啥个是嘉定闲话（吴语-嘉定话 原文 附音频）

啥个是嘉定闲话

（吴语·嘉定话  原文  附音频）

可能交关人话着嘉定闲话，头一个反应就是“嘉定闲话也有交关呀！佷指个是何上个嘉定闲话嗫？”交关人侪有寔恁个困惑。个么，今朝我伲就来谈谈，啥个是嘉定闲话？

众所周知，是人就会讲闲话。递种人类用于交流个工具叫语言。世界各地个人，虽然话出来个闲话不一样，但对于�伊个地方来讲侪有能清爽个表情达意，服务�伊上个社会。

根据历史语言学个观点，语言是有亲属关系个，就是讲有排语言啊，��相互之间是亲眷，也就是讲一个老祖宗传下来个。根据��亲属关系个远近，从大到小分为语系、语族、语支、语言、方言，方言再从大到小一级级分下去，直到一个个具体个地点，可能是一座城镇，或者是一个宅头。也就是讲世界上咍咍万万个地点，当地人讲个闲话都属于某种语系、某种语族、某种语支、某种语言。而且，只要是稍些大点个语言，必然会产生方言个差别，可以讲凡是大家晓得个语言，英语、法语、德语、俄语、日语、韩语、蒙古语、维吾尔语嘞铤嘞些儿，统统侪有方言。

一般认为，世界上个语言分成功九大语系，也就是讲现在人类纷繁复杂个各种语言有九个独立个源头，其中有两个相当大，一个叫印欧语系，就是大家熟悉个英语、法语、德语、俄语、西班牙语嘞铤忑印度个主要语言印地语所属个语系，递个就是为啥交关人学几种欧洲语言个辰光会发现��之间有比较规则个对应关系。还有一个就是我伲个母语汉语所属个语系，称为汉藏语系，汉藏语系也包括汉语、藏语、壮语、苗语、瑶语、缅甸语嘞铤好多种语言。佷作兴一呆：“啥？我伲汉语竟然忑递量种语言蜪是一个老祖宗传下来个？”是个，只是一方面因为辰光长啧，语言变化比较大，不一定马上看得出相互之间个亲属关系，还一方面可能只是因为大份人对递量种语言缺乏了解。递个有点像垃塱现在个茫茫人海之中可能有交关人忑佷蜪是一个老祖宗个，只是佷已经不晓得啧。

乃么我伲汉语呐，又是独成一支个，称为汉语族·汉语支·汉语言。根据有排学者个划分，汉语言分成功七大方言，分别是官话、吴语、闽语、粤语、赣语、湘语、客家话。其中，官话又俗称北方闲话、北方方言，分布地区从东北到大西南，从南京到大西北，使用人口七亿宽，是汉语第一大方言。现代汉民族个共同语普通话就是以官话当中北京闲话个读音作为标准音个。第二大方言是吴语，也称吴方言，主要分布于苏南、上海、浙江忑部分邻近地区，使用人口七八千万。递个就是我伲嘉定闲话所属个大方言。我伲嘉定，乃至整个上海市，侪属于吴语区个太湖片·苏沪嘉小片。若然从头讲起，个么我伲嘉定地区个闲话垃世界上个定位就是汉藏语系·汉语族·汉语支·汉语言·吴方言·太湖片·苏沪嘉小片。递个就像生物学上个界门纲目科属种，每个物种侪有�所属个类别；又像行政区划上个省、市、区县、乡镇，每个地点侪有�所属个行政区。

乃么苏沪嘉小片个范围嗫，主要塱今朝个苏州、上海、嘉兴，还有无锡忑南通个一部分地区。根据语言特征个异同，语言学家又对上海地区个方言进行著进一步个划分。��个分区大同小异，叫法上稍些有点不一样。我选取其中一种分法来讲。

上海地区可以分成功三个方言大区个五只方言小区，分别是崇明方言区、嘉定方言区、松江方言区、上海方言区、练塘方言区。其中崇明方言区忑嘉定方言区侪属于太仓方言大区，松江方言区忑上海方言区侪属于松江方言大区，练塘方言区属于吴江方言大区。递种根据语言特征划分出来个方言区忑自然地理环境还有古代个行政区划是大体对应个，因为自然地理环境忑行政区划对于方言是重要个影响因素。譬如崇明方言区忑嘉定方言区以长江为界，太仓方言大区垃历史上属于苏州府太仓州，松江方言大区大份地域属于古代个松江府。

