大冷天吃羊肉汤
沈一珠
前段辰光到乡下去，无锡，硕放，大墙门，从前个外婆屋里。
所谓乡下，已经是个习惯讲法，其实现在已经呒没乡下了，从前外婆屋里个稻田、桑园搭仔横过来竖过去个小河浜，侪已经煞煞平，变成无锡新区某工业园区个一部分。
现在外婆住个地方，工厂、超市、住宅小区，鳞次栉比；突然还会冒只面熟陌生个店面孔出来，比方讲，奥特莱斯。坐辣屋里，跟娘舅搭仔阿姨茄山河，就看到有人踏进门来，开口就讲，勿好意思，晚了，屋里小人明朝过生日，到奥特莱斯去帮伊买两件衣裳。看看，现在阿拉乡下头，辣交关地方，跟北上广深也差勿多了：喏，刚刚到奥特莱斯去转仔一圈……店里向个布局一看就是熟门熟路嗰，可以讲，新个习惯正辣养成。
日脚好过，辰光也就过得快，一年一年过去，年纪越来越大，习惯迭个物事也越来越顽强：住习惯了，看习惯了，吃习惯了，变成一种拒绝变化个理由；慢慢也觉着了，所谓习惯，也就是人活辣世界浪，跟衣食住行之间互相依赖个一点因缘，比方讲，到乡下头住一夜，早浪向起来，总牵记要去吃一碗羊肉面。
阿拉乡下迭只羊肉面店开仔长远了，从小区正门出去，穿过斜对过一条弄堂，再过条马路，是农贸市场；七转八弯到角角头，有一家阿大羊肉面店。
阿大是土生土长个当地人，从前也是种地个；后来到苏州藏书进羊肉，开了迭家羊肉面店，进进出出个，大多数侪是乡里乡亲，一道吃好仔再约下档节目：一道到活动室去下棋打牌。
搿趟去，老板变成了阿大个儿子，勿过，羊肉汤还是从前个味道，一碗羊汤盛出来，看上去煞辣势清，吃一口，味道浓得化勿开，香味道可以潽出三四家店面远。
跟北方交关地方勿一样，南方人习惯大冷天吃羊肉，觉着大冷天吃仔羊肉汤，身浪发热，勿怕冷。所以，搿歇辰光，买着好羊肉，自家屋里也可以烧一镬子。
至于交关人勿欢喜个羊臊气，从前阿拉爸爸有一个办法，就是第一潽焯水辰光，摆点白萝卜进去，稍许滚一滚，羊肉撩出来，水跟萝卜一道倒脱；再重新加清水笃，味道就好交关了。
羊肉汤材料：羊腩肉2斤左右，白萝卜两只。
调料：葱、姜、香菜、花椒、盐、黄酒各少许。
做法：羊肉汏清爽，切块；白萝卜汏清爽，也切块，摆镬子里一道焯水，稍许滚一歇，羊肉撩出来，白萝卜搭仔水一道倒脱。
镬子里重新放清水，羊肉、花椒包、葱、姜一道摆下去，大火烧滚，加黄酒少许，中小火继续笃到羊肉酥软，撩出葱姜等调料，撇清杂质，放适量盐。
吃前头，撒一把香菜末，碧绿生青。
用户评论