《口味·耳音·兴趣》
作者：汪曾祺
改编、朗读：麦小姐
[上海话改编]
有一趟我去买牛肉。排辣我前头个是一个讲南方口音个中年阿姨，看上去像知识分子。挨着伊了，只听到伊辣问肉摊老板：“搿牛肉要哪能烧啊？”我觉着老奇怪个，勿会烧，侬又要来买？乃末，我就问搿个阿姨：“侬呒没烧过牛肉啊？”
伊回答我：“呒没呀。阿拉屋里牛羊肉是勿进门个。”
“葛末侬为啥要买呢？”我又问。
“喏~我个小人也大了，伊拉要到外地去了。我想让伊拉先习惯起来，到了外头末，也容易适应呀。”
搿位姆妈真是用心良苦啊！听伊搿能讲，我也想帮记忙。乃末，我请阿姨到边头立了一歇，拿各种牛肉个烧法脱伊讲了一讲，从清蒸红烧咖辣，一直讲到广东个蚝油牛肉、四川个水煮牛肉、干煸牛肉丝……
有个人勿欢喜吃羊肉。阿拉去内蒙古体验生活，队伍里有位女同志是勿吃羊肉个，甚至闻到羊肉味道都会觉着腻心。乃末伊就罪过唻，只好日日开水淘饭，弄眼咸菜过过。看我吃烤全羊、手抓羊肉咾啥吃了介香，伊呴也呴煞了！
也有交关人是勿吃辣个。阿拉到重庆体验生活。几个女演员去吃汤圆，跑进店家就开始叫：“覅摆辣噢！”结果人家服务员也勿脱侬客气，直接回头伊拉：“侬吃过辣个汤圆[口伐]！”
搿样勿吃埃样勿吃个人，跑出去是蛮勿便当个。同样道理，侬到了一搭地方，听勿懂当地个言话，有辰光也是老尴尬个。
还是体验生活，有趟阿拉去湖南湖北搭仔江西。辣长沙，一个朋友鞋子坏脱了，拿出去修，但鞋铺里个人勿肯收。问了人家好几遍为啥勿肯，对方也回答了好几遍：“修鞋子个‘勿好过’。”啥意思嘛？搿朋友听勿懂唻。我只好相帮伊做翻译，原来人家个意思是，今朝皮匠师傅身体勿好，休息去了。更加麻烦个事体辣后头，到了井冈山，此地是讲客家话个。阿拉听当地个一位队长介绍，伊讲搿搭呒没人高兴当干部，乃末伊就硬了头皮上了，结果回去就拨老婆吃牌头，讲啥“辣子毛补，两头秀腐”。啥啥啥？又有人听勿懂了，我只好继续来当翻译，搿句言话呢，是讲“辣椒呒没啥个营养，吃下去两头受苦”，就是吃力勿讨好个意思嘛。但搿样子一翻译，方言里向原汁原味个感觉，也就茄脱了。
我去看昆剧，“打虎游街”、“借茶活抓”咾啥，侪是好戏，丑角个苏白尤其传神。我乐在其中，听得津津有味。坐我边头个，是一个唱京剧花旦个女演员，伊因为听勿懂，急煞了，老是来问我戏里向个人辣辣讲啥。但我也呒没本事一句一句个翻译呀，所以一场表演听下来，看得出伊是心有遗憾个。
有一趟我去民族饭店寻人。身后有几个小姑娘辣唧唧刮刮个讲老正宗个苏州话。一歇歇电梯来了，一个小姑娘提高声音招呼同伴，叫伊拉过来。我回过头一看，呆脱了，原来刚刚几个讲苏州言话个小姑娘，侪是美国人！
相比之下，阿拉搿位唱京剧花旦个女演员辣语言能力方面就差得远了。
作家也好，演员也好，文艺工作者也好，伊个口味最好杂一眼，从北京个豆汁到广东个龙虱侪要能够尝尝味道（实话实讲，有些物事我也吃勿消，比方贵州个鱼腥草）。除脱口味杂，伊个耳朵也要灵一眼，能够听懂多种方言，譬如讲上海话、四川话、苏州话、扬州话等等（再实话实讲，有些方言我是一句也听勿懂个，比方温州话）。假使呒没搿些“本事”，对作家、演员或者文艺工作者来讲，其实是种损失。
不过，口味单调了一点、耳音推扳了一点，还勿大要紧，顶顶要紧个是大家对生活个兴趣最好再广一点。
用户评论