苏沪古典汉语（两市全境汉语语音古今对应关系规整，局地古汉语平仄、舒促、清浊、尖团格局完整保留）
嘉定菊园老茶坊《嘉定闲话》栏目
嘉定古建与民俗文化研究会 · 陈夏青嘉定语言研究工作室 出品
汉藏语系·汉语言·吴方言·太湖片·苏沪嘉小片·
太仓方言大区·嘉定方言区·华亭方言点
（声韵调标准）
覅求完美豪髞做
人常常有完美主义情结，昰个也无可厚非。但是，也为昰恁嘞常常阻碍著交关事业亇发展。
像我伲现在做语言资源留存保护，需要制作大量亇节目，生产大量亇语料。事实上有交关人全具备昰恁亇能力，但真正肯开工生产亇，好像不多。为啥？我伲来逐点逐点剖析。
先拿对语言资源留存保护呒得意向亇交关社会成员去脱，在此我伲不作讨论。乃么铤剩下来亇有意向亇人里，是忙得呒工夫亇両个，也去脱。阿末脚就是又有意向又有工夫亇両个。照算话，昰坒人若假全部开足马力生产，可以行我伲整个社会亇乡音产品极大丰富，营造起一个相当有利亇社会语境。但为啥交关人全不大生产，甚至一直不生产？某种程度上来讲应该可以归结为完美主义亇阻碍。
对语保有意向亇交关人，通常自家亇乡音使用能力是比较高亇，随便录一段发布出来，全是值得最广大民众参考亇珍贵语料。但是交关人像煞介仔全有眼怕坍憃亇恁不好意思录著发出来，独怕何里塱讲得不好、不对，畀人家捉扳头。假定一个人录出来亇材料是有十分之一亇不足，但是为著避免昰十分之一亇不足，连当十分之九亇好货也不拿出来啧，岂不是整个语言环境亇重大损失？佷故嘞也覅怪媒体上秃是北方闲话作品，人家也不完美亇，也常迤迤捉得着扳头亇，但人家北方闲话亇作品著塱稳定持续、源源不断亇生产，其中交关生产者还就是我伲昰个塱亇人嘞！但是我伲自家昰个塱亇汉语有声资源嗫？昰恁自然不可能形成与北方闲话相提並论亇规模。
乃么对于具备一定本地汉语书写能力亇人来讲嗫，又常常会过于纠结一排书写上亇细节问题，争来争去，但就是不落笔。嗰么昰恁实际上就算争出亇结果来，也呒啥意义——因为佷根本就不投入使用。特别需要注意亇是，语言本来就浩瀚无边，要拿其中所有亇成分全考证出一致认可亇来源，简直是一桩不可能完成亇任务，做到死也做不出来亇！侺若是要等全部弄清爽再落笔是自家亇乡音【老早】死得割割裂裂亇啧！考证本字撘制定书写方案並付诸实践，是既有联系又有区别亇两桩事体。具备著一定亇本字知识，就可以拿书写方案初步制定並实践起来，塱实践中么有处逐点完善，不实践是不可能完善亇。呒啥物事会凭空白地就完善亇。
像我从2008年4月份开始著网上乡发布本地汉语亇音视频开始算起，到乃满濌喇十年。昰十年亇作品，佷去一只只看过来，会发现一个明显亇改进过程。特别是书写方案，随著认识亇深入，著当年亇基础上进行著交关修缮。从现在亇眼光看，当年亇书写方案存在相当不足；从发展亇眼光看，现在亇书写方案也必然还有不足。但不足是次要亇，重要亇是，我亇乡音通过书面表达配合字字对应亇音频完整亇呈现出来啧！昰个就像电脑、手机亇发展一样，现在看来，当年亇型号实在是落后得来，但当时亇型号塱当时起到著相当亇作用呀！硬碰硬总傍呒曼用要好脱让些儿得嘞！塱使用当中么大家发现还有啥个要改进么逐眼逐眼发展到现在昰恁亇程度，而现在存在亇不足，又会塱未来得到改进。佷话阿可能电脑、手机直接从呒曼就一上趟变到现在昰恁亇发达程度？昰个岂不是像一个囡养出来就一米八？
佷仔细去推敲我亇音频文章么啧：
阿有读错脱亇？自然有！
阿有用错脱亇？难免有！
阿有选字不当亇？肯定有！
阿有讲法不严谨亇？绝对有！
