西大街亇记忆（吴语•嘉定话 原文+音频）

西大街亇记忆

（吴语·嘉定话  原文+音频）

昰昶西大街搬迁牵动著万千嘉定人亇心，大家纷纷用文字撘图片表达著对昰条疁城老街亇留恋。三年前头我写著一篇《东大街个记忆》，表达著对伊条老街亇怀念。因为塱西大街亇经历少，本来只是望著有熟悉亇同乡也用嘉定闲话来写写西大街，结果【上夜】头啊，翻来覆去睏不着，脑子里乡倒也吊著不少西大街亇回忆出来。再讲自家本来就是“乡音创作”亇积极推动者，也理应开个头。嗰么，豪髞爬起来写一篇东大街亇姊妹篇哇！

西大街倒也算我出娘肚皮最早有印象亇户荡之一，因为我伲娘舅公公老底住著伊塱亇，大约是80年代末到90年代初亇辰光。印象里大概塱条南北河桥附近，好像就是项泾桥。有趟跟著舅公垯亇小伯伯出来兜兜，正好看见只麻雀钻著项泾石驳岸亇罅喇里乡，觉着奇稀得来！

舅公垯跑进去好像有只天井，里乡房子印象里不大透，但也起码货有里外两间。有趟临跑快外头厅里只电视著塱放《恐龙特急克塞号》，正好看见只镜头——一个人拿只恐龙头斩下来，颈骨塰墪煊煊红一滩，腻心透腻心透！电视里乡真是充满血腥撘暴力啊！不过说明伊只电视机倒是彩色电视机，蛮高级亇。我伲还塱用黑白电视机嘞！

不过舅公垯塱印象最深亇是门外头天井里壁脚跟塰墪有只大亇鱼缸，隔壁人家亇，里乡养满亇——乌龟，外加水还来得亇大嘞，不晓得生亇青淤苔嗫还是绿藻，绿漾漾亇。乃么両只乌龟塱里乡氽上氽下，游来游去。真是“绿”水荡漾乌龟“爬”，想想觉着滑稽得来！

有趟像煞娘舅公公垯塱出来之后坐著爷娘脚踏车上朝西行啥，一埭边沿塘浒，应该就是练祁河，有両只船歇好著垯，岸上乡像有吊车嘞、传送带嘞啥，一袋袋货色幢好著塱，一派繁忙亇内河港口亇景象。当时年纪忒小，不晓得回忆是否准确，但脑海中昰幅画面一直觉着邪气美妙。

可惜，自从娘舅公公垯搬脱之后西大街就著我印象当中中断脱啧……

一凑读初中啧，可以踏脚踏车上路啧，乃是一个嘉定城饶角落子兜呃！西大街自然也不例外。

我有两个爱好——一是看船，一是看城墙。正好，西门昰滩又有城墙又有船。

老早就听见话西门保留著嘉定最完整亇城墙，乃么特特回回踏到西门来寻城墙。顺著老街踏进来，不一歇儿就塱人民街、西大街口口头看见著一段跨著练祁河上亇城墙，跑上去一看，原来叫西水关。虽然撘后晚来“发现”亇南水关相比，西水关不免有眼“袖珍”，但依旧散发出佢独特亇魅力，吸引著我一趟趟驻足怀古。

以西水关为原点，朝南朝北沿著环城河塘浒又“发现”著几段城墙。虽然不像想象中电视里看见亇伊恁雄伟撘完整，但昰个是我伲家乡亇城墙，是撘伲俦密切相关亇，真实又亲切！佢见证著我伲嘉定县几百年来亇风雨沧桑、兴衰荣辱！

城墙脚下，环城河里，练祁河滔口塰墪总贯歇著几只船。看著城墙么正好看船。一只只船静静较亇氽著环城河里，印象里还有拖轮。九十年代住著李园一村六楼上常庄抄东北望着环城河里拖轮拖著一串船慢荡荡开过，也别有一番意境。不晓得西门昰点船，阿就是从伲屋里塰墪开过来亇？