挨下来我伲就来看看我伲个嘉定方言区。作为语言上个区划，�自然不等于行政区划上个嘉定区。嘉定方言区，有个学者称为嘉定片，垃今朝上海市个范围里，包括嘉定、宝山两个区个中北部地区，从方泰、南翔、葑塘、杨行、吴淞一线朝北侪是嘉定方言区。个么为啥要叫�嘉定方言区嗫？原来，宝山本来是古代嘉定县个一部分，一直到1724年个辰光刚刚划出去成为一个独立个县。个么分布于古嘉定县大份地区个递只方言区自然就叫�嘉定方言区啧。

既然划分为同一个方言区，说明垃递个区域里乡一定有交关，或者起码货有某种突出个特征。邋上海地区方言个分区中，主要是以古声调系统垃塱今朝方言里个分合特点递个语言特征为标准来划分个。佷可能要问：“啥个啊？声调啊？”是个，佷千万覅小看声调，因为忑声母、韵母比起来，声调数量少，个嘞每类声调统摄个字有巷巷尽尽，是蛮容易说明问题个。

汉语是有声调语言。古汉语有四声八调——塱一千多年前头个中古时期汉语有平上去入四只声调，晚见来根据声母清浊不同，声调又分成功阴阳两类，清声母字变成功阴调类，浊声母字变成功阳调类，寔恁就有阴平、阳平、阴上、阳上、阴去、阳去、阴入、阳入八只声调，现代汉语各地方言个声调就是垃递八只声调个基础上分化或者合并形成个。

大家熟悉个普通话用个是北京方言个读音，北京闲话个递四只声调就分别叫阴平、阳平、上声、去声，八只声调并得独剩四只。我伲吴语个声调一般侪要傍北方闲话多，七只、八只绝对不稀奇。塱上海地区，崇明方言区就有八只声调，忑古汉语一样，动也朆动；松江方言大区也普遍有七到八只声调，其中只有上海城区方言比较特殊，还铤剩五只；练塘方言区甚至还比古汉语多著只声调出来，变成功九只。我伲嘉定方言区已经算少个啧，只有六只声调，忑古汉语相比，是阴上忑阴去合并，阳上忑阳去合并，个嘞嘉定个六只声调分别是阴平、阳平、阴去、阳去、阴入、阳入。例字有：

阴平调：阴天高冰刚清霜风

阳平调：阳平田虫同人王牛

阴去调：去送过笑钓器破付

阳去调：剩顺电面豆外住骂

阴入调：一七八杀缩滴夹吃

阳入调：入六灭石热木敌达

若然简化个说话就是挨、鞋、矮、也、鸭、匣。

可能有个人要话：“我哪恁听得出有何里量只声调嗫？！”确实也是，吴语有复杂个连读变调现象，就是讲连垃塱话个辰光忑一个字一个字念个辰光声调不板定一样，常庄会发生变化个，譬假讲，嘉、定，连读是嘉定。个嘞若是不话尔听，佷可能从来也朆听出来歇有几只声调。不过不碍，嘉定片方言还有别个一排特征。包括：

1．古流摄开口三等——刘酒九秋就修休球牛有  嘞铤字，嘉定方言区韵母是y，其他几片侪不是。也就是讲，塱上海地区，侺只要听见啥人递组字发y韵母，几乎肯定是嘉定方言区个，不是嘉定人就是宝山人。递个特征应该讲来对大多数人侪是蛮容易观察着个。

2．古咍韵字——胎台来耐灾菜才腮  忑  寒韵字——丹坦但赞残珊

韵母一样，侪是ᴇ，但忑灰韵字——对退队雷催  个韵母不一样。嘉定方言区个灰韵字蛮有意思，各个地点分别有几种读法，有个地点读ɘ，对退队雷催；有个地点读ɤ，对退队雷催；有个地点读ø，对退队雷催；还有个地点我也发不准。可能有个人觉着简直是一片混乱！何上有啥共同特征？！㖃，但是忑边头其他几个方言小区比较，嘉定方言区各地灰韵字个读音忑��蜪侪不一样，其他几个方言小区一般侪读e或者ᴇ，例如：对退队雷催。总数就是忑嘉定方言区个各种读音侪不一样。

