广播专辑 弄堂茄山胡490 乔迁新居送蜜糕

乔迁新居送蜜糕
侯宝良
 出窠兄弟阿福乔迁新居，辣微信里发消息拨我，请我隔天去白相。我讲要讨点口彩，准备点馒头、糕点！阿福晓得我平常欢喜自家做糕点，所以直接“点餐”：“侬做松糕便当来西，就拿两只过来嘛。”我讲：“按照传统，乔迁送蜜糕比较好，寓意甜甜蜜蜜、高高兴兴。”呒没想到伊话锋一转，讲：“上次就想学做松糕，可惜一直呒没机会，搿趟侬索介送经上门，到我新居里来做好了。”我心想搿家伙要求蛮多嗰，问伊：“侬屋里做蜜糕个材料有口伐？”回复是两只“囧”个表情。果然勿出所料，新房子里缺个物事太多，搿种勿常用个物事还呒没准备。我也勿为难伊了，讲：“你就帮我淘干净二两粳米，泡辣水里，其他物事我自家带过去。”


第二天一早，我准备了一点碎花生、碎核桃、葡萄干、白芝麻，又到超市买了一斤水磨粉，一道带到阿福屋里。阿福喜滋滋迎我进门，迫不及待要带我参观新居。我讲：“今朝我来上门服务，先到厨房间看看。”进到厨房一看，水斗里泡仔一小盆粳米，毛估估有半斤。我讲：“粳米太多了，做个蜜糕吃口不糯。”阿福要我多做点，我想想，带来个糯米粉有一斤，顶多配三两粳米，就拿多出来个粳米捞出来，其他粳米滤干，拌进干水磨粉搅匀。阿福问：“为啥要拌干粉？”我从包里拿出一只粉碎机，讲：“搿能粳米勿会粘辣一道，方便用粉碎机磨粉。”


磨好米粉，我先舀出少许，然后掏出一小瓶红糖，开始朝米粉里拌。阿福看了恍然大悟，讲：“搿能一来颜色好看交关。”又问：“需要加水口伐？”“如果是做松糕，不加水直接拿米粉蒸熟。做蜜糕比较讲究，需要加点牛奶。”阿福从冰箱里拿出牛奶，我辣红颜色米粉和白颜色米粉里侪加了一点，搅拌成不干不糊状态，倒进两只容器，放到笼屉里蒸。趁蒸个间隙，我跟仔阿福参观新居，听伊自我点评，总结装修经验。一圈兜下来，过去廿几分钟，米粉也差勿多熟了。


 回到厨房间，问：“侬搿搭猪油有口伐？”阿福两手一摊。“麻油有口伐？”“有！”我打开锅盖，倒出蒸熟个粉团，等冷却到不烫手就掰开粉团，叫阿福帮忙淋麻油，我两只手反复揉压粉团，一直到红、白两只粉团侪光滑油亮。先拿白粉团压扁、摊薄，撒碎果仁、葡萄干，再覆上摊薄个红糖粉饼，再撒碎果仁、葡萄干，然后拿两层粉饼卷成长条，切成一段段，滚上白芝麻，压进方盒子。方糕成形以后倒出来，放进冰箱冷藏室冷却。


 一番操作，阿福看得目不转睛。勿过蜜糕做得好勿好，关键还要尝味道。从冰箱里拿出来，用刀切成片，红白夹层像五花肉，果仁相间是分外诱人，阿福迫不及待捞起一块就往嘴巴里放，吃得赞不绝口。