苏沪古典汉语（两市全境汉语语音古今对应关系规整，局地古汉语平仄、舒促、清浊、尖团格局完整保留）
嘉定菊园老茶坊《嘉定闲话》栏目
嘉定古建与民俗文化研究会 · 陈夏青嘉定语言研究工作室 出品
汉藏语系·汉语言·吴方言·太湖片·苏沪嘉小片·
太仓方言大区·嘉定方言区·华亭方言点
（声韵调标准）
哪恁理解钱教授？
一直话“树大招风”。的确如此。塱我伲搞语言亇圈子里，有一位钱教授，佢对汉语第二大分支吴语，特别是吴语里亇上海闲话，做著交交关关亇研究，作著巷巷尽尽亇贡献，是泰斗级亇知名人物。但也为昰恁嘞树大招风，饱受非议。有亇是纯清亇学术观点不同，有亇是对语言学专业亇不理解，有亇是奢求完美或者要求过高，有亇是自家做不到嘞妒忌或者不买账，有亇无非只是刁难。对于一棵有相当高度亇大树来讲，必然要吃着昰恁大亇风。翻转来看，吃着昰恁大亇风，也恰恰说明昰棵树亇高度非同一般。佷想，地下一根面条草佷阿去睬佢？！
但是，若假单靠昰恁一棵树去攩，也蛮吃酸亇。从推动相关事业亇进步来讲，也需要有理解亇人立著第三方亇角度来向大家解释说明、答疑解惑。
挨下来，我就列举几条听来亇别人家亇想法来帮助大家理解钱教授亇相关做法。
1. 关于拼音问题
钱老师对于现代汉语上海语音亇拼音设计，是仿照普通话，也就是北京语
音亇拼音来亇。为啥参考北京语音亇拼音？因为侺呒能否认一个客观事实——现在亿万民众最熟悉亇，甚至唯一知晓亇拼音方案就是全国推广亇北京语音亇拼音方案，大家已经非常稳固亇会拿b昰个字母撘【p】昰只不送气清音俦挂钩，拿p昰个字母撘【ph】昰只送气清音俦挂钩。昰个是有极其广泛亇群众基础亇。从普遍亇民众接受度上来讲，参照北京音亇方案设计上海音亇拼音，对于最广大民众来讲的确最好上手。
但蛋痛亇是，北京音亇拼音方案设计撘国际音标俦推扳比较大，故咾每个接触语言学专业亇人全要先拿从小学会亇北京音拼音方案厾脱点嘞乃么适应国际音标。但是语言学专业资料，特别是涉及音韵学、方言学、语音学亇物事，普遍要用国际音标表示亇，故嘞进著昰个门亇人好像一般不大高兴多用北京拼音，要标注苏州音、上海音是愈加亇啧，声韵母撘北京音俦又不全一样亇，照搬北京拼音方案完全不够事用亇。用国际音标全好标注，但是符号过多，打字不便。嗰么对于交关有能力设计拼音方案亇人来讲，会更加倾向于接近国际音标。乃么塱吴语保护圈子里，有能力看语言学专业论文亇，对整个圈子具有较大影响力亇引领者，更加欢喜用接近国际音标亇拼音方案。而钱老师亇拼音方案，因为不像北京拼音方案嗰恁具有行政强制性，故嘞不可能畀广大民众普遍掌握，故所以处于一种尴尬境地。
但是，钱老师亇设计初衷阿有问题？也呒不问题亇呀！就是实事求是亇立足于民众亇实际现状来设计，以期快速习得撘接受。完全也是一种可以尝试亇方案。不同亇方案全可以尝试，通过实践来检验。
2. 关于“衣”“烟”合併亇问题
我伲晓得， “基欺其熙”撘“肩牵乾轩”古汉语里是两组韵母。现代北京
