石库门里开家庭音乐会
裴天蓉
阿拉小辰光蛮喜欢走亲戚，爷娘一讲到亲戚屋里去白相，就开心得不得了。亲戚里向有爷娘个兄弟姐妹，也有爷娘个长辈。如果去关系比较远个亲戚屋里，一般就只是去坐坐，勿会留下来吃饭。小辰光不懂事体，觉得不吃饭就呒没啥意思啦。每趟出门走亲戚，就希望能吃顿饭，当然能吃两顿就更加好了，白相辰光长呀。
伊个辰光，阿拉已经小学高年级了，爷娘有辰光会差阿拉到亲戚家里送东西，大概就是去送礼。有一趟，阿爸陪我去老西门见一家远房亲戚，是阿爸个长辈，我叫伊阿娘。阿爸带我去就是为了下趟可以让我去送东西。阿娘住在一条大弄堂里，里向侪是有黑色大门个石库门房子。我用力推开大门，就看到一个天井。因为天热，阿娘就在天井里招待我们，离开时，我记牢了搿扇黑大门。
过了一个礼拜，我一个人去送东西，结果七转八转走错了路，走到了另外一个与阿娘家差不多个房子外。这时，里面传出了叮叮咚咚个琴声，特别好听，我推门进去一看，里面人侪不认识，一个小朋友和我差不多大，正在敲扬琴，我怕人家赶我，刚要转身走。一个阿姨轻轻搭我讲，阿拉开家庭音乐会，侬坐下来一道参加好了。
听到音乐会，我老好奇了，就坐下来听，忘记脱要去送东西了。接下来有人唱歌了，是我老欢喜听个《手拿碟儿敲起来》，我还跟着曲调一起哼唱。阿姨问我侬会唱歌吗？我连忙摇头，后来又看到拉小提琴，还有人拉二胡……看得我老过瘾个。阿姨告诉我，伊拉侪是音乐爱好者，侪住了附近弄堂里，自家组织个。
从石库门出来天也暗了，我索性回家去了。我是下午从家里出来的。我想下次再去送，脑子里冒出好几只歌，下次也要去唱。到了屋里，姆妈问我，天黑回来是不是在阿娘屋里吃饭啦？我讲，搿条弄堂里房子侪一样，侪是黑大门，寻不到呀。姆妈看到我手里一只袋袋还拎勒嗨就光火了，讲寻不到还去了噶许多辰光啊？被姆妈骂了一顿，从此再也不让我去送东西了。
许多年过去了，我长大了，老西门搿条弄堂里个房子也早就拆掉了。这些年，我看过许多场音乐会，大多数音乐会看过就忘记了，反而经常会想起搿场石库门里个家庭音乐会。
仁贤2
。