广播专辑 弄堂茄山胡299 闶点老物事 有空来看看

闶点老物事 有空来看看  
 
侯宝良  
 

　　有趟屋里搬场，我整理书橱个辰光，翻出来交关老早“闶”起来个旧书。一面翻，一面就会想起当时个情况。人老了，再回忆过去个事体总归有种难忘个味道，搿就叫“怀旧情结”。

　　当我翻到一批1982年前后个《电影故事》个辰光，自家脑子里顿时就像重新辣辣看电影一样兴奋。上世纪八十年代初，艺术手法忒故事内容回归艺术展现，看电影是阿拉老百姓最容易接触个文化享受。上海本来就电影院多，有眼大单位自家有放映设备，天热个夜里向辣辣广场浪还经常放露天电影，也是蛮开心个。我除了欢喜看电影，还订仔《电影故事》《大众电影》等杂志，从中可以了解眼电影个背景和主要演员个介绍，有照片、还有精彩个文字描述，看起来邪气有味道。时至今日，几十年过去了，交关杂志被大家借来借去遗失勿少，现在想起来感觉老可惜个。还好迭些《电影故事》开面小，我随便塞拉角落里倒是闶了下来。

　　杂志上个电影演员，像张金玲、张瑜、龚雪、张瑞芳、白杨、程之、于飞等看起来神采飞扬，可惜现在侪拨岁月掩埋，只剩下冯奇了。老早迭些老演员，演技好，人品也好。伊拉一门心思演戏、老老实实做人，到死也呒没拿啥大钞票，想想就让我有一阵伤感。

　　我时常翻看搿些泛黄个纸页，好像自家走进了辰光个隧道，追寻着青春时代个遐想，从电影杂志浪寻到我要向往个电影，或者从电影杂志里回味到电影里难以理解个表白，茶余饭后常常引出电影里个经典台词，和亲朋好友们津津乐道。如今我退休辣辣家里，闲来无事就拿出来翻翻，回顾一下以前个青葱岁月，真有一种返老还童个感觉啊。