早餐来个粢饭团
文 / 周允中
“粢”通“糍”,意思是用大米、糯米以及糯米捣碎后的粉末蒸煮的食品。粢饭团是上海人早餐个四大金刚之一,热烘烘个粢饭包裹油条,再洒点白糖,卷捏成纺锤形,吃口邪气好。后来,粢饭团里包裹个配料变得五花八门,榨菜、芝麻、肉松、火腿肠纷纷登场,各有各个味道。最近看到有人辣粢饭团里放肉酱、虎皮蛋和咸蛋黄,早餐变正餐,邪气受欢迎。勿过,我一直认为放油条白糖最正宗。
三十年前,马路浪做粢饭团个摊头交关多,伊拉主要有两种:一种是摊主自家出钞票租摊位做生意。另外一种是老板开作坊,大清老早用推车送来装满滚烫粢饭个大木桶,由摊贩发卖。摊贩一般自家勿租摊位,寻一个做大饼油条个固定摊位谈合作,每月交一点费用,搿就叫“借鸡生蛋”。
小辰光最喜欢吃个就是糯米粉做个糕团。记得埃息辰光,虹口乍浦路解放剧场旁边有一个作坊,专门做糕团,热烘烘个糯米糕包裹油条和绵白糖,比粢饭团更好吃,多出几分洋钿,绵白糖还可以改成芝麻黑洋酥。寒冬腊月里,热得烫手个粢饭团捧辣手心里,糯弹嫩烫,味道好爽耶。
麦田_axq
顶呱呱老师:您好!这个“粢”是两种读音“zi”、“ci”都可以吗?