广播专辑 弄堂茄山胡607 一箸入口记三春

一箸入口记三春


沈一珠


 到好朋友屋里吃饭，只不过，好朋友辣美国，一时头里回勿来，是好朋友姆妈陆阿姨招待嗰。


 跟好朋友认得辰光，阿拉还是小朋友，几十年来来去去，已经比自家人还自家人了。


 陆阿姨讲，炖了一镬子鸡汤，闷了一锅羊肉，哦，还蒸了一条鲈鱼……素小菜么，侬自家欢喜吃啥就带一眼啥过来好了……结果，顺手拎仔一袋荠菜、一包油菜苋、一盒草莓就过去了。


 老老浓个清鸡汤一碗，个个炖得拓拓烂个羊肉一碗，一顿饭吃得适适意意。


 回到屋里，又接到陆阿姨电话，讲，菜苋好吃。是呀，因为有春天个味道。


 荠菜、油菜苋侪是春天里个鲜头，菜苋清炒，荠菜蛋花汤或者豆腐羹，侪是春天里个平常香。晚几日，开出油菜花、荠菜花来，就老了。喏，春笋，春雨一场，竹笋蓬蓬勃勃，趁伊刚刚蹿出来个辰光，挖出来清新，剥出来雪白，拿伊笃汤、蒸鱼，常常是一端上来，笋一记头就拨吃得清清爽爽。笋长得快，据说夜深人静辰光，可以听到伊拔节成长个声音，过脱迭个节气，伊就长成晾衣裳竹头了。


 香乌笋碧绿像翡翠，根茎切片切丝，麻油冷拌拌，是春天里顶清火个一道小菜。叶子焯脱水，搭咸肉一道，烧一锅咸酸饭，实在是春天里挡也挡勿牢个美味。


 竹笋、香乌笋一绿一白炒一盆，阿拉叫伊炒双笋。


 竹外桃花三两枝，春江水暖鸭先知。蒌蒿满地芦芽短，正是河豚欲上时。


 一首小诗，欢喜白相个人，看着个是风景，欢喜吃个人，闻着个是满满香气，一句闲话就是一道美味啊。还有，有人欢喜有人愁个香椿。“雨前椿芽嫩无丝，雨后椿芽生木质”。


 小豌豆藤清炒炒、茭白油焖焖、马齿苋生吃吃……写到此地，要去烧夜饭了，今朝夜里，有炖好个一镬子大别山老母鸡汤，就清清爽爽准备两只春天时鲜菜了。


 清炒蚕豆食材：两斤蚕豆，葱、油、盐、糖各少许。


 做法：炒前头，捺豆剥出来，盖好了碗里；油镬子里放油，稍许葱煸香，蚕豆放下去，轻轻翻炒两三下，加盐、糖稍许，加清水稍许，盖好；大火烧开，稍许滚一滚就可以盛出来吃了。


 红香椿拌豆腐个食材：红香椿一两，绢豆腐一盒，盐、糖、油稍许。


 做法：红香椿汏清爽，水里焯熟，清水过一过，斩成末；豆腐切块，水里焯一焯，捞出来摆盆里，红香椿铺辣豆腐上，撒少许盐、糖；油烧热，淋进豆腐里，吃之前拌一拌就好了。