老早站岗搿点事体
辣连队当兵，站岗是再也平常勿过个事体，但我有过交关勿平常个遭遇。
上个世纪六十年代初，我参军后辣辣新兵连集训个辰光，有天夜里轮着我站熄灯后第一班岗，岗位辣营区外围壕沟浪个一座木桥浪。壕沟有十来米宽，两边侪是白杨树。搿天夜里月亮辣云雾里钻进钻出，还时勿时传来青蛙个叫声。我接岗呒没多少辰光，只听见“噗通”一声，我只当是青蛙跳到水里，呒没当回事体。过脱一歇歇，又连老几响“扑通”，乃末我警觉起来，大声喝问：“啥人？”四周呒没一眼声音。我个心开始“怦怦”乱跳，当时台海局势已有所缓和，但“敌情通报”讲常常有小股流匪特务来搞破坏，勿好放松警惕。我故意拉动枪栓，像子弹上膛个样子，又一次问“啥人？”其实，新兵站岗按规定是勿配发子弹嗰，怕发生意外，我是吓吓人家，也为自己壮壮胆。终于有人应答，我听出是班长，按规定对好口令，我就收枪迎上去。班长讲，刚刚几声响是伊向壕沟厾石头个声音，想试试我个警惕性。班长表扬我几句就走了。
后来，我辣重炮连当了一名炮手。埃辰光连队个哨位辣一个小山坡浪。有天半夜我辣上岗路浪，听到自家脚步声以外有“哐啷、哐啷”个声音。让我吓丝丝个是，我走得越快声音就越响，走得慢点声音也轻点，要是停下来，声音又呒没了。埃辰光战备教育抓得邪气紧，大会小会讲个侪是“阶级斗争”，想到后头可能有人跟踪，我紧张得浑身冒汗。好勿容易看到了山坡浪个岗亭，我连奔带跑，完成交接后，就一头钻进岗亭。当我伸手掏绢头准备揩汗，手指头突然碰着一样物事，我马上恍然大悟，暗暗交好笑。原来搿天下午是训练装填炮弹，百把斤重个炮弹要连续搬上搬下几十趟，大家侪吃力煞了。夜里吃饭侪勿像平常用饭勺盛饭，而是拿碗倒扣辣饭盆浪，用调羹兜底抄。我用力过头，调羹断脱了。吃好饭，我就随手拿断脱个调羹放进裤子袋袋，啥人晓得半夜上岗一路碰出声音来，闹出自家吓自家个笑话。
有年夏天，全连辣淮河边浪一座叫马益山个山脚下头训练。有天夜里我辣炮阵地站岗，突然听到前方传来窸窸窣窣个声音。埃辰光我已经是超期服役个老兵，勿像刚刚参军碰着事体就慌里慌张。我喝问几声，非但呒没一眼回音，声音反而离我越来越近了，我马上警觉起来，端起枪迎上去，一边走一边继续喝问。见还是毫无反应，就迅速上刺刀，子弹上膛，同时就地卧倒。就辣我眼睛紧盯前方个辰光，辣月亮光个反衬下头，果然有个黑影慢悠悠朝我走过来，再仔细一看，我马上松了一口气，原来搿个黑影是一头水牛。后头才晓得，搿头牛是附近生产队嗰，因饲养员一时匆忙，夜里加好草料，栏门呒没关牢就困觉去了。搿头牛半夜里就到我此地“跑人家”来了。
虽然站岗辣部队里是一桩再平常勿过个事体，但我个成长，我个成熟，是从站岗开始嗰。
用户评论