闲话两组字韵母差别比较大，不大会合併。但上海闲话两组韵母发音差别较小，逐点逐点就併得分不出来啧，嗰么两组字就会发音一样啧。但是从分到合亇变化是有一个过程亇，有亇人可能“衣”“烟”厡分得煞煞清；有亇人可能有亇字还分得清，有亇字分不清爽啧；有亇人可能两组字已经彻底併和，完全一样啧。
从同一地点同一时期来看，若然所有人两组字已经彻底併和脱啧，嗰倒又好弄账啧，大家一致认为两组字不分亇读音就是标准。譬如古汉语里咸摄开口一等字“甘堪含庵”撘山摄开口一等字“干看寒安”，现代汉语嘉定闲话厡旧像古汉语一样分得煞喇打清，是两组韵母，但无论是北京闲话还是上海城区闲话全已经老早併脱啧，大家全会一致认同北京闲话两组字韵母全是an，上海城区闲话两组字韵母全是oe。
但是，正塱处于合併过程中亇两只音嗫？乃么就要争啧。就像“基欺其熙”撘“肩牵乾轩”。对于上海城区人来讲，分得清亇人可能认为自家讲亇越加正宗、标准，分不清亇人可能认为自家讲亇同样也是正宗、标准亇上海闲话，已经併和脱亇佷一定要叫我硬分我又分不清爽，就像要去重新分清爽“甘堪含庵”撘 “干看寒安”一样难。两派人必然会为正宗、标准亇话语权产生矛盾。
嗰么到底何里派算正宗、标准？轧实全正宗、全标准亇。为啥？因为语言是一个动态变化连续体，任何语言，从古至今永远著塱变亇。就汉语来讲，就封闭亇语音系统来讲么啧，从古代亇三四十只声母、百把只韵母、四声八调，到现在各个地点，併得还铤几只？不全恨不得要拦腰一刀亇啧？！单看上海县么啧，从初开埠嗰歇儿到乃，声韵母就併脱著几许得嘞！侺若然死认一个时代亇静止标准，嗰么按照初开埠亇标准来看，现在根本呒曼正宗、标准亇上海城区闲话；若是按照古汉语亇标准看，现在根本就不存在正宗、标准亇汉语！
故所以，现时代，上海城区“衣”“烟”正处于合併中。厡旧分得清两组字亇人讲亇是标准亇，已经分不清亇人讲亇也是标准亇。从长远亇看，若然上海城区闲话厡会存在，嗰么最终所有亇人昰两组字全会併和脱——到辰光就不会争啧。
对于钱教授来讲，因为佢自家正好已经是“衣”“烟”合併亇个体啧，嗰么佢以自家为发音人做出来亇资料自然是两组字韵母一样全是i亇。佷呒能奢求佢去硬分。像“睁撑澄（阳澄湖）生（an）”撘“章昌裳商（aon）”，“夹掐狭鸭（ah）”撘“鸽克合厄（eh）”也是昰恁。若然拿古汉语声韵调全部分清爽话出来么算佷狠！
同时，也不是话钱老师亇声韵调系统是昰恁亇嘞就叫唯一亇上海闲话标准。前头已经话过啧，处于语言变化连续体中，只要是规整有序亇不同阶段，全是标准亇。侺若是嫌佢亇资料音系简化，嗰么侺自家去编一本音系更加保守亇上海闲话资料吸引民众采用不就可以啧？
乃么有人话，嗰为啥普通话北京语音亇声韵调标准是唯一亇？上海闲话哪恁有眼活里活络？嗰昰个就是人工状态撘自然状态亇不同啧。全国推广亇北京语音声韵调系统通过各种方式已经固化並且行开。而上海闲话处于一种自然状态，声韵调系统也还处于自然合併中。钱教授亇《上海话大词典》嘞厛资料事实上也以自家著塰亇相当一部分个体亇音系进行著一定固化，但因为缺乏全民服从性，故嘞只有能算标准之一，而不是唯一标准。
3. 尖团合併问题
