广播专辑 弄堂茄山胡148 小八腊子“嘉年华”

广播239 弄堂茄山胡 小八腊子“嘉年华”

2014-08-25 10:26 0来源：新民晚报        新民网编辑：田诗雍    作者：丁婷婷

　　上海老运动员沈坚强办了一家游泳俱乐部，游泳俱乐部就辣威海路浪。每趟我走过辰光闻到消毒水漂白粉个味道，我总归想起上世纪70年代，南京西路浪个新城游泳池，伊搭真是小八腊子白相个好地方。
　　几十年前头，大名鼎鼎个新城游泳池就辣海南京西路成都路口（现在个南证大厦此地块）。
　　伊辰光一放暑假，去新城游泳是小人个最爱。小人享受学生场优惠，8分洋钿一张游泳票，辣水里泡脱一个钟头，又风凉又可以白相，价廉物美。外加，一个礼拜要去三趟，要么一三五，要么二四六，买连票个。去起来，一般侪是学堂里同学轧好道，一道去；要么是兄弟姐妹大个带小个一道去，大有小八腊子开会了个感觉。告咾，一到大热天，新城游泳池门口最闹猛，进进出出侪是个学生子，日场连晚场，有辰光游泳池里人多得像插蜡烛。
　　新城游泳池个闹猛让隔壁一家两开间个洁民食品店也闹猛起来了。一个钟头一场，一歇歇就起个蓬头。放出来个学生子，侪会轧到店里买点心冷饮吃，店里向就像打翻了田鸡箩，叽叽喳喳，一浪高过一浪。侬买啥，伊买啥，互相之间哇哇商量；有个还要哗【wha】啦哗啦，喂喂，侬借我一分洋钿！小朋友头发浪向面孔浪向侪是水。还有一点男小囝，拿湿溚溚个毛巾、游泳裤顶了头高头。伊拉喉咙砰砰响，急出乌拉叫，“买买”。柜台外头一层一层个小人，伸出来个手捏仔一张湿溚溚钞票，差勿多戳到营业员个面孔浪向。
　　伊个辰光，大多数大人侪会拨小人一点铜钿，小八腊子个消费水平大概分三个档次，5分一档、一角一档、两角一档。有5分洋钿个小朋友就好买一只4分个糖糕，糖糕是三角形个，像大写个英文字母A，黄黄个油滋滋个甜甜个，也蛮受欢迎。有一角个小朋友高级点，可以买一只糖糕，再加六分洋钿个一杯酸梅汤，或者是糖糕加4分洋钿个一根赤豆棒冰，又吃点心又吃冷饮。贰角个小朋友就更加高级了，可以吃蛋糕搭仔牛奶，一块圆个清水蛋糕，7分洋钿，再加一瓶可可牛奶，1角3分。或者一只8分个鸡心白元蛋糕，再加一根8分个奶油雪糕。不过大多数小朋友侪是一角个水平。
　　伊个辰光，洁民食品店店堂间里还有两只火车台，还放了几只凳子，本来是让人家轧朋友个情侣、年纪大个人买了牛奶坐下来慢慢吃个。碰到搿个辰光侪部拨小八腊子占领。伊拉个白相好像还勿煞念，有个人就头对头坐辣海茄山河；有个人互相之间物物交换，大家尝尝味道，用现在个闲话讲，叫分享，伊拨伊咬口棒冰，伊拨伊咬口糖糕；一面讲一面还要拿手里向滴水个游泳衣裤绞绞干，弄得店堂间里侪是个水。店里向个老师傅就只好拿仔拖畚拖地板，一边拖一边骂：“小鬼头，侬看看看，人家勿要掼死啦？”真个，搿个辰光，侬看到侪是一只一只笑歪嘴巴个面孔，扎劲是扎劲得勿得了；侬听见是咯咯个笑声。想想也是，又白相，又好有的吃，勿开心又老爷了。
　　更想勿到后来阿拉学堂里个好几个年纪比我轻个老师侪讲，伊拉小辰光辣新城游泳池里游好泳侪到洁民食品店里买物事吃个。讲起当时个样子，个个人还手舞足蹈，味道交关好。伊拉讲搿个辰光呒没现在啥个海滩游、欢乐谷搿能个豪华，不过，仍旧是阿拉小八腊子个“嘉年华”。我想，是呀，搿个辰光小人更多个是辣海享受同学之情、手足之情，搿是千金难买个。
　　现在，辣拉南京路浪再也呒没新城游泳池了，再也看勿到洁民食品店了，再也见勿到一群群小八腊子嗡进嗡出个开心煞脱个场面了。