广播专辑 弄堂茄山胡634 爆炒米花

爆炒米花
周允中
“爆——炒米花！”一声叫卖声传来，爆字拖长音，炒米花三个字迅速收尾。弄堂里很快闹猛起来。一帮小朋友争先恐后跑出来，手里拿仔淘箩、饼干听，冲到摊位前乖乖排队，耐心等待。至于原料，有大米、玉米、年糕片，调料则是糖精片，因为埃歇辰光白糖要凭票供应。特别一点嗰，也有爆黄豆、蚕豆干嗰，除了放糖精片，还要放盐，爆出来个米花甜蜜蜜，咸哒哒，味道交关灵。


爆米花个摊头浪有一只煤炉，上面是一只球形铁罐，罐头盖浪是带压力表个摇把，旁边是风箱。做生活个辰光，摊主左手转摇把，右手拉风箱，眼睛还要盯牢压力表。或许是看到压力足够高，或许是加热个辰光足够长，摊主停止转摇把，拿铁罐放进麻袋。看到搿一幕，阿拉侪会捂紧耳朵。摊主用脚隔着麻袋踩动铁罐浪个机关，发出“呯！”一声巨响，吓得阿拉心脏别别跳，但是为了能吃上喷香个爆米花，阿拉侪只好乖乖排队，啥人叫阿拉侪是馋痨坯呢。


排队排辣前头个小囡，赶忙拿手里向个淘箩或饼干听伸进麻袋里，手忙脚乱个拿爆米花撸进去，稍微慢一点，就会有其他看闹猛个小朋友凑上来捞外快……


我小辰光还欢喜自制米花糖，拿爆米花放进方形铝制饭盒，浇入用铁锅熬制个糖汁，戴上手套，


用力挤压，等冷却以后切成块就可以了。算一算，大概比商店里便宜一半左右。


现在已经基本浪看勿到走街串巷爆炒米花个商贩了，小辰光个味道也慢慢交忘记脱了。偶尔到电影院里，也会边看电影，边吃奶油味个爆玉米花，但是味道已经完全勿一样了。