油面筋也有春天
文并图/沈一珠
网上有交关烧小菜视频，顶欢喜两个男人做的内容，一个是勿欢喜讲闲话的黄先生，伊勿是厨师，不过，视频里的内容是伊天天为屋里向人烧早饭，镜头里，伊基本浪一言勿发，搿天，烧的是鲜虾锅贴，热气腾腾端上台子后，每日照式照样的动作：两只手对握，轻轻搓一搓，略带一点点难为情，笑一笑，朝后退一步。哎，成年人最难得的是怕难为情啊。搿天的亮点勿是锅贴，是台子上勿经意却是熟门熟路的温馨：伊先是搛了一只鲜虾锅贴摆到太太的碟子里，然后自家再搛一只，开吃。晓得了口伐？美好的勿仅仅是食物，是一份笃笃定定的日脚。
另外一个是讲一口洋泾浜中国闲话的法国厨师。搿天，伊烧的是一台子春天日脚的时令小菜：葱油蚕豆、腌笃鲜、小豌豆饭，还有一碗是交关接地气的油面筋塞肉。对于交关中国人来讲，油面筋塞肉是一种家常。从前上班辰光，屋里、单位一地鸡毛，弄得人心急慌忙，买菜烧饭是苦差事。办公室里有过来人就教只窍开，准备几捆百叶包肉（一只只包好，码整齐，用绵线扎成捆，蒸熟），或者烧一大碗油面筋塞肉，下班晚了，简单烧只汤，加两只蔬菜，搛几只油面筋塞肉焐辣菜里，或者是拿几只百叶包放汤，就是一顿有荤有素的夜饭了。迭种菜无所谓好吃勿好吃，只勿过是忙天忙地之余饭台子浪的一份薄薄的底气。
既如此，今朝就来一碗春天里的红烧油面筋塞肉。
油面筋要用无锡的，因为吃起来筋道有质感。肉要买夹心或者是梅花肉，叫人用摇肉机摇一摇，或者干脆自家回去慢慢斩。应个春天景，加根春笋，水里焯一焯，斩成末，混辣肉酱里，加料酒、生抽、盐、糖、葱花，一道顺一个方向搅半个钟头左右；用筷子或者直接用手指辣油面筋浪戳只洞，肉塞进去，用勿着塞满，一半就好，现在肉勿稀奇，吃饱汁水的油面筋更有味道。
拿塞好肉的油面筋摆镬子里，加生抽、老抽少许（最近喜欢用秘制红烧汁代替老抽，颜色更加红亮一点），加水适量，最后，摆一小把碎的黄冰糖（像煞迭个是迭道菜的魂灵头），盖好镬盖大火烧开，转中火烧一刻钟左右就好。人勿要走开，看牢镬子，有糖和酱油的菜容易搭底。
至于一次烧多少？看情况，少了，就是春天里的一次偶遇；多了，囥冰箱，后头还有长长的热天。
用户评论