广播专辑 弄堂茄山胡374 游戏也是需要嗰

　　勿出所料，朋友儿子今年考进英国一所蛮好个大学了，而且也是伊心里顶想去读书个地方。


　　做啥讲勿出所料呢？首先，迭个小人高中本生就是辣英国读嗰，基础摆辣海，只要勿乱来来，进大学基本呒没问题；其次，迭个小人自家可以管好自家。比方讲，考大学前两个月，学堂里放假了，让小朋友回去自家复习功课。


　　朋友希望儿子回上海，辣屋里准备，一来，可以照顾伊，至少可以吃得好点口伐；二来，大人暗绰绰个心思其实就是司马昭之心：辣大人眼皮底下么，可以盯牢伊呀，勿好熬夜、勿好打游戏……


　　呒没想到，小朋友拒绝了。


　　伊讲，第一，赶来赶去费辰光费精力；第二，伊参加了一个网络复习课程，回上海后因为时差上课会邪气勿方便；第三，可以随时去学校图书馆查资料……


　　小朋友如愿以偿。


　　考进大学回上海后，跟阿拉一道吃饭。


　　吃饭辰光，朋友看起来邪气满意。不过，一歇歇就又摒勿牢了：每天打游戏辰光忒长，放松两天差勿多了，马上要开学了，要收收骨头了……小朋友交关懂礼貌，人面前呒没撞大人腔，不过，看得出，伊心里还是有想法嗰。


　　辣末生头想起我家女儿刚到美国去读大学个辰光。有一趟，我问伊，跟当地小朋友白相得到一道去口伐？伊讲，还可以。


　　不过，有趟仔跟几个同学约仔一道白相，看到其他小朋友打游戏打得老扎劲，女儿讲，伊蹲了旁边显得蛮戆嗰，因为伊从小到大，呒没打过游戏……


　　其实，适可而止，游戏也是需要嗰。


　　【沪语解释】


　　摆辣海：摆着。


　　暗绰绰：悄悄的，偷偷的。


　　扎劲：带劲。


　　蹲了旁边：待在边上。


　　撞腔：言语冲撞。