不过佷相心船，船上亇狗倒不一定欢喜佷。有趟撘同学一俦来孛相，突然之间一只狗窜上来“危危危危危危”猛嗸呃！吓得连忙朝后退转，结果个同学还绊著根铅丝上跌著记。

还有一个同学——阿胖，也来得个要好。嗰歇儿头儿佢就住著西大街后头眼公房里。有趟要学工，学钣金工，班主任叫我伲要自家带好洋铜匣子嘞厛原材料。我正好呒曼，乃么佢畀我。根据阿胖亇指示，从西大街里摸进去，后头么阿就是清河路？佢从楼上跑来下，搿著只桶，是乐口福嗫，麦乳精嗫，还是阿华田？忘记脱啧。盖头一嚣开，里乡一粒糖，嘿嘿！我还道著昰个是佢垯屋里亇糖钵头嘞，阿末脚吃剩一粒么连钵头畀我。轧实么佢倒特程特回替我摆粒糖塰——当好。现在想想嗰辰光同学之间亇互相交往倒也蛮有劲亇。

不过啊，自从2001年初中毕业之后就出去读书啧，就算双休日归来也不大塱城里兜啧——有限亇兜风辰光全用著垯荒郊野外啧。西大街亇记忆又中断脱啧……直到2009年。

2009、2010年，我蛮多塱塔城路疁西桥西桥堍桥脚里路北带边亇亭子里轧著老人俦里拾闲话，常庄听佢垯话起“西门街上”“城墙脚里”“护国寺”嘞排，乃么昰个辰光意识着，对亇，西大街就塱北面一眼眼，但厡旧不会得常庄钻进去看看，因为我比较欢喜广阔亇天地，不大高兴朝狭窄逼仄亇小弄堂里钻。难得，2011年年头上，回到城墙脚里当年看船亇场许。撘读初中辰光已经明显不一样啧，改造过啧，行得蛮清爽，就是可惜両只船也全“行清爽”啧，再也不看见啧。隔过滔口望西大街口，像煞介仔有种错觉——就是伊面倒像城里，昰面倒像城外。

一凑又是六年过去啧。前昶听见话西大街要搬迁啧，本来也无得特别亇冲动，但单位里一位老同事正好话着自家当年西大街亇老房子——104弄4号，我一记头心血来潮啧呀——一定要去看看佢亇故居！落班就去。打老式亇弹街路上钻进去，原来也就塱项泾桥附近，像煞撘伲娘舅公公垯点老房子啊差不多点亇位子。弄堂口竟然是一埭四层头亇楼房！我老早一直当著西大街上亇房子么全是一两层亇！作兴是因为路小嘞视野狭窄，也可能是因为当心碰着人也来不及，从来呒不工夫去留心上头有几许高。

4号倒也就塱口头进去一眼眼，朝东开门口亇。跑进去轧真也是一条小弄堂，边头么是人家。跑著几步像有只小天井，再朝西么有一小块场地。撘乡下头亇宅坨俦比起来啊，的确觉着有眼轧，但只要住亇人习惯，也只嫌称心著嘞！一位老伯伯正好著场地上理物事，做搬场准备。虽然觉着搬迁条件蛮好，但厡旧难掩对此地便捷生活亇不舍。佢住著也廿几年啧，4号里乡六家人家，昰両年来亇变动全晓得亇。但是我伲老同事五零后，住亇年代还要早，嗰就不熟悉啧。

