是“放”勿是“方”
钱红春
儿子是“独生子女”,讲起伊小辰光个事体,我是又气又好笑。
老早屋里地方小,儿子小辰光勿大肯蹲辣屋里,我每天早浪送伊去幼儿园,临进门总要回过头关照一声:“侬晏点来接我喔!”白相心思重得勿得了。进中学以后,屋里搬到郊区,读书路远了,本来准备帮伊买张公交月票,但伊硬劲要踏脚踏车,吵得我昏头六冲,只好答应,啥人晓得呒没几天就闯祸了。搿天我回到屋里,一进门就看见伊呆辣沙发浪。原来伊放学踏脚踏车过铁路道口个辰光,拨一部卡车个踏脚板带倒,人倒呒没受伤,车子被轧得一塌糊涂,气得我阿噗阿噗,从此以后伊再也勿提踏脚踏车个事体了。
有一年过年,伊收到勿少压岁钿,乃末又活络了,要买进口个名牌旅游鞋,价钿当时相当于我两个号头工钿。我从小道理讲到大道理,结果还是嘴巴浪抹石灰——白讲。我拗勿过伊,只好让步。后来我索性抱定“讲勿讲辣我,听勿听由侬”个消极态度,放手让儿子“无法无天”,只要勿出格,勿闯祸,随便伊哪能。
儿子参加工作以后,呒没几天又出“花头”了,讲要到外国去读书。我觉着蛮好笑,辣爷娘身边读勿好书,到外国呒没人管就能读得好书了?我肯定是勿相信嗰。勿过么,我经勿住伊同伊姆妈轮番“进攻”,只好开软档。
儿子出国后,每趟搭伊通电话,伊讲得顶多个闲话就是“侬自家身体要当心。”搿句闲话听听蛮简单,但从儿子嘴巴里讲出来,我觉着伊真个有点懂事体了。更加让我想勿到个是,呒没爷娘管头管脚,儿子像出笼个小鸟。伊辣国外十多年,一边打工一边读书,呒没要过屋里一分洋钿。大学毕业,伊又先后获得硕士、博士学位。
有人讲我“教子有方”,我觉着交关惭愧。仔细想想,是“放”勿是“方”。是我对儿子“恨铁勿成钢”,失去信心之后无可奈何个“放权松绑”。正是搿能一放,儿子才从“独生”变成“独立”,才会放开手脚“自说自话”,才有了自家奋斗个目标搭动力。
现在回想起来,儿子当初老是同我“对着干”,其实是伊独立思考,以自家眼光认识世界个开始。正是我觉着呒没办法之后个“放”,儿子才敢提出自家个想法,才会自作主张辞职出国读书,才有机会闯出一片天地。
我觉着对小囡个所谓“叛逆”,与其干涉制止,倒勿如像我一样放手。放手当然勿是放任自流,而是辣法律搭仔道德允许个范围里,让小囡自家作主,就算犯错,也勿要埋怨指责。再讲了,小囡个成长,长辈个培养教育当然重要,但更加重要个是实践,哪怕经历失败,也会变得成熟。讲到底,爷娘个闲话也勿一定“句句是真理”,做啥要小囡非听不可呢?
用户评论