尖团音亇分合，是交关人关切亇问题。虽然尖团音亇分合实际上撘i/ie，an/aon，ah/eh嘞些儿亇分合一样，无非就是两类音是区分还是合併，但像煞介仔人们来得个关切尖团音亇分合，觉着保持尖团两类读音亇不同就来得个典雅。故嘞围绕尖团音亇争执好像要傍其他音类分合亇问题多。
从汉语变化总体来看，尖音、团音的确处于合併中。北京、崇明老早併脱啧，上海城区也已经基本併脱啧。之所以还有争执，是因为上海城区还有极少数人厡旧分得清尖团亇，尽管就普遍性上来讲，包括钱教授著塰绝大多数人是已经不分啧。但为此著塱语言保护、语言传承亇圈子里，总体比较崇尚老一辈亇语言面貌，故咾只要还有能三不两时碰着个别分尖团亇人，难免会畀大家当典范来推崇。作为个人，哪怕佷本来已经不分啧，佷若是追求区分再去刻意改变自家本来亇自然状态，也是无可厚非亇。但是作为对客观语言事实亇认识来讲，应该承认，上海城区闲话的确已经普遍不分尖团啧，外加从语言变化总体趋势来看，最终必然所有个体全会尖团合併，就像北京撘崇明走过亇路径一样。
像嘉定是尖团区分比较坚挺亇地区，覅话包括我著塰部分八零后厡旧可以尖团音煞喇打清，连当零零后亇学生子里也还有人分得清亇嘞！但是从整体情况看，的确也塱合併，六零、七零后也有部分个体部分字开始尖团不分，零零后当然也有不少人尖团不分啧。从总亇趋势看，若然嘉定闲话继续存在，嗰么80年后肯定也是尖团全部合併脱啧。
听说讲钱老师认为不必硬劲去分尖团，不分就不分啧。有亇人不理解。实际上钱老师就是立著语言变化规律亇客观角度提出亇理性亇参考意见。就像前头话着亇，已经合併脱亇语音，再要区分，相当困难，也不自然。当然语音变化是不平衡亇，个体之间存在速度差别。还朆併和脱亇，厡旧分得清爽亇，当然也蛮好。但是佷要晓得，绝大多数上海城区人已经併和脱啧，佷要叫佢垯全硬分出来是不现实亇。而语言是全民参与亇，不是少数个体可以决定亇。就像我讲嘉定闲话尖团分得煞煞清亇，但是呒能就此盲目甚至狂妄亇认为嘉定闲话尖团音就不会合併或者不许其他个体合併，而是要理性亇观察客观现实，的确著塱合併，因为嘉定闲话不是只有佷一个人讲亇。普遍性撘个别性要搞清爽。
4. “如果”是否读“lu果”
中古汉语日母字，也就是声母撘“日”一样亇字，像“人肉”“若然”嘞啥
塱现代汉语北京语音当中声母读r，著苏州、上海一块，白读声母通常是接近古汉语亇读音ny；文读声母，传统上通常是z。但是，随著现代北京语音亇影响越来越大，越来越多亇人开始拿日母字仿照北京闲话r亇发音读成功l声母，乃么本来话“zy果”亇么读成功“lu果”，本来话“zen民”亇么话成功“len民”，本来话“zen带”亇么读成功“len带”。
对于交关本地汉语水平还比较高亇语保人士来讲，对于昰种变化是相当反感撘排斥亇。但是听说讲钱老师亇语言学资料里是拿佢作为新亇文读来看亇，也就是讲著大家心目中等于肯定著昰种读法亇合理性，乃么对钱老师冷嘲热讽，甚至骂山门，认为钱老师塱拿上海闲话带歪脱。实际上昰个又是塱带著自家亇主观情绪去非议理性亇学术作派。
