有人说“春雨贵如油”,但不过对江南人来讲,雨勒春天是最常见弗过个物事哉。
春天头个雨,弗急,细细织织,密密猛猛个。俗话讲“细如牛毫,密如烟织”,说个就是该歇辰光个雨。春天个雨软啦,赛过小娘儿个手拂过面颊,细而酥,绵而润。着生头里望去弗见,细细叫看倒是织满天帘。
所谓“天街小雨润如酥,草色遥看近却无。”讲个就是该场雨,苏州人称之为 蒙松雨。所谓“蒙松”即“迷茫貌”,一片烟水迷离,杏花春雨,也是所有人对江南最初最深个印象。
农历四五月里入梅,天就变得得滋过腻起来,黄梅雨也就应约而来哉。殟塞,懊糟,是苏州人对黄梅天最大个印象。
但不过老法头个文人其实骨仔倒来得个欢喜该只季节,俚笃笔下头个黄梅天是“黄梅时节家家雨”个野趣,是“东边日出西边雨”个情谊,也是“一川烟草,满城风絮,梅子黄时雨”个愁思。
该个老百姓看勒海惹气个 黄梅雨,勒俚笃看来,倒是品茗个佳酿,称“天泉”。文震孟勒《长物志》里就写着说:“秋水为上,梅水次之。秋水白而洌,梅水白而甘。”秋天个雨水泡茶最好,第二等个就是梅水则,外加水质清甜回甘。
不过现在社会个“天泉”是弗能再吃到肚皮里哉,就看看梅水,闲敲棋子,品茗闻香吧。
一到热天,雷阵头霍显起,阵头雨落急急。
该歇辰光个雨,就弗像春雨实梗温柔哉,雨点子大而急,“冷雨沰背心”轧轧实实能觉得着雨个分量。
江南地区个阵头雨里还有一种奇怪个现象 分龙雨。
宋叶梦得《避暑录话》:“吴俗以五月二十日为分龙日。前此夏雨时行,所及必遍。自分龙以后,或及或不及,若有命而分之者。故五六月间,每雷起云簇,而不移时,谓之过云雨。虽二三里亦有不同。”
老法头个人觉着龙能兴云作雨,而勒海农历五月廿号以后,就各领其空,划域而治。就算只搿开一条车辙,两面也有可能晴雨弗同,实勒叫“分龙雨” 亦叫“隔辙雨”。
徐光启《农政全书》里记过一只故事,讲宋朝辰光平江府出过怪事,昆山县水氽,隔壁常熟倒发旱灾:“昆山日日雨,常熟只闻雷。”连到仔丞相也称奇。实勒吴中相传以为古谚“夏雨隔田晴”,亦叫“夏雨分牛脊”或者“龙行熟路”。
明徐光启《农政全书·卷十一·农事·占候·五月》:“或问:‘此处无雨,他处却雨,如何?’老农云:‘晴雨各以本境所致为占候也。幼闻父老言:前宋时,平江府昆山县作水灾,邻县常熟却称旱。上司谓接境一般高下之地,岂有水旱如此相背之理?不准后申。其里人直赴于朝,诉诸史丞相。丞相怪问,亦然。众人因泣下而告曰:昆山日日雨,常熟只闻雷。丞相谓:有此理。悉听所陈’。至今吴中相传以为古谚。又谚云:‘夏雨隔田晴’,又云:‘夏雨分牛脊’,又云:‘龙行熟路’,正此谓也。’”
江南地区个农俗里就以五月二十为“分龙日”,次日有雨即谓之分龙雨。还有” 二十分龙廿一雨,廿二廿三回龙雨“个说法。
秋天该应是天高气清,晴空爽朗个日脚,但不过事到江南,弄得弗巧就亦要搭雨搭界哉。
秋高气爽个反义词勒伲该搭是个常客,秋天里稀稀拉拉落雨,难难得得天好,好好叫一个爽秋落成功仔黄梅天,苏州人称之为 秋拉洒。
五代阎选《河传·秋雨》:秋雨,秋雨,无昼无夜,滴滴霏霏。
雨缠缠绵绵弗肯走,又是凉风暮雨天。有辰光,雨一落就是一日一夜,直脚落成功个“长脚雨”。实梗个天,心情也弗会好,难怪得老法头个诗人,总归是“一片凄声望秋雨”哉。
江南多水,淫雨,江南人对雨总归怀抱仔特殊个感情,生活当中也浸润仔水个品格。
有空到姑苏来看雨。
听友107930821
蛮好,很地道的苏州话,城里口音。
郁金香一一平生不晚
误了青春忘了
上海書蟲
苏州方言优美,文章内容也老有知识性、趣味性。赞!