老半斋吃刀鱼汁面（上海闲话）作者：北宏
惊蛰已过，长江刀鱼上市，老早迭个辰光，会得去买眼刀鱼吃吃。现在，长江刀鱼因为竭泽而渔，已经捕捞勿着啥个鱼了，噶咾讲刀鱼价钿水涨船高，要买真货，1斤头2千，吃勿起了。大兴货也有，必过侪是“湖刀”搭仔“海刀”，味道推扳交关，也勿去碰伊了。
刀鱼汁面倒是年年要去吃个。上海个刀鱼汁面，现在也呒没几家人家会得做了。晓得个有南京西路新镇江、四马路个老半斋。
今年（2018年）3月份一天，去老半斋一饱口福。静安寺乘地铁2号线到南京东路出站，中浪向11点半到老半斋个，店堂里向邪气闹猛、轧足势形，老早客满。辣勒账台排队买票，挨到个辰光，看到牌子高头品种老多供顾客选择：其中刀鱼汁面，2两，32块；3两，36块，今年价钿又涨，旧年是30、32块。买了刀鱼汁面搭仔肴肉（16块一份），去寻只座位。一幕场景让我呆脱：老早书场有得听隑壁书，今朝看到有两个朋友等勿急，索介“隑壁喫”，发噱。
看到吃客多数侪是中老年人，外加多数讲本地闲话；堂倌交关也是本地人，现在市面浪也勿多了。等到热气腾腾个刀鱼汁面、镇江肴（上海话读xiao）肉笃仔上来，马上下箸，品尝美味。刀鱼汁面辣勒上世纪30年代由老半斋首创，取用新鲜刀鱼加葱、姜煸炒成鱼松，搭仔肉汤、鸡汤摆了一道煠（sak入声），成为刀鱼汁，再摆面条煨制而成。伊个辰光，于佑任也是老半斋常客。
一口面条下去，感到软而勿烂，吃吃稠浓个汤水，鱼肉搭仔汤水混了一道，汤鲜味厚，再吃肴肉，味道真是㜺唻呒没闲话了。必过总觉着迭只刀鱼汁面味道还是勿如上世纪90年代，问起同桌个老饕，伊讲，现在个刀鱼交关侪是人工养个，搿味道肯定要推扳点个，算了，过过念头（口伐）。搿倒也是个，现在迭只价钿，也就是过过念头价，要吃真价什——天然江刀，一碗面条恐怕几百块洋钿也叫勿开。
老半斋是上海目前少数几家挺下来个国有饭店，内部装潢邪气普通，传菜用个还是木夹子。现在小青年侪讲吃物事要有情调，情调搿搭是呒没个，搿只场化，就是面向大众。价钿倒是实惠，味道也是正宗淮扬老味道。必过，听朋友讲，现在老半斋做刀鱼汁面个师傅已经做了30多年，快要退休，伊要半夜起来拆刀鱼肉做“刀鱼汁”，老衰瘏个。伊带过几个徒弟，现在年轻人吃勿起苦，侪逃脱了。
听祖居长江边个友人搭我讲，老早伊拉屋里烧个是大灶头，清明前头烧刀鱼先辣勒镬子里放水，拿一条条刀鱼用大头针钉辣镬盖高头（老底仔镬盖是木头个），用花萁柴猛烧，镬子里向水烧滚后，蒸汽上升，鲜嫩个刀鱼肉就落了热水里向，拨钉牢个鱼骨头还是留辣勒镬盖高头，搿种鱼搭仔骨头分离个办法老好个，烧出来个刀鱼汤鲜美无比。搿是题外话，必过迭种办法好像搭老半斋个拆肉有得一比。
但愿刀鱼汁面勿要失传，迭个也是上海滩浪向一种饮食文化。最近，到华山路云和面馆吃三虾面，傅经理讲，今年伊拉已经恢复刀鱼面供应，98块一碗。我问：是刀鱼面还是刀鱼汁面？傅经理讲：当然是刀鱼面。我对伊讲：侬搿只价钿可以个，明年3月份定规来吃。看样子，开年要调方向了，到云和面馆吃刀鱼面过过念头。
点评:
孙群:沪语说得很溜,腔调很像电视台的沪语节目。
陈遗洁：放下身段，让文人的鼻头透漏出街头巷尾的气息，极㜺。
曹景参：现今刀鱼比不上当年我们插队在长兴岛的滋味，那个味道真鲜。
朱见：讲得老好，杨华生来讲，也就葛能。
张树群：惭愧啊，看字面已经读不出来了。看样子，平时还是要多讲上海话。
周达瑜:平时讲话是一回事,真要录音网传还是要点功力的，内容也有味道，可传大家欣赏。
孔云：正宗。复旦子弟中恐怕绝无仅有。
仇锋：俺尝过，或许土包子没达到那个境界，只觉得蛮好吃而已。最有感觉的还是老早8分钱一碗的阳春面，汤汁是每天不换底加点骨头的老汤，鲜味难忘。
朱邦薇：从小就欢喜老半斋的虾仁面，刀鱼面没福享受，因为对刀鱼强烈过敏。
用户评论