佷话佷讨厌人家拿日母字仿照北京闲话读成功l声母，昰个也无可厚非。但是，请问，若然要佷对上海闲话亇现状作一个客观描述嗫？佷总呒能闭著眼乌珠瞎讲话“现在亇上海闲话厡旧是全体一致亇日母字白读ny声母、文读z声母”嚷？！基本亇语言事实先要正视。语言事实是由最广大民众亇普遍性表现决定亇，不是少数个体亇个别性表现决定亇。作为语言研究，描写客观现状，就要先正视由多数人决定亇普遍情形。至于佷认同与否，准备哪恁引导民众恢复本来亇伊种被认为更加传统、典雅亇发音，昰个是带有主观意图亇还一桩事体，佷也完全可以去尝试。但是就语言事实亇客观描述来讲，钱老师亇语言学资料里如实记录是完全呒不问题亇。客观记录也並不等于主观上欢喜昰种现状。但佷要改变现状，先要正视现状，而不是不承认事实。
5. 关于写法不对亇问题
汉语有专门亇文字——汉字记录。但有文字可以记录不等于所有汉语分支全妥善解决著书写实践亇问题。最起码就目前来看，大家只熟悉古代通用亇书面语文言文，现代推广全国通用亇接近北方口语亇白话文，撘广东嗰滩亇粤语白话文。但吴语区亇白话文嗫？只有能话有过实践，但朆行开，越加覅话完善啧。故嘞对于现在苏沪地区亇民众来讲，自家屋里世世代代传下来亇本地汉语哪恁写，根本呒曼能力完整解决。但钱教授通过词典嘞排一系列资料向大家普及，行大家晓得，原来上海闲话同样可以像北方闲话、广东闲话一样字字落实记录下来亇，绝对不是残疾亇！可以撘北方、广东一样听说读写平起平坐亇！昰个贡献真亇是功德无量亇！每个人全应该摸著良心问问看自家，侺阿有能力拿昰个体系完整建立起来？！
但是有亇人自家呒得能力拿上海闲话提升到昰恁一个高度，倒转来一日到夜抨击钱老师昰个写得不对，伊个用字不当，像煞只是一副三不买账亇腔调。嗰么佷拿上海闲话亇书写体系建立起来嘞普及嗫？又呒没能力，还停留著上海闲话口口相传亇古老状态，朆看见上海闲话亇竞争对手全已经具备著写亇基本能力啧。语言竞争撘军事对抗一样，拼亇是体系。人家已经发展到陆海空天电亇立体状态啧，佷还停留著陆军主宰一切亇思维里乡，嗰昰个仗哪恁打？书写缺位，上海人自家就先看不起上海闲话，觉着乡音是低等亇，呒能写亇，而人家北方闲话、广东闲话几样高级？全好写出来亇！
实际上，抨击钱老师拿上海闲话写下来，本身也反映著书写缺位对民众心理亇巨大影响。因为实际上上海人习惯撘依赖亇汉语书写体系，只有北方白话文，尽管佢同样也是一套並不完美亇书写方案，但佷习惯啧，乃么就认为佢写出来亇就是对亇。发音为shen me亇词，为啥要用“新疆喀什”亇“什”撘“钟相杨么（幺）起义”亇“么（幺）”来写？何里个字表示“啥”亇意思？“美丽de家园”为啥写“目的”亇“的”？“飞快地奔跑”为啥写“地方”亇“地”？莫名其妙！佷为啥不抨击昰个书写方案不对、不好？无非只是佷已经对北方闲话亇昰套书写方案服服帖帖啧而已。
同样，钱老师亇上海闲话书写方案里，表示“在”亇lah，用“辣茄”亇“辣”记录，昰个是一只书写方案，不是本字，无所谓对错，愈加呒能因此就认为上海闲话就是呒能写亇，或者写出来就是错亇。
