《古龙、三毛和倪匡》
作者:蔡澜(香港)
改编、朗读:麦小姐
[上海话改编]
差勿多十年前头,我买过一本《蔡澜谈倪匡》,最近又重看了一遍。辣搿本书里向记录了交关伊拉老朋友之间个有劲事体。其中有一篇叫《古龙、三毛和倪匡》个文章,因为古龙是我非常非常欢喜个作家,所以我想拿搿篇文章读出来脱大家一道分享。
三十几年以前,我辣台湾监制过一部叫《萧十一郎》个电影。导演是徐增宏,主演是韦弘脱邢慧。电影改编自古龙个小说,买版权个辰光我就碰着过伊,讲起来,我认得伊比认得倪匡还要早。
几年以后我回香港定居,辣邵氏公司做制片经理,有老多剧本侪是倪匡兄写个,乃末就帮伊熟了。
有一趟,阿拉三家头侪辣台北,跑到古龙屋里去茄山河,在场个还有一位小说家,伊叫三毛。
埃日夜里,三毛着了一件露肩个衣裳,皮肤雪雪白,看了倪匡脱古龙侪屏勿牢迓迓叫跑到伊背后,1,2,3,两个人一道辣伊个左右肩胛浪向啊呜咬了一口。
三毛也是性情中人,伊勿但呒没动气,反而哈哈大笑。
搿是古龙最上风个日脚。自家监制电影电视剧,写作灵感也勿断。住豪宅,带保镖,一副黑社会老大个腔调。
伊人生了又矮又胖,只头特别大,差勿多有倪匡个一只半,留了一簇小胡子,但头发已经有眼秃了。
古龙讲伊欢喜外国女人,乃末最近搿只电影里向就请了一个来,漂亮了勿得了。
三毛有点想勿通了,问伊:“阿哥啊,侬书里向从来呒没写着过外国女人,请人家来演啥呢?”
古龙边笑边回答:“哈哈哈,反正侪是我想出来个,多两个人又勿搭界个咾,再讲,啥人敢勿拨我加啊!”
乃末我嘲古龙:“外国女人个模子侪介大,侬哪能吃得牢?用嘴巴咬啊?怪勿得噢,胡子也留起来了喏。”
大家侪辣笑,古龙倒是一眼也呒没啥,端起杯满满个伏特加,朝喉咙里一倒。搿就是古龙个风格,伊吃老酒从来勿是用“欱”个,伊欢喜“倒”,勿经过口腔直通肠胃,生活清爽!
国泰开始有直飞旧金山个航班了,要阿拉来拍特集,同行个人里向还有郑裕玲、钟丽缇脱李琦虹。倪匡兄也辣辣,伊开心了勿得了!
一歇歇,话题又转到了三毛脱古龙。
倪兄感慨个讲:“我帮三毛到台中去做讲座,读者来了七八千个人,三毛实在是忒受欢迎了。当天还有几个比较文学个教授,听伊拉个自我介绍,侪是名牌大学毕业个。乃末挨着我了,我难为情个讲自家只有小学毕业。三毛人真个是好,伊帮我解围,对后头个观众讲伊自家连小学都呒没毕业。”
郑裕玲问:“我听讲古龙是吃老酒吃煞脱个,到底是勿是真个啊?”
倪匡回答伊:“也可以搿能讲,我脱古龙一道吃老酒,常庄是一夜天吃脱几瓶白兰地,吃到第二日要去挂盐水。不过,古龙跑脱个真正原因是,有趟伊到杏花阁吃老酒,一帮黑社会来叫伊去脱伊拉个老大敬酒。古龙勿肯。等伊走出酒家个辰光,拨了搿帮脱底棺材拿了又长又细个刀捅了好几记,血是出得来行行情情。要紧送医院,医院个血库也呒没介许多备货,乃末呒没办法,只好跟医院外头路边浪个人买血,搿排人是啥人啦?侪是点鬼呀!血勿清爽,结果弄着了肝炎。”
阿拉几家头侪听了呆脱了。
倪兄继续讲下去:“肝浪个毛病照道理也是死勿脱个,不过医生讲再也勿好吃高度酒了,再吃个说话,就会昏迷,只要昏迷了三趟,也就一脚去了。所以啊,有辰光医生个言话还是要听听个,乃末侬讲古龙屏得牢[口伐]啦,管侬医生讲啥,老酒照吃。伊是觉着自家蛮狠个,但身体要拨侬颜色看唻。等我听到伊第三趟昏迷个辰光,就晓得伊搿趟是凶多吉少了。”
倪匡停了一停,我接下去讲:“古龙活辣盖个辰光对一直死亡着迷,搿能介跑,我相信伊是情愿个。”
倪兄也同意我个讲法,伊还加了一句:“三毛也是。”
郑裕玲讲伊听说三毛曾经自杀过好几趟。
倪匡点点头,“是个。古龙跑个辰光只有四十八岁,真是忒可惜了。”
挨下去,倪兄一本正经个脱阿拉讲了一桩古龙死脱以后发生个怪事体:“大家侪晓得古龙欢喜吃老酒,阿拉几个朋友就买了48瓶白兰地,想囥了棺材里拨伊‘带下去’。伊拉屋里人帮伊换好了寿衣,就是埃种伊活辣海辰光宁可赤膊也不会穿个中装,还用块布头拿伊只面孔盖牢了。阿拉商量下来,既然古龙搿能欢喜吃老酒,索介阿拉就陪伊吃[口伐]。乃末,一手一脚拿搿几十瓶白兰地统统开脱了,每瓶意思意思吃个几口。就辣搿个辰光,突然之间----”
“突然之间哪能啦?”阿拉听了紧张煞脱了。
“突然之间,古龙嘴巴里开始大口大口个喷血了伊刚!”
“啊~”
“㑚讲,人死脱介长辰光了,辣灵堂里也摆了多天了,哪能还会得喷血呢?搿明明就是伊呒没死嘛!阿拉要紧寻餐巾纸帮伊揩,勿晓得用脱了多少纸头,我跟三毛侪觉着古龙还活辣海,但殡仪馆个人硬劲要拿棺材板盖起来,伊拉常怕还有啥更加妖怪个事体。我勿肯,一直搿牢只棺材,弄了自家一身个桐油。”
“葛末,结果呢?”
“结果殡仪馆喊了医生过来,医生也证明古龙确实是死脱了。唉,乃末阿拉呒没办法,只好挺伊拉拿盖头盖上去了。”
故事结束,几位在场个女士侪吓了言话也讲勿出了。为了让气氛轻松点,我存心开玩笑个讲:“啥人叫㑚蹲辣古龙面前吃老酒个啦,伊介欢喜酒,又吃勿着,呴也呴煞了,壳张覅吐血唻!”
倪匡兄点点头,连声讲“有道理,有道理”,像真个相信了一样。
用户评论