩点广场舞阿姨再相信了[口伐]，从长春食品商店买转去，轻手轻脚个装辣广口瓶里向，一日吃两调羹，伴随着“明天会更好”个强大意念，做自我催眠。包括白木耳红枣汤也是一样，虽然伊卖相清新高冷，气质朴素大方，但勿够刺激，勿够新派，欢喜伊个人，也越来越少了。
所以啊，现在年纪轻个搿一代人，已经拿冬至搿个老气个节日“边缘化”了。辣将近年底个搿几天，伊拉相聚辣灿烂个星空或者广告牌底下，精神抖擞个迎接一个白胡子外国老头个降临。谢天谢地，搿两日既呒没大风大雨，也呒没画片高头介浪漫个鹅毛大雪，当然，搿并勿会影响埃些小姑娘们，伊拉皮草加身，着起超短裙、过膝靴，露出人身浪向“蹄髈”搿一段，拿奔驰宝马个车门甩了山响，然后抬头挺胸个穿梭辣辣灯红酒绿之间，幻想有一驾装满礼物个麋鹿雪橇一路“叮叮当叮叮当”个“叮”过来。
是个，要漂亮个小姑娘，搿一夜，勿冻哪能够美丽呢？但伊拉心甘情愿个用自家青春个体温来焐热搿座妩媚个城市。而守望故园个老人，则严格遵守约定俗成个规矩，细嚼慢咽甜到发齁个炖品。乃末，埃句老法言话也可以改进了：有铜钿人家冻一夜，呒铜钿人家末，迓辣屋里一本正经个吃一顿。有人会问，为啥勿是吃一夜啊？噢哟，侬吃头势倒是结棍个，葛也要吃得落个呀！
用户评论