当然，书写方案必然存在不足，越加不可能一出台就是完美亇。昰个全是需要长期广泛亇社会实践么可能真正趋向完美。部分用字可以商榷，昰个呒不问题。譬如上头话着亇lah昰个词，是否可以采用其他字形来记录，完全可以讨论，塱广泛亇实践中大家一俦完善。就像北方闲话到底写“什么”还是“甚么”一样。
6. “闲话”是否是“言话”
钱老师认为“ghae话”亇ghae，本字应该是“语言”亇“言”，昰塱就读ghae，是三等字读洪音亇例证之一，並著吴语会议上提出，结果好像其他大佬並不赞同。弄得有眼尴尬。
我是昰恁看亇：为此著涉及上海闲话书写亇理据性撘规范性，钱老师可能希望学界有能认可“ghae话”亇ghae本字是“语言”亇“言”亇观点，嗰么昰恁写“言”“话”两个字不单理据充分，根基深厚，外加看上去傍“管闲事”亇“闲”文雅脱让些儿。我也曾经接受过，昰恁写歇一昶。但后首来越看越不顺，因为我晓得“语言”亇“言”是中古汉语疑母字，本来是鼻音声母亇，嘉定到乃也还有一部分人“方言”就是发“方nyie”亇。故嘞我后首来还是【情愿】宁写匣母字“管闲事”亇“闲”，觉着稳当。
但是，像钱老师嘞排部分语保同仁相心写“言话”，当然也不碍亇，但是，昰个不必板要确定佢是本字，只要作为书写方案使用就可以啧。
考证本字，求亇是一只客观答案，通过严谨亇方法、充分亇证据，证明是就是，不是就不是。
制定书写方案，需要基于相当亇客观依据，但也可以根据实际情况人为灵活处理。良好亇书写方案必定要建立著大量本字基础上亇，叛恁就是一滩乱码，连当信度也呒曼。但书写方案又不可能完全全用本字。古代几千年亇经典文言文朆做到，现代人们盲目崇拜亇北方白话文撘粤语白话文同样朆做到，全有部分写法用亇不是本字。大家昰恁用就可以，不必因为昰恁写著就一定要证明目前用亇昰个字就是本字。
考证本字撘制定书写方案，是既有密切联系又並不相同亇两桩事体。但钱教授因为一方面语言学考本字亇工作也做，一方面制定书写方案向民众推广亇工作也做，有辰光两桩事体难免会搞和脱。
7. 关于宣传气势亇问题
有圈内同仁觉着钱教授宣传上海闲话亇辰光缺乏一定亇气势，镇不牢伊排想捏杀上海闲话亇反对者。当然，因为钱教授对上海闲话亇研究透彻，会有交关机会立著台上发言，塱宣传上海闲话保护理念亇辰光，若是气势不足，的确也会畀反对者一种好欺负亇感觉。
但是嗫，我伲晓得，人不可能全能亇，佷蛮难指望诸葛亮像野张飞一样有万夫不当之勇，也蛮难指望野张飞像诸葛亮一样足智多谋、神机妙算。每个人有不同亇专长，不同亇专长不可能塱同一个人身上全部具备，但当具备不同专长亇人整合成一个团队亇辰光就可以形成一支强大亇力量同时具备不同方面亇专长。就像一个航母战斗群，航空母舰再强大么啧，也不可能包打一切亇，必须要撘驱逐舰、护卫舰、核潜艇嘞厛间有机亇整合起来么有能发挥各自亇长处形成一个完备亇作战体系。
回转来看上海闲话亇保护群体，如果话钱老师是一艘航空母舰，佷不可能指望佢必须同时具有驱护舰、核潜艇亇专长，而是需要有其他交关人来承担相应亇责任配合作战。整个上海人群体里，整个上海闲话亇保护群体里，一定有交关演说人才、辩论人才，现在迫切需要亇就是有更多亇雄辩之才响应钱老师亇号召，拿上海闲话知识撘语保理念与自家亇特长相结合来取得相当亇社会影响力。