3．表示动作存在或者持续个语缀是  塱，例如：开垃塱、看垃塱、坐垃塱，其他几片侪不用塱。

4．是非问句用  阿+动词，如：阿对？阿是？阿晓得？嘉定本来属于苏州府，带有比较多个旧苏州府方言个特征。其他几个方言区动词垃前头，后头跟�  递类词，如上海城区方言：对�？是�？晓得�？上海城区个阿式问句也是近代受旧苏州府方言影响形成个，不是松江方言大区个本土成分，部分靠近嘉定方言区的地方也可能有递个特征。

总数，划分为同一个方言区，称为一种闲话，说明垃递个区域里乡各个地点个闲话侪有比较多个共同特征或者有某种标志性个特征，但不一定完全一式一样。可能交关人不理解：“我当得要称得上一种闲话么肯定是要完全一式一样个咾！”轧实不一定个，就像前头话着个伊恁，语言个分类忑其他物事个分类侪是一样个。譬如生物，鸟、兽、鱼、虫，互不相同，但侪是动物。其中个兽类，从天上飞个蝙蝠，到海里游个鲸鱼，再到地下跑个猫儿，佷扇膀，我划水，�脚爪，生得大不一样，但侪是哺乳动物。同样是鸟，麻雀儿、白头、黄伯劳，同样是鱼，䱀牛、�鰷、鰟鮍鱼，也侪不一样个。语言也是寔恁个，英语、法语、德语侪是印欧语，吴语、闽语、粤语侪是汉语，外冈闲话、南翔闲话、月浦闲话侪是嘉定片方言。

不过老百姓一般拿闲话细化到一个个具体个地点也正常，一方面是因为我伲个教育从来朆教歇我伲啥个是语言，导致我伲当著只有完全一似一样么可以称之为一种闲话，还一方面也说明语言对人类是几样个重要，以至于人们对�相当个敏感，只要稍为有眼不一样就称�为不同个闲话，甚至看见著一百个不同点，忽视著一万个共同点。就像有辰光我伲话着唐行闲话忑华亭闲话不一样，譬如，表示不曾，唐行忑嘉定大份地区一样话ʔvᴇ̃53，华亭可以话ʔvᴇ̃53，但也常庄发ʔviŋ53；表示呒不，华亭可以话呒曼，唐行不话。但递个佷话到底算几许大个差别嗫？当然平常脚话递个叫唐行闲话，伊个叫华亭闲话侪蛮正常，说明大家听觉敏锐耳朵尖，但若假统称��侪叫嘉定闲话也覅见怪——语言本来也就忑别个物事一样一级一级分下来个，每一级侪是一个统称。就算是华亭闲话么啧，也呒曼何里两个华亭人话出来是完全一样个，一宅上也有个寔恁话，有个伊恁话。即使是交关人当�圣经个普通话，也呒得何里两个人话出来是一似一样个。递个就像路上一埭埭行道树，就算大家公认是同一种树，譬如香樟树，佷【阿曾】看见歇何里两棵是一似一样个？递棵高，伊棵低；递棵树头大，伊棵树头小；递棵桠枝朝北窜，伊棵桠枝朝南窜……咯咾，每种闲话，不管是专家划分还是老百姓俗称，侪是一个统称。

话到递上，嘉定闲话递只名头可以作为一个统称，我想大家应该可以理解啧㖏。不过，细心个人可能要问啧：“侺khan儿话个嘉定闲话是学术上根据语言特征划分出来个，忑嘉定区不是完全一样个，个乃有排虽然属于嘉定区，但不属于嘉定方言区个地方，伊个上个闲话属于啥个嗫？”接下来我伲就来谈谈递个问题。

嘉定��南面吴淞江一线个安亭、黄渡、封浜、江桥嘞铤，递排地方个闲话属于松江方言大区，其中安亭、黄渡属于松江方言区，封浜、江桥属于上海方言区。熟悉嘉定各地方言个人常常会有寔恁个感觉——南横头个闲话忑嘉定别滩好像大不一样垃许。南横头个人也可能有寔恁个困惑——我伲属么属于嘉定，但哪恁闲话倒忑松江嘞、浦东嘞只有像？递个就涉及着自然地理因素对方言个影响。

