当年流行拍毽子
郑菁深
阿拉上海蛮多人回忆起老底子勒辣弄堂里或者学堂里(主要是小学)白相做游戏个名堂交关多,女小囡嘛跳绳、跳橡皮筋,造房子、掼给子(用米放勒一寸左右个方型小布袋里,后来节约粮食就放沙子了)、踢毽子等等;男小囝嘛撑骆驼、官兵捉强盗、打弹子、刮香烟牌子、滚铁圈和扯铃等等,但独独忘记脱邪气盛行个游戏——拍毽子。
拍毽子是男小囝白相个重要项目,手捏(大拇指勒上面,四指勒反面)一块长方型硬柏子,一只用三根鸡毛做个毽子,就可以白相了。不过拍毽子技巧含量绝对高,还要一点点体力,而且花样交关多。据我回忆,动作分拐、厢、雀、压、透、江、坐,乱子格、乱子坐等(勒学堂里举办比赛,因为“乱”字在沪语中读起来像煞勿雅,会误解,先生拿伊改为“毽子格、毽子坐”,迭个是确确实实个)。另外,迭些拍毽子动作当中还要有变化——每一个花样还可以扯进抽出。同样是打“拐”,能够把毽子抄进去,又能捞出来,其他也是迭能操作,蛮有难度个。白相个人不但每一个花样要数量多,还要不断变化才算有本事。比方讲你能拍一套动作,我能拍两套,而且有变化,勒原有花样中扯进抽出,就可以胜出。
勒拍毽子里,要数“毽子格”“毽子坐”难度最高。白相个辰光要动作矫健,眼明手快,否则就会跌跟斗。迭个就是毽子从空中落下来,一腿绕过,拍子勒胯下向上拍,毽子再冲到空中,叫毽子格;“毽子坐”则腿朝相反方向绕过,呒没两记三脚锚勿能成功。
记得我勒读小学辰光,学堂里举行过拍毽子比赛,而且专门列出一个赛项,比“毽子格”和“毽子坐”,看啥人拍得多,姿势漂亮。有一个绰号叫猢狲精(迭个辰光学堂里同学时兴起绰号个陋习,勿作为训)个男同学拍了六十三只“毽子格”,得了第一名。后来伊真个当了体育教师。几十年过去了,不知所踪。假使现在碰着,一定会相视一笑。我因为技巧忒推板,呒没参加,只好作“壁上观”,不过勒辣看台上也“心潮澎湃”,蛮扎劲个。
勿晓得哪能,拍毽子好像突然之间消失了,踢毽子倒有时还看到,甚至勒舞台浪杂技表演,拍毽子的确呒没了。所以啊,很多人回忆小辰光白相个游戏,侪漏脱拍毽子迭个游戏,像煞从来就呒没个,真个有点遗憾。我倒认为拍毽子迭个游戏,可以锻炼男孩子(其实女孩也可以)四肢协调能力,是一项舒筋活络个全身运动,彻底绝迹实在可惜。假使哪一个有心人,挖掘老底子弄堂小人游戏,为上海石库门陈年旧事增色,我倒是愿意提供一眼拍毽子个细枝末叶,因为迭个是上海滩浪独有,别个地方好像是呒没个。我现在讲出来,假使能勾起同时代人个开心回忆,也算值得了。
吾名久璃
这文字稿也没谁了,还好本来就会上海话