芋艿、酱鸭、牛踏扁和鲜肉月饼
沈一珠
搿天吃好夜饭，快递小弟又来敲门了。开门一看，吓一跳，伊肩胛上扛只老老大个纸板箱！搭过来，倒勿算重，打开一看，哦哟，侪是中秋节要吃个物事。
讲起中秋节吃点啥，上海人印象中基本浪就是月饼、红梗芋艿、牛踏扁搭仔酱鸭了。
首先是月饼，从某种程度来讲，铺天盖地个月饼赛过是中秋节个外在形式。勿相信侬到大超市去看看，之前个苔条脆麻花、开口笑之类小点心摊头全部被月饼顶替了。更加考究点嗰，还会摆一只鲜肉月饼摊头出来，现烤现卖。
顶好吃个鲜肉月饼是火热踏踏滚刚刚出烤箱嗰，用小纸袋装好仔，先浅浅交咬一口，吹一吹冷，再继续咬进去。因为新鲜，肉芯子里会带点汁水；摆得辰光长了，汁水就拨酥皮吸进去；乃末肉芯子干夫夫，鲜味道少了；酥皮吃了水，紧了，吃口就勿够松脆了。
牛踏扁是毛豆子个一种，伊上市辰光辣中秋节前后。跟大热天里大量上市嗰，鲜绿又饱满个毛豆子勿一样，牛踏扁外表看上去扁塌塌，像拨牛踏过一样，偏生口感又香又糯。上海人欢喜拿伊两头各剪一刀，放辣水里摆点盐焯一焯就端上桌，边剥边吃，是清清爽爽个鲜味道。
也有可能是伊卖相勿灵，产量又勿高，所以，现在要吃到一碗正宗牛踏扁也勿容易。
芋艿刨出来个辰光，当中个芋艿头被交关芋艿仔包围好仔，所以，伊也被认为是多子多孙、阖家团圆个象征。上海人更加欢喜吃红梗芋艿，因为吃口更加糯。汏清爽之后，摆辣水里焯熟，沥干端上台子，现剥现吃。
耐心耐向自家烧只酱鸭，是中秋节个重头戏。鸭子顶好是阿拉绍兴老家个麻鸭。据说，绍兴人会用做老酒剩下来个酒糟喂鸭子，搿味道可以有交关想象空间。
做酱鸭个材料：公鸭一只，葱、姜、盐、酱油、冰糖、白糖、黄酒、丁香、茴香、桂皮稍许。
具体个做法是：先拿鸭子汰清爽，里里外外用细盐擦一擦，腌一、二个钟头，然后拎出来吹吹干；让味道进去一眼，也可以让肉头紧一眼。
再用黄酒、酱油、糖汁腌三四个钟头，当中横里，要去拿鸭子翻两翻，让鸭子表皮个颜色、味道更加均匀；茴香、桂皮、丁香各稍许，做成料包，葱、姜各稍许，跟料酒、酱油一道摆进镬子，加水，浸没鸭子三分之二，中火烧到鸭子八分熟，加稍许冰糖，改小火煨20分钟左右，让汁水慢慢浓稠。
一般屋里用个镬子小，一只大鸭子呒没办法完全浸没辣汁水里，所以，一边小火慢笃，一边要用镬铲不停拿汁水淋辣鸭子身浪，直到又浓又甜个汁水差勿多全部挂辣鸭子身浪，最后只剩一小碟，吃个辰光当蘸料。
等热气腾腾个鸭子上桌，整个节日气氛也变得香酥、浓甜。
用户评论