广播专辑 弄堂茄山胡269 甜酸苦辣说年货

甜酸苦辣说年货  
  
郑自华  
 　　上个世纪60年代初到70年代末搿段辰光，商品供应交关紧张，票证是商品供应个主要凭证，到了春节，每家每户都要拿到一大把花花绿绿个春节年货供应券。春节商品供应分大小户，4个人以下是小户，5个人以上（含5个人）是大户。我勒拉食品行业工作，记得70年代中期，春节每户凭票供应四大金刚：粉丝1斤，金针菜、黑木耳1包，枣子半斤，炒货1件。前头3种基本上是固定个，粉丝1斤，价格0.8元；金针菜、黑木耳，0.25元1户；枣子半斤，或红枣、或黑枣。唯独炒货有点讲究，炒货是几选一，或者香瓜子、长生果选1斤，或者花生米、小核桃、松子选半斤。春节供应开始个第一天，营业时间还呒没到，等买年货个队伍已老老长，排队是盯牢炒货来个，最热门个是小核桃，或者松子。商店个场地侪比较小，还要维持正常个经营，乃末勿少商店向附近个学堂、幼儿园借教室。春节供应正好是学堂、幼儿园放假个时间，借来个教室既当仓库，又当加工场所。有辰光干脆勒拉学堂个边门供应春节商品，排队个人群勒居民小区排成了九曲桥，派出所、居委会派人戴上红袖章维持秩序，形成了一道独特个风景。


　　每到春节，消费者忙着购买年货，营业员更忙，介许多货色要运到商店，然后要限期限刻完成加工、包装任务，有个商品到货很晚，而供应年货个日脚却是全区统一个。勒整个春节供应期间，营业员天天要到夜里向12点回屋里，加工商品，核对票证，为第二天个供应做好准备工作，勿少营业员将病假单囥勒袋袋里，轻伤勿下火线。商业部门将每年个春节供应称为春节战役，是很有道理个。年货中粉丝很难包装，粉丝装勒一个2米长、1米宽个麻袋里，粉丝很硬，要从麻袋中将粉丝一把一把个拽出来，就算带了手套，勿少营业员个手上都是被弄得道道裂痕，手指上贴满了橡皮胶。搿还勿是最难个，最难个是加工枣子，冬天枣子结成一团，勿好用食品铲子，因为铲子一用力要断，当时又呒没其他工具，只能用手拿枣子一团一团挖出来，一个年货供应下来，手指变黑、出血、长茧，是家常便饭。


　　此外，副食品行业也是春节供应个重头戏，副食品供应也有交关讲究，像家禽票，买了鸡就勿能买鸭，凭蛋票可以多买点冰鸡蛋，冰鸡蛋吃口相对差，聪明个上海主妇用冰鸡蛋做蛋饺。肉票买猪头肉个时候，可以多买点，因为伊个辰光有猪头肉吃是老好了。到菜场买年货，比到食品店买年货更加“衰瘏”（吃力），不少人家老早排队用摆砖头、破篮头做数，结果勒拉半夜里，砖头、破篮头寻勿着了，乃末大家“寻相骂”。我屋里兄弟姐妹多，人多个优势就发挥出来了，阿拉兄弟分班，比如，我搭弟弟先上半夜排队，到下半夜，两个阿哥过来替换我们，然后就直接将菜买回来。


　　60年代末70年代初，上海个一般人家都有子女勒外地插队落户，子女回家探亲，可以带点当地个长生果、香瓜子。也有自己家里炒一个热天积起来南瓜子、西瓜子个。我大阿姨住勒虹口区个舟山路，隔壁就是鼎鼎大名个“好吃来”炒货工场，阿拉经常去“好吃来”要点细砂，用细砂炒瓜子，味道特别好！


　　伊个辰光平时侪是过个清淡日脚，春节商品尽管凭票供应，数量很少，品种也单调，但已是全年最丰盛个了，告咾节日气氛显得特别浓，但仔细想想，搿个也是以全年苦日脚、平淡日脚为代价换来个呢！