吴淞江，上海城区段又称为苏州河，古代曾经浩瀚无比，要几里阔著嘞！是一条极为重要个航道，传说航海个大船可以直接打递条江里开到当时个大都市苏州。现在个黄浦江当时辰光只是吴淞江个支流。只是后首来吴淞江逐点逐点淤塞，阿末脚小得只有几十公尺阔，倒转来变成功著黄浦江个支流。有个学者指出，吴淞江古道是嘉定方言区忑松江方言大区个分界线。不过查阅吴淞江古道个位置，好像垃�递条方言分界线个南面，也就是讲古道两岸侪是松江方言大区，可能像还有排学者指出个伊恁，便于航运个河流可能造成两岸是同一个方言区。不管是阻隔作用还是沟通作用，总数嘉定南横头个乡镇属于松江方言大区是忑吴淞江蜪息息相关个。

乃么闲话讲转来，递排地方个方言阿算嘉定闲话嗫？当然也算，因为人们称呼一个地方个方言为某某闲话常庄是泛指递个地方境内各种方言个。就像外地人来到上海，一般足贯是拿上海市境内各个地点个方言侪统称为上海闲话个，尽管本地人话起上海闲话常庄特指上海城区方言，拿郊外其他方言也分别称为崇明闲话、浦东闲话嘞啥。同样，上海人跑到外地，一般也足贯拿伊个地区个方言统称为某某闲话，但当地人可能会忑佷话，�伊个上有几种方言。个嘞，话着嘉定闲话，作为现在嘉定区界里各乡镇方言个统称，应该是呒不问题个。若然回到历史当中，拿�作为古代嘉定县界里方言的统称，应该也是可以个。

外加，嘉定本土好像呒得何里只乡镇个闲话算得着是强势方言、权威方言，嘉定镇个方言像煞介仔还不及其他某些乡镇个闲话特点鲜明，为人熟知，显得有点默默无闻。递个忑上海闲话蜪大不一样。虽然上海闲话也可以指整个上海地区个方言，但为此著上海城区方言特色鲜明、人口众多，再加上大都市个经济、文化影响，成为上海地区乃至长三角地区个强势方言、权威方言，因而邋交关语境下头，话着上海闲话常常特指上海城区方言。

但话着嘉定闲话嗫，如果话统称嘉定各地方言交关人还不大习惯，个么特指嘉定镇方言大家作兴还要不习惯，因为随著农村人口进城定居，嘉定镇原住民个方言已经淹没于嘉定各乡镇方言个汪洋大海之中，垃嘉定街路上，佷听人家讲闲话，一般至多听得出递个人讲个阿是嘉定本地闲话，但阿是嘉定镇个闲话，作兴呒不几个人话得清爽。递个也可以从一定程度上说明嘉定镇个闲话忑城外个闲话差别不大透。但若假有个人讲个是上海城区方言，大家一听就听得出：“噢，递个人讲个是上海闲话。”特点是相当鲜明个。但翻转来讲，就算是交关人看上去比较一致个上海城区方言，可能受移民背景、居住社区嘞铤因素影响，内部也是丰富多彩，不尽相同个，呒曼何里两个人话出来完全一式一样个。

咯咾，差异是绝对个，共同是相对个。我华亭人话出来个是嘉定闲话，佷盛桥人话出来个也是嘉定闲话，我伲侪是嘉定方言区个；我安亭人话出来个是嘉定闲话，佷江桥人话出来个也是嘉定闲话，我伲侪是嘉定地区个本土方言。个嘞，若然话着嘉定闲话，用不着再疑惑“递种算，个么伊种阿算”，侪是嘉定闲话，千万覅吃著毛豆、刀豆、豇豆、扁豆还话今朝豆朆吃着个——何上有抽象个豆？豆个概念就存在于各式各样个豆里，但佷拿个一粒豆出来，只可能是一种豆，足贯不是毛豆么就是刀豆，不是刀豆么就是豇豆，依此类推。

