[沪语版][朱自清散文]春

《春》

作者：朱自清

改编、朗读：麦小姐

[上海话改编]

我盼啊盼，望啊望，东风来了，春天个脚步近了。

一切侪像刚刚睏醒个样子，欣欣然张开了眼睛。山，丰茂起来了；水，润泽起来了；太阳个面孔也变得红通通个了。

小草迓迓叫从土里向钻出来，又嫩又鲜。园子里，田野里，放眼望出去，一大片一大片个，是满满个绿。坐下来，躺辣盖，翻只跟斗，踢两脚球，比赛跑，[辶半]野猫。风，是轻柔无声个；草，是细洁软熟个。

桃树、杏树、梨树，侬也勿让我，我也勿让侬，侪争先恐后个开出花来。红个像火焰，粉个像晚霞，白个像雪花。花里还带了甜丝丝个味道，眼睛闭牢，树浪向好像已经结满了桃子、杏子脱梨子。成千上百只蜜蜂，“嗡嗡”个辣辣花丛里操白相，大大小小个蝴蝶飞来飞去。遍地是野花，各式各样，有个叫得出名字，有个叫勿出名字，散落辣草丛里，像满天繁星勒辣脱我[目臿]眼睛。

“吹面不寒杨柳风”，一点也勿错，搿个风好比是姆妈个手轻轻叫辣辣撸我个头。风里带来一些新翻个泥土气息，混合了青草个味道，还有各种花个香，一道辣辣微微湿润个空气里向酝酿。鸟儿拿窠筑辣繁花嫩叶当中，假使一高兴啊，伊拉会呼朋引伴个“卖弄”自家清亮个嗓子，唱出宛转个曲调，脱轻风流水相映成趣。牛背浪向牧童个短笛，搿个辰光也会得嘹亮个从早吹到夜。

雨是最最平常个了，一落就是两三日。千万覅觉着伊烦，侬看搿雨，像牛毛，像花针，像细丝，密密稝稝个斜织出一层薄烟，罩辣每家人家个房顶高头。太阳快要落山个辰光，灯点起来了，透出一眼眼昏黄个光，拿搿一夜，烘托得安静而和平。乡间个小路浪，石桥边，有撑了伞慢慢叫走个人，还有辣田里耕作个农民，披蓑戴笠，伊拉个房子，稀稀拉拉个，辣雨头里静立。

天浪向个风筝一点一点多起来了，地浪向个小囡也多起来了。勿管是城里还是乡下，家家人家，老老小小，赛过轧闹猛一样，一个个侪出来了。活动活动筋骨，振作振作精神，各人做好自家个一份生活。“一年之计在于春”，好日脚刚刚才开始，有的是工夫，有的是希望。

春天像刚刚养出来个毛毛头，从上到下侪是新个，伊努力生长。

春天像小姑娘，花枝招展个，一边笑，一边跑。

春天像健壮个青年，有铁一般个手臂脱腰脚，带领阿拉朝前奔。