《栗子》
作者:汪曾祺
改编、朗读:唐厂长
文字编辑:麦小姐
[上海话改编]
栗子个形状很蛮怪个,像一个小刺猬。栗子有“斗”,斗外头长了老长个硬刺,摸上去手会得刺痛。栗子辣斗里向围牢仔长了一圈,一粒一粒排勒海,看上去老团结个样子。当中有一粒是扁个,叫做脐栗。脐栗个味道脱其他栗子并呒没啥两样。坚果个外头大多数侪有得保护层,像松子有鳞瓣(注:此处朗读者有口误,“瓣”沪音同“板”或“办”,不是“盘”),核桃、白果侪有苦涩个外皮,迭个大概是为了对付松鼠而长出来个。
新摘个生栗子是蛮好吃个,又脆又嫩,就是栗子个壳勿是老好剥,里向个肉皮还要难剥唻。
拿栗子摆辣竹篮里,挂辣通风个地方吹上好几日,就变成“风栗子”。风栗子个肉看起来有点皱纹,捏捏末蛮软个,吃起来更加细腻而且有[黍刃]头。不像吃生栗子会弄得来嘴巴里侪是粒屑,而且更加甜。贾宝玉为了一桩事体发脾气,袭人脱伊叉开话题,讲:“我想吃风栗子。侬脱我去拿。”怡红院个屋檐下头挂了一篮头个风栗子。风栗子入《红楼梦》,身价就高起来了,雅了。迭个栗子是啥个来头,是贾蓉送来个?是刘姥姥送来个?还是宝玉自己辣外头买个?葛就勿晓得了,书里向也呒没交待。
栗子个熟食品种像啥是比较多个。我个家乡原来是呒没炒栗子个,有个只是摆辣火里向烤。天冷个辰光啊,生一只铜个火盆,厾几只栗子辣通红个炭火里向,勿多一歇,“蓬”一声,跳出一只裂了壳个熟栗子,马上拿手抓起来,摆辣手心里向滚来滚去,还要对牢伊吹。等到冷了之后啊,壳剥脱摆辣嘴巴里向,真是香甜无比啊,迭个也是冰天雪地里向最快乐个事体。不过烤栗子个辰光一定要当心噢,弄了勿巧会得炸伤眼睛个。讲起烤栗子,国外好像也是有个,西方就有“火中取栗”个寓言,我想,迭个栗子大概就是烤个[口伐]。
北京个糖炒栗子,过去讲究栗子是要从良乡出产个。良乡栗子比较小,壳薄,炒熟之后啊只只刮开,轻轻叫一捏,壳就破了,肉皮一搓就落脱了,一眼也勿会得牢。据说良乡栗子原来是进贡个,是西太后吃个。当然噢,北方交关好吃个物事侪讲是拨西太后进过贡个。
北京个糖炒栗子其实是不摆糖个,昆明个糖炒栗子倒是真个摆糖。昆明个栗子老大个,炒栗子个大镬子啊,一般侪架辣店门外头,用像番麦子实能介大个粗砂炒,边炒,还要朝里向倒糖水。昆明个糖炒栗子个外壳是黏搭搭个,吃好之后,手浪向侪是个糖汁,一定要汏手噢。栗子肉是糖汁沁透个,老甜个。
炒栗子宋朝就有了。笔记里向提到个“煼栗”,我想就是炒栗子[口伐]。汴京有个朋友叫李和儿,伊煼栗子邪气有名气。南宋个辰光啊,有一个使臣(名字我是忘记脱了)要出访,就有人辣伊出访个路浪向揦牢,要献上一袋煼栗子,迭个是啥人啊?就是刚才提到个李和儿呀。一袋煼栗子,寄托了伊对故国个相思,也老感人个。
日本人欢喜吃栗子,但原来日本呒没中国个炒栗子。有一年,我辣广交会个座谈会浪向认得了一个日本商人,他是来买栗子个,听伊讲啊,每年侪会得来买。他辣天津曾经开过一家炒栗子个店,回国之后啊,还是卖炒栗子,而且,伊拿天津开个炒栗子店铺个招牌也带到了日本去,一直挂辣东京个炒栗子店里向。现在伊是发财了,但是伊老感谢中国个炒栗子个。
北京个小酒馆过去是有得卖煠栗子个。栗子用刀切破小口,加水,摆花椒大料煠透,是顶级个过酒小食。现在啊,勿见得有得卖了。
栗子可以做菜个。栗子鸡是名菜,也老好做个。鸡切成功块,栗子去皮去壳,加葱、姜、酱油,再加点水浸没鸡块。鸡块熟了之后啊,摆点绵白糖,小火焖脱个廿分钟就好了。迭个鸡啊,一定要是当年个小公鸡,栗子呢,一定要是原只头个。罗汉斋也是可以加栗子个。
我伲爷曾经用白糖煨栗子,加桂花,味道嗲得一天世界。
北京东安市场原来有一家卖西式蛋糕、冰点心个铺子卖奶油栗子粉。栗子粉浪浇稀奶油,吃起来是老过念头个。当然,价钿也是勿便宜个。迭家铺子现在是呒没了。
羊羹个主料是栗子面。“羊羹”呢,其实是日本言话,只是用湿溚溚个栗子面压成功长方形个糕,实际浪向脱羊是浑身勿搭界个啦。
河北个山区缺粮食,山里向栗子树老多个,村民以栗子代替粮食。栗子当零食呢,吃是蛮好吃个,但当粮食吃恐怕胃里向是勿会适意个。
用户评论