从“看冷潽”侬看出点啥
邹荣良
“看冷谱”可算得上是句资深个上海闲话,意思是明知他人犯错却不予指出,冷眼旁观,坐看他人因犯错而倒霉。
“潽”沪音Pu四声,沪意液体溢出容器,也拨老上海引申为物体太多满出所在空间。“看冷潽”中用到“潽”正是用伊造成个一天世界个场面。
“冷”指看官个态度嘚之心思。事勿关己,冷若冰霜,冷眼旁观,听凭甚至等待“潽”得“一天世界”个后果出现。伊隐含嘞后半句歇后语:我等嘞嗨看侬白戏。
迭个“冷潽”看嘚之被看个双方关系哪能?其实懂嘞“冷潽”个意思,伊拉双方相互关系侬就看得煞辣司清,关系就算勿是敌对,也好勿到啥地方去。
看“冷潽”迭个人,伊人品侬看出来嘞?侬或许会讲,迭种人心相一塌糊涂。
拨侬猜只谜谜子,啥人对啥人勿大会对伊“看冷潽”?对!豁眼翎子拨侬,从关系亲密程度考虑。爷娘对子女个事体基本浪向勿会看伊拉“冷潽”个。
不过,我要加一句,以上侪是老底仔个状况,现在勿对嘞,侪嘞嗨看“冷潽”,就从侬自己开始对照:看见有人嘞马路浪向滥穿红灯,侬发声音?看见老人小囡掼跤侬扶?看见充手嘞辣充人家皮夹子,侬捉伊?看见室内公共场所有人抽香烟,侬阻止……为啥?
侬还看出点啥?
用户评论