海上风情—热爱小吃个上海人

热爱小吃个上海人
作者：孔明珠

上海掰地方小吃蛮多个，大多数也勿是本地独有，是包含了南方大部分地区个特色，譬如菜肉馄饨、豆沙馒头、炒年糕、小笼头、炒面、烘山芋……依能够分得清专属个起源咙？
对于屋里向规矩大，三顿饭侪要坐下来吃个人家，小吃是当早餐搭仔下午个点心用个。早饭呢，干湿搭配，一碗泡饭或者薄粥，必须配好馒头、烧麦；一碗豆浆，葛就要搭配大饼、油条、粢饭糕；一杯牛奶麦片，就是土司了，再煎两只荷包蛋就对了。
曾经邪气奇怪传统日本人一早爬起来吃大米饭。米饭是新烧个，拿出小半碗纳豆，上头打只生鸡蛋，摆一簇海苔丝，浇一圈酱油，然后就用力搅拌，然后再勿可思议个去盖到米饭上头，邪气有滋味个吃到肚皮里去。酱汤，就是味噌汤，也是早浪向新烧个，火热哒哒滚个装勒木头个盖碗里向，吃饭、吃汤，腌黄瓜、酱萝卜过过。

韩国人也是早浪向吃干个饭个，勒电视剧里看见新妇好勿容易嫁到婆家，第二天就要接过阿婆个接力棒，爬起来做一家门个早饭。淘米、烧饭，做海带汤，还要摆一台子个各种泡菜，低眉、顺眼了再算是好新妇。
我娘家思想比较新式，勿听“早饭要吃得好”伊套讲法，从小是泡饭、乳腐，最多再添两根油条吃。婆家比较重视吃，阿公阿婆总归先起来，到菜场里去买青菜搭仔新鲜个切面，回来烧菜汤面、咸菜肉丝面。或者呢，跑到弄堂口个点心摊去买早点，大饼、油条、粢饭糕，锅贴、生煎，甜浆、咸浆、豆腐花。

我邪气欢喜吃小吃，一日三顿也没问题，可能是小辰光小吃吃了忒少了。勒长乐路上班十几年，中浪向经常跑到陕西路路口个点心店要客生煎，一份砂锅小馄饨，伊家店小吃特别好，海外个朋友来，我也拖伊拉去体象上海小老百姓个民情。砂锅小馄饨呼呼烫，汤头三鲜是白虾皮、紫菜搭仔榨菜。生煎馒头当场等出镬子，煎香个底板，满口个鲜肉汤水。

讲起汤包我是更加激动，勿夸张个，伊是我少年时心里和一个梦想。为啥？因为小辰光我没吃过，好像四川北路没汤包卖个。我每趟到西区去看过房娘，陪伊到淮海路去买食品，伊总归搭牢我个肩胛，笑眯眯个讲：阿拉走快点,买好物事去吃汤包。走勒高雅时尚个淮海路浪，我心勿在焉、想入非非。汤包听起来蛮高级个，勿好拿勒手里走勒路浪向吃，一定要勒店里向寻只位子坐下来吃个，究竟是哪能个物事呢？遗憾个是，每趟买好物事，店里向总归是坐满人，寻勿到位子，过房娘就讲，哎呀，今朝来勿及等睐，要烧夜饭睐，下趟来吃哦。
蛮奇怪个，没刻意回避，从此以后几十年里，我侪听没碰着过汤包，直到一趟参加报社个笔会，勒扬州吃早茶，人手一份大套餐。已经吃撑个辰光，一只小蒸笼“腾”个摆到我面前，只看见有只邪气大个馒头，连带一根吸管，原来，掰就是汤包！快点吃，趁热吃，旁边有人催。我再懂了，汤包是馒头里向有包汤，勿是汤碗里向有包子。

我还喜欢吃大肉粽，讨厌伊种咬了两口了还没咬到肉个粽子。馒头我欢喜豆沙个，白面邪气有弹性，豆沙细腻、甜蜜蜜个，带点桂花香。汤团呢，倒是勿欢喜豆沙，也勿欢喜鲜肉，喜欢吃猪油黑洋酥，必须是水磨糯米粉做个。
可能是老底子年糕非要等到过年再好买到，吓煞了，现在我整个一年要备好年糕个。中浪向经常吃汤年糕，黄芽菜肉丝是绝配，常庄炒一大碗黄芽菜香菇肉丝，炒年糕，包春卷，每日天侪勒过年。塔棵菜冬笋、荠菜冬笋肉丝搭年糕侪邪气搭个。山芋我欢喜吃红皮个，细细长长个黄芯，甜咪咪、滑笃笃，微波炉里向烤烘山芋邪气便当。山芋去脱皮，切成小块，摆几粒糯米小圆子，倒点椰酱勾芡，看上去邪气高级个。

做咸豆腐浆我是拿手个，隔夜拿黄豆浸泡好，第二天一早用豆浆机做浓浓个淡浆，海碗里向摆虾皮、紫菜、榨菜、碎油条、生抽、米醋、麻油、辣油，一冲就可以了。大饼油条勒烤箱里加热，吃得汗津津个，幸福个一日天开始了。
有天早浪向微信收到一张两碗豆腐花个图片，邪气吃惊，因为是位受人尊敬个老领导发得来个。伊讲，老太婆每日天烧饭拨伊吃，老辛苦个，老太婆欢喜吃豆腐花个，外头买个怕勿安全，所以上网学了做豆腐花，现在总算会得做一样物事孝敬老婆了。发图是请美食家鉴定一下是否合格。我眼眶一红，问伊要了方子保存下来了。