“白戏”呒没白看
文 / 钱红春
小辰光路边经常有人摆摊头表演节目,比如说书卖唱、表演杂技、表演魔术,通常围观个人勿少,但是愿意出钞票个人勿多,大多数侪是辣海“看白戏”。当时我还辣读小学,从学堂里放夜学,我也欢喜会钻进路边个人群,看里向到底辣表演眼啥么事?后来,上海搿种大城市个市容管理越来越严格,路边表演就被取缔脱了。再后来,就有人拿看人家打相打,吵相骂以及有趣个对话,也称为“看白戏”。
到了现在,我年纪已经勿小,但看“白戏”个劲道一眼勿推板,前两天,我就看仔一场“白戏”。
搿天天气有点热。我买好小菜往回跑,走到小区附近个辰光,听见有个男人讲:“快点歇歇,好吃早饭口来。”回头一看,是小区大门边浪一家小店个老板招呼正辣清扫人行道个老板娘。
老板娘看上去勿到五十岁,短头发,圆面孔,头浪包仔块白毛巾,身浪穿一件白底红条个围裙。伊两只手拿一把长柄竹丝扫帚,正辣辣店门前清扫人行道。虽然搿天早浪蛮风凉,但伊额骨头浪还是汗淌淌滴。听见老板喊伊,伊头也勿抬,一边扫地一边讲:“吃早饭急点啥啦,呒没看见我还辣海忙?”
老板看看四周,对伊讲:“好口来,已经蛮清爽了,还有啥好忙啦?”我一时好奇,勿由停下脚步,也朝四周看仔一遍,附近地浪确实干干净净呒没垃圾。我刚刚去菜场之前辣地浪看到个垃圾和树叶侪已经消失了。我心里想,地浪介清爽,确实呒啥好忙了,再讲辰光已经勿早,马上就要开门营业,还有啥比做生意赚钞票更加要紧呢?
呒没想到,老板娘拿扫帚往树浪一靠,指指停辣人行道边个一长排共享单车,讲:“搿眼车子个篮筐里还呒没弄清爽。”我仔细一看,发现果然如此,有好几部车子个篮筐里有勿少垃圾,其中大多数是捏成一团个广告纸和各种一次性食品包装。搿点垃圾,多数是过路人图方便随手厾进去嗰。老板连忙讲:“扫地扫地,地浪扫清爽就可以了,人家网篮里个垃圾关侬啥事体?”“哪能勿关我事体?”老板娘接下去讲:“等一歇人家来骑车,看到网篮里有垃圾,一定勿开心,要是厾到地浪,勿是又龌龊啦?”接下去,老板娘就叫老板帮忙,两家头分片包干,拿共享单车篮筐里个垃圾收集起来,倒进路边个废物箱。全部停当以后,两家头一道进了自家店面。
搿场“白戏”让我看得有滋有味。结果因为“入戏”太深,拿家主婆叫我买菜以后顺便买袋盐个事体忘记脱了,直到快走到自家大楼门口个辰光才想起来。
我平常对“入口”个物事喜欢到大点个超市买,就怕小店里有假货。刚刚搿场“白戏”让我邪气感动,老板娘对店外头个事体也管得介用心,店里向肯定勿会瞎弄八弄。想到此地,我转身就朝搿爿小店走过去。
搿趟“白戏”真个呒没白看。
声音简介
音频列表
- 2020-12
- 2020-12
- 2020-12
- 2020-12
- 2020-12
- 2020-11
- 2020-11
- 2020-11
- 2020-11
- 2020-11
查看更多
声音主播
用户评论