关于上海个杂感（下）
作者：梁晓声
改写：周红缨
讲述：
假使两个上海女子心情好，伊拉勒一道个伊种絮絮低语，真个会得让我享受到一种语音学方面个美妙来，拨我个感觉也的确是“说得比唱得好听”；虽然我当年还勿晓得有啥个语音学。
上海女子伊能介交谈个辰光，侪会得让我联想到林徽因个诗句——“像燕在梁间呢喃”“是爱，是暖/是人间的四月天”。假使伊拉再好心情个好言好语个回答了我个闲话，即使我当时心情勿哪能好，也会得马上变得好一点个。
上海女子勒心情好个辰光个交谈，让我觉着伊个辰光个伊拉“最女人”了，对于我迭个“霹雳火命”个北方男人，伊拉个语音邪气美妙、悦耳。
我承认，天下头个女子搭男子一样，性格搭仔心地也是千般百种个。上海女子并勿例外，绝对勿是个个侪是善良天使，还算好，我所认得个，侪是有教养而且善良，所以更加觉着伊拉讲闲话好听。
城市侪是有特点个，主要是由街区布局搭仔建筑风格、地理位置所形成个——假使水绕山环，天然个就有了特点。葛末城市也有气质个伐？
我认为有个。
葛末，上海个气质是由阿里一些元素形成个呢？
我觉着，主要是由上海闲话搭仔教养良好个上海女子形成个。假使伊拉毫无歧视心、并且用“吴侬软语”搭外地人讲闲话个辰光，上海迭座城市个气质就显示出来了。
搿种气质假使用四个字来形容就是“温文尔雅”，简化为一个字来形容，搿就是“暖”。我迭能讲，显然是老得罪上海男同胞个，对勿起咾！单讲气质，我依据个是迭能一种逻辑——假使讲，一个家庭气质哪能，女主人是一定会得起到特别重要个影响。至于贡献，无论对于一个家庭还是一座城市，实话实讲，大致浪是男人个作用更加大一眼。
上海现在个情况好像开始有所勿同了——外来人口多了，上海闲话勒勒悄悄个，几乎也是必然个从上海消失了。连得上海人家个新生代小人，讲上海闲话个也勿多了。勿晓得伊拉勒屋里是勿是也是迭能个？
勒一些商店里，听到中老年上海人重温语境亲和个消费氛围，少男少女，也可以从搿种氛围当中，感受到上海闲话个独特之处，从而更加热爱上海。至于外地人，自然也勿会违和。恰恰相反，伊拉会得欢喜搿种代入式个、沉浸式个上海语境体验，对于自家个上海之行，增加几分留念。
我希望以后有句闲话可以勒到过上海个外地人之间流传：“伊爿商店个上海闲话最好听！”
有些省市个语言即使也会逐渐拨普通闲话所取代，但实际浪向却勿会老快消亡，而是会勒相当长个时期里出现勒勒话剧搭影视作品当中。
上海闲话老难做到迭能个，沪剧个唱段搭台词，其实也是尽量向普通话个发音靠近个。葛末，上海闲话假使连得勒上海也听勿大到了，伊个消失就接近于消亡了。
我觉着，正是上海闲话，再让我对上海产生了一种“玉上海”一样个记忆。上海闲话个“细”“软”“糯”、悦耳好听，曾经使上海像玉一样个温润。
一旦上海闲话消亡了个上海，伊个气质也就随之削弱了，变得只不过是一座大都市而已了。
我是迭能认为个。
邪气小说家个一种认为。
而小说家对随便啥事体侪是一厢情愿个认为，总归是难免有点矫情个。
用户评论