昰滩亇人家，轧实也蛮多是借房子著塱亇。老同事祖籍崇明，跟著爷娘来到嘉定，从小租住著昰塱。听说讲当时昰塱乡还有苏北人、绍兴人嘞些儿四路八戗亇移民，好像老一辈讲亇还是老家亇闲话，但小一辈就全会讲嘉定闲话啧。西大街就像一只大熔炉，拿天南海北亇移民变成功著以嘉定闲话为显性核心特征亇真正文化意义上亇嘉定人啧。像伲老同事也是，讲亇一听就是嘉定闲话，外加咬音相当准，交关人已经咬不准亇“微信”“和硕路”“心理咨询”，佢念出来亇全是符合汉语古今传承规律亇规则读音，只是佢厡撘原籍地崇明一样，尖音、团音已经全部倂和脱啧，就是“精清星、焦锹消”撘“经轻兴、浇跷嚣”全不分啧。故嘞佢“心理咨询”读亇是“ɕiŋ理咨ɕiŋ”，但只要是清音siŋ或者ɕiŋ，全是汉语规则读音，读浊音ziŋ倒是不规则亇，佢撘边头“上旬”“中旬”亇“旬”声母是不同亇。北京闲话照规则应该是读“心理咨ɕyn-”，但可能受边头“旬”亇影响（影响）读成功著“心理咨ɕyn/”，乃么大家也跟著行开亇不规则读音念啧。但是我伲昰位从西大街上成长起来亇老同事厡旧保留著汉语亇规则读音。

今朝下昼又跑著埭西大街，又钻到人家屋里去参观啧。有家人家亇天井里乡，行著交关盆栽，其中有两棵仙人柱来得个突出，终投两公尺高，行両根竹头、水管子攉牢著扎好，挡好佢不跌脱，悉心培养著六年，也好心想！主人家提醒我伲话地下有三只元宝。我伲头蹱倒著一看，真亇呶！地坪是用石子嘞瓦爿粒屑铺亇，专门行著只花——南北里乡三只元宝叠著一俦。就是硕北面只当中厢里点瓦爿有眼坞著下去啧，沿皮头有层烂泥攩没脱啧。原来啊，是因为老早要烧小行灶嘞劈树柴顿著塱，日长世久么就有眼潭下去啧。虽然有眼可惜，但昰个就是真实亇生活。

再次跑过练祁河上亇弹街路——吴蕴初故居、善牧堂、陶氏住宅，聚善桥、侯黄桥，屋顶上亇瓦楞花，街面上乡挑出来亇雨篷……昰个就是依旧古朴亇西大街。挨下来会何去何从？我伲拭目以待。

跑过西大街，想着东大街。若然东大街还著塱，从东门到州桥到西门，一条古街长透长透，覅忒赞噢！若然南大街、北大街古色依旧，东西南北，一横一纵，再加上全国仅有亇的轱轳圆亇环城河，配合城墙撘绿化，一座古城覅忒灵噢！但一切全不可能“若然”。呒曼啧，就是呒曼啧；还著塱亇，今后会哪恁，也並不取决于我伲。我伲作为一个渺小亇个体，只有能塱自家能力范围里做自家可以掌控亇事体。侺可以拍照留念，照片上亇物事人家就无哪恁啧，全佷自家作主啧。

就像——嘉定闲话，嘉定人整个群体要放弃，饶佷不舍得么啧，消亡也只是一个时间问题。但我伲作为个体完全可以通过自家亇方式留存——写文章、录音频，行嘉定亇声音撘嘉定亇老街一俦著人类历史上留下扎实亇印记。

疁·浏河长江

2017年2月

文本创作于  25号  礼拜六

音频录制于  26号  礼拜日

嘉定建县799周年

【汉藏语系·汉语言·吴方言（吴语）·太湖片·苏沪嘉小片·嘉定方言区】

（录制所用汉语语音取自嘉定方言区·华亭方言点）

（声母27、韵母45±、声调6）

（“勾抠猴”、“干看寒”分韵，“杯胚陪”、“搬潘盘”分韵）

西大街亇记忆（吴语·嘉定话  原文+音频）

https://www.tudou.com/home/vlog/view.do?vlogId=20155113&uname=htshzh

纯清音频网址

https://www.tudou.com/programs/view/0xTCKLfQCFo/