但最关键亇在于，我有啧！我亇乡音母语有大量长篇语料留下来展示出来啧！昰排作品里大多数甚至绝大多数内容全是可以参考亇，侺只要拿里乡亇不足之处撇开就可以啧。就像一部车子，有昰恁伊恁亇不足又哪恁啧嗫？只要可以正常使用，就塱发挥佢亇价值。而交关人常常只是为一只汽车零件塱反复论证，连当一部可以使用亇车也朆造出来，忒个不合算啧！佷先行部车子出来先开起来，再逐点逐点升级配置呀！
像我2013年写《门前百态》亇辰光，有排词语还朆考证或者想好哪恁写，乃么不少场许全只是用亇吴语拼音，外加读也还读得生疙哩气、不流畅嘞！但作为一篇语料，完全已经可以起到一个留档、传播亇作用啧，只是局限于当时亇水平，还有交关瑕疵。
2014年写《东大街个记忆》，老式亇伊种用小石头铺亇路，当时辰光凑恁十亇长辈著塱亇辰光问专门名称话竟然朆问着，好像也就话石子路。乃么《嘉定方言词语汇集》嘞《上海话大词典》记录亇全是“弹kah路”，但是因为当中亇字哪恁全用著不符合音韵地位亇“硌”来记，故嘞我写亇辰光用著符合音韵地位亇“格子”亇“格”来记。结果开吴语会议亇辰光闵行亇褚先生指出话，佢考证过，比较肯定亇是，应该是“弹街路”，也就是讲，当中亇字应该不是短促亇入声字，或者话，顶起码中字读入声亇讲法应该是来自于“街”亇促化。乃么我再留心，后晚来的确听见歇有老嘉定话着歇“弹街路”。保险起见我再问，到孔庙门口头问保安昰恁亇路叫啥，佢脱口而出“弹街路”。昰记听得清爽，当中亇字的确是舒声亇。当然，既然《嘉定方言词语汇集》上记着歇“弹kah路”亇讲法，看来也有短促化亇讲法。但经过褚先生一提醒，再加上两趟亲耳朵管听见，嗰么朝下去再写着昰样事物亇辰光，我就会更加倾向于写“弹街路”。但当时昰恁写，就昰恁写啧，同样可以表达昰样概念，传达昰篇文章亇思想内容，下趟写着再修正就可以啧。包括昰篇文章里还有不少词语亇写法，现在看来用亇字也不大满意，甚至有亇词语本身是否用对也还有疑义，但昰排全属于小问题，因为重要亇是，有昰恁一篇完整使用本地古典汉语创造亇作品诞生啧，外加从点击量来看颇受欢迎，佢发挥著相当亇价值。至于还存在亇问题，可以塱随后亇作品中予以改进，就像电脑、手机亇不断进步一样。
但是交关人独怕畀人家捉错头、扳皵丝，虽然具有相当亇能力，但就是不肯创作，奉行“多做多错，少做少错，不做不错”亇策略。昰个像煞有眼选择性消极注视亇嫌疑嚷！实际上，某种程度上来讲，不做倒是顶顶错亇！侺思路合转来看就是“多做多对，少做少对，不做不对。”侺有能力，侺有意愿，侺有工夫，但就是不做，就是不肯为佷自家也主张亇事业落实行动，嗰么就是最错亇！外加，有亇人不单自家不做，还一日到夜对脚踏实地做亇人冷嘲热讽，冲冲昰个，钝钝伊个，昰个么音不准，伊个么字不对，嗰么侺自家既然吃得准应该哪恁发、哪恁写，嗰么佷做眼出来畀大家参考学习嗫？！又不做，总贯想沉浸著自家幻想亇完美形象里，轧实脆弱得不得了！
故嘞也难怪，交关人放不下完美主义情结，有个原因也是因为有交关像上头昰恁亇人忒个疙瘩，从来不肯定人家亇贡献撘相关作品亇积极意义，只会扳皵丝，选择性消极注视，的确会打击交关人亇创作热情，或者打得人家不敢轻易创作。毕竟多数人亇面皮是薄亇，难得上趟台，若然下头有几个人骂是下趟再也不敢立台上啧。故所以，乡音作品亇匮乏，也有交关社会成员不宽容亇因素。
但是，若然我伲对乡音母语还有感情撘热情，若然我伲还希望自家亇乡音著昰个世界上有一席之地，嗰么真亇是需要老老面皮，胆胆大大亇面对各种抨击！多做多对，少做少对，不做不对！覅求完美豪髞做！
疁·浏河长江
2018年8月7号 礼拜二
戊戌年 六月廿六 立秋
嘉定建县800周年
用户评论