广播专辑 弄堂茄山胡247 盲人按摩院个奇遇

盲人按摩院个奇遇  
 
阿仁  

　　十几年前头，上海滩一记头嗡出来勿勿少少个盲人按摩店来。按摩推拿勿是由大小姐来、小阿姨来动手动脚，是请来了盲人技师来打工，安全系数倍增。盲人，老上海人称之为瞎子。聋哑人，上海人称之为聋子、哑子。后来为了尊重残疾人，就规范为盲人了。平常大家攀谈，还会讲出瞎子、亮子来。但是到了书面文字就勿作兴沿用老个讲法了。我曾经写过一篇申花球迷中个一位盲人去虹口足球场看球个故事。标语勿敢用瞎子看球了，只许盲人看球。味道虽然缺缺，但是文明礼貌了。搿个也算是一句老话。记得伊个辰光盲人按摩店方兴未艾时，我搭朋友老方半夜时分路过一爿盲人按摩店，老方表示伊要进去放松放松。老方其实是有点醉了。刚从酒水台上撤退下来，伊走路已经歪歪斜斜了。我只好作陪。我是一点点勿欢喜拨人家捏捏弄弄，从来勿进脚摩店。现在只好行一记。为朋友两肋插拳。

　　店堂间里向有按摩床一排。账台上有人安排阿拉平躺下来。出来两位盲人做起生活。盲人师傅年纪都勿大，最多三十也勿到。伊拉都戴好了墨镜，披了医生大褂，一路摸摸索索走到床头。问好了需要推拿个部位就入手按摩。因为年轻，手里劲道大、力道粗。我有点吃勿消。盲人师傅一面动作一面问：“此地痛？”“此地酸？”我连连呼叫：“痛、痛、痛！”“酸、酸、酸！”盲人师傅笑了：“痛就对了！酸就对了！侬老底仔做过重生活，留下毛病了。”我年纪轻时做过八年装卸工，背过大包、扛过大米。看来盲人师傅有点来头。侧过面孔一张，老方已经呼呼入睡。醉了，用榔头也敲勿醒了。后来搭盲人师傅东拉西扯。伊讲伊个残疾家史，我讲我个务农生涯。言谈甚欢。伊拉几位按摩师傅都是从专科学堂里进修过个，如今可以自食其力，令人同情。最后弄醒老方，结账开路。老方掼派头，多买了一个钟点个单，也算有点小小慈善之心。走出老长一段马路，我发觉帽子还忘记勒按摩店。回进店堂时，勿见一人。一侧个小间里有人声响。推门进去，我厥倒。刚才个几位盲人师傅全勿是瞎子，伊拉脱了盲公镜正围勒一起斗地主。“一对！”“顺子！”“炸弹带牌！”个个眼乌子碧碧绿、锃锃亮。假瞎子看见我也勿好意思了，伊拉又变成了哑子了。我也哑脱哉。搿可以算是奇遇吗？上海闲话里骂人有一句：“瞎脱侬眼睛！”放到此地，正好。