（唱）有个同学叫张小海，
今年刚刚满八岁，
矮墩墩，胖嘟嘟，
大头大脑，圆脸蛋，
样子生得蛮可爱，
就是欢喜常常眯起眼。
【数板】要问为点啥道理，
因为年纪虽小，
有搭六百度个近视眼，
今朝放学回家走，
东张西望老眯眼，
阴沟洞去张一张，
垃圾箱去捞一眼。
（唱）要问究竟为点啥，
请㑚听我从头唱出来。
【数板】今朝班里发生一件事，
李老师表扬班里个同学杨晓伟，
因为他捡到五角钞票交了公，
李老师表扬他，
拾金勿昧做得对，
同学们个个全称赞。
张小海又是羡慕又钦佩，
今后我也要学习杨晓伟，
拾到钞票交给老师理应该。
因此今朝放学回家走，
低头弯腰走得慢，
阿有巴望拾到个把皮夹子，
里向有搭钞票交交关。
（唱）我拿伊交公交畀老师，
也会表扬我张小海。
【数板】突然间，看见前面有张新钞票，
张小海顿时心花开，
拾起来，贴牢鼻子仔细看，
伊自己会得笑出来，
原来是一张大前门个香烟壳，
我拾仔当宝贝。
（唱）我拾到钞票难上难，
因为我是六百度个近视眼。
【数板】张小海垂头丧气回家中，
无精打采心里烦，
老阿奶一见发了急，
连忙张口问小海。
“乖囡，平常辰光回转来急吼吼像饿死鬼，
今朝为啥道理呆憕憕了勿吃一口饭，
（白）阿是身体勿舒服了？”
“勿是个，勿要吃，勿要吃。”
【数板】“饿肚皮要生胃病，
弄坏身体勿来三，
既然侬胃口勿好勿要吃饭，
喏，拿点钞票买点点心开开胃。”
老阿奶随手摸出了钱，
交畀了张小海，
小海一看是张一块头，
顿时眉头一皱办法来。
“（白）老阿奶，侬迭个钞票畀了我好�？”
“小浮尸，迭个钞票是畀侬买点心吃个呀。”
“阿奶，谢谢侬啊。”
（唱）张小海接过钞票，
蹦蹦跳跳笑开眼，
我把钞票交畀老师，
就讲地浪拾得来，
外加是张一块头，
比晓伟十足多一倍。
【数板】张小海马上到学校，
“（白）李老师，我拾到一块洋钿交畀侬。”
【数板】老师当接过钱，
马上表扬张小海，
老师睏梦也想勿到，
迭个是小海从阿奶手里讨得来。
再说张小海，
肚皮额得来咕咕叫，
心里开心得来勿能谈。
（唱）只要老师表扬，
同学来称赞，
我情愿三日三夜不吃饭。
（白）胃口好个。
【数板】从此后小海经常得表扬，
拾得个物事交交关，
粮票廿几斤，钞票靠十块，
公文包，旅行袋，
海军帽子，绒线衫，
五花八门样样有，
简直好摆旧货摊。
李老师觉得勿对头，
其中可能有窍槛，
昨日访问到小海家，
总算谜底来揭开，
老阿奶愁眉苦脸开言道，
“李老师，最近勿晓得啥道理，
伲屋里少脱物事交交关。”
李老师一听侪明白，
“哦，原来小海交公个粮票，钞票，
公文包，旅行袋，
（唱）海军帽子，绒线衫，
统统是屋里搬出来。”
李老师深深受触动，
教育学生勿能忒简单，
学英雄要学根本，
因势利导帮小海，
学习雷锋吕士才，
从小接好革命班，
从小接好革命班。
用户评论