乃么有人可能又要疑惑不解啧：“个么阿是话嘉定闲话就是乱糟糟个，呒不标准个嗫？”当然不是个。从古汉语传承到今朝，各个地点个汉语忑古汉语蜪侪是有比较齐整、规则个对应规律个，个嘞语言学家调查汉语方言，有一本记录汉字古代读音框架个《方言调查字表》就可以对整个汉语区无数地点个方言进行调查，各个地点个方言侪逃不出古汉语递只框架个，就像一棵大树，饶佷桠枝窜得兴么啧，侪是从一只老根上生出来个，追根溯源侪是回到递只根上。

所以，看似纷繁复杂个汉语方言，垃每个具体个地点侪有�自家个标准，叛恁各个地方个人不可能用�伊种闲话互相交流个。即使有个特征发生著不规则变化，譬如古代清声母入声字——八激节答雪铁宿绩，本来是一个声调，塱北京闲话里分到著其他四个声调里乡——八激，节答，雪铁，宿绩，外加呒不规律可循，但是老百姓约定俗成啧，何里个字读啥个调，又稳定下来啧，大家也不觉着�不标准。

乃么回到我伲嘉定闲话，前头话着过灰韵字——对退队雷催  嘞些儿，有个地点侪读ɘ韵母，有个地点侪读ɤ韵母，有个地点侪读ø韵母……每个地点个标准侪要具体到每个地点去讲，有场时甚至要精确到大队、自然宅。譬如方泰黄墙个标准呒能用徐行钱桥个标准去衡量，朱桥旺泾个标准呒能用戬浜立新个标准去衡量。但为此著大家个闲话侪大同小异，只是稍些有点革音，碰垃一蜪侪有能交流，个嘞会造成一种错觉，当著嘉定闲话是呒得标准个。可以寔恁话，各个地点紧跟老一代，保持忑古汉语蜪严整对应规律个闲话侪是标准个嘉定闲话。

特别需要注意个是，嘉定闲话个标准不是北京闲话，有个人一话着嘉定闲话个发音就用北京个读音去反驳话：“我问尔普通话哪恁读个？！”递个实际上是垃�拿兄弟当成功老祖宗。软硬、强弱、物事、咸肉、杏仁、外婆……交关词语个发音，嘉定闲话忑北京闲话蜪大不一样垃许，但大家侪是古汉语个继承者，外加交关发音侪保留著古汉语个特征，只是历史选择著北京闲话作为共同语个基础方言，再加上人们普遍具有服从权威个心理，乃么足贯当著自家个方言母语不标准，甚至难听。实际上，根本用不着寔恁自轻自贱、妄自菲薄个。就像佷会自豪个告诉别人佷是何上人一样，同样也可以自豪个、自信个使用自家个方言母语，�忑北京闲话一样，侪是组成我伲丰富多彩个汉语个平等个一员。

最后，我提议，可以用疁语或者疁话作为嘉定闲话个简称。疁，是我伲嘉定个别称，忑上海个简称沪一样，侪是有深厚个历史文化含义个，大家可以多用用，覅让�湮没于历史个尘埃之中。语忑话同义，语垃语言、方言个定名上用得相当广泛，如印欧语、英语、俄语，汉藏语、吴语、闽语、粤语、瓯语、沪语嘞铤，话也用于一排正式名称，如普通话、官话、客家话嘞些儿，但塱老百姓通俗个称呼里用得还要多点，像四川闲话、广东闲话、北方闲话嘞排。咯咾，我觉着学术界根据语言特征划分出来个嘉定方言区个方言，或者称为嘉定片方言，可以简称为疁语；老百姓通常话着个整个嘉定地区个方言个统称，可以简称为疁话。当然，递两个名称阿行得开，或者阿会得有一只名称淘汰脱，侪取决于广大群众个选择。

总数，嘉定闲话作为我伲嘉定人个母语，作为我伲嘉定人个标志性特征，希望�继续有能垃塱我伲中华语言宝库里留有一席之地。

疁·浏河长江

录制于2014-1-21  礼拜二

农历  癸巳年  腊月廿一

啥个是嘉定闲话（吴语•嘉定话  原文  附音频）

原文+音频  https://www.tudou.com/home/vlog/view.do?vlogId=13264781&uname=htshzh

音频  https://www.tudou.com/programs/view/w5Vthw8_LFg/