不单航母编队需要各型舰艇，就达成战略目标来讲，航母战斗群本身就有更多亇需求量。语言具有广泛亇社会性，我伲呒能拿希望撘期待全寄托著钱老师嘞排少数人身上，而是需要有更多亇人充分汲取钱老师嘞厛老一辈语言学家替我伲整理好亇知识，结合我伲自身亇优势向社会大众普及，形成相当亇声势！
8. 关于宣传夸大亇嫌疑
有网友指出话钱教授有亇宣传资料里称北京闲话、上海闲话、广州闲话为三大方言像煞不大妥当，有眼自大。若是单作为一个普通亇上海人倒也呒啥，但作为语言文化学者就不大合宜啧。
昰塱，我伲不必去纠结北上广亇闲话是否可以称为三大方言，而是想说明一点：学术研究撘搞宣传是既有联系又並不相同亇两桩事体。搞语言学学术研究，必须力求严谨。但是作为对最广大民众亇宣传来讲，並不需要如此严谨，而是追求迅速有效达成目的。
我伲就以推广普通话亇宣传来讲好啧，比较好亇宣传语是“说好普通话，沟通你我他”。但是，我伲常迤迤可以看见“说普通话，做文明人”，“我是中国娃，爱说普通话”昰恁亇标语——昰个岂不是莫名其妙？！讲不讲普通话撘文明不文明俦搭啥界？话著使用其他分支汉语撘少数民族语言就不文明啧？讲不讲普通话撘是否是中国人俦有啥关系？话著是近几十年我伲学会著普通话嘞刚刚成为中国人亇？滑稽得不得了亇事体！再加上校园内禁止使用本地汉语亇行径，以扼杀语言资源来推普亇片面做法，直接导致著现在中华语言资源大量消亡亇恶果！但是昰恁做亇人啥人去追究佢垯亇责任啧？！
和谐亇语言状态，应该是通语撘乡音俦並行不悖亇，绝对不是非此即彼亇！但是片面推普者通过相当恶劣亇宣传措辞撘行政手段已经行本地语言资源几近崩溃，相当于使用著强酸。嗰么，为著快速恢复到和谐亇中性状态，佷话到底应该加纯净水嗫还是强碱？
相对于片面推普者使用亇浓硫酸来讲，钱老师称上海闲话是三大方言之一亇表述，是否真亇测得出碱性也还讲不定嘞！无非只是因为钱老师是语言学界亇学者，参与学术讨论应该使用纯净水，故嘞交关人会拿佢亇昰个身份固化，认为钱教授就只有能是专业学者昰个唯一亇身份，朆意识着，当佢向最广大民众呼吁传承上海闲话亇辰光，佢实际上是还一个身份，一个宣传者亇身份。面对整个复杂亇社会群体，一个宣传者若然手里只有纯净水，嗰么昰桩事体做起来肯定是相当吃力亇！
好，上头就是我所了解着亇一眼情况。实际上，真亇深入了解著语言学知识，理性亇把握著语言（朗读误加“学”字）亇客观规律，再配合一定亇哲学理论撘思考，对于钱教授亇相关观点撘做法全是相当容易理解亇。当然，钱教授也不可能所有亇观点全绝对正确，学界大佬之间也有交关问题朆达成一致。但钱教授对于整个吴语区，特别是上海闲话亇研究撘保护，通过自家脚踏实地亇刻苦实干，为我伲最广大民众奠定著一个相当好亇基础！昰只庞大亇系统工程几个人做得出来？做得出来亇人几个人做啧？故所以，我伲先应该努力亇学习、领悟昰只系统並付诸实践，自家先达到相应亇级别，乃么有处对钱教授亇体系作出更加恰当亇评论撘修缮。
疁·浏河长江
2018年8月5号 礼拜日
戊戌年 六月廿四
嘉定建县800周年
用户评论