广播专辑 弄堂茄山胡342 “万宝全书”考大学

“万宝全书”考大学  
 
阿仁  
 

　　从小就欢喜看书。家父做过报馆里个记者、做过杂志社个编辑，屋里向就是书多，各种各样个书都有。到读高中个辰光，可以讲已经“读万卷书”了。到崇明农场去务农五年，除了伟人个经典著作，就呒没啥个书可以读了。只有《钢铁是怎样炼成的》等几本小说书是可以正大光明读读个。伊个辰光我弄到了一本《新华词典》，如获至宝。从第一个字读到末脚一个字，还认认真真做了几本笔记。几年里通读词典好几遍，搭我一道做装卸工个老兄老弟喊我“万宝全书勿缺角”。调侃调侃其他人，伊拉老开心个。后来上调回城。后来又做装卸工。后来又做技校老师。后来被人家一激，光起火来去报考大学了，是恢复了高考个第一年。四十年前头个故事了。

　　“万宝全书”考大学，一共只复习了半天。临考前一天去寻老同学老印，探探风声，人家温习点啥个。第二天上半天考个是政治。政治课目真是难有入手个地方。其时，伟大领袖逝世才过周年。两个人一合计，考题中必定有关于伟人个试题。马上翻出资料。我有过目勿忘个本事，勿过有效期只有廿四个钟头。到考场领到政治考卷一看，立马安心了。第一重头试题就是“简叙毛泽东同志一生的丰功伟绩”。交卷后回来一查，答得几近完美。第二天下半天考数学，有交关考生弃考。考场里空空荡荡。我是数学老师，运算方程、解析几何真是小菜一碟。当时就抢了个第一个交卷，大长了自家个士气。语文，尤其是作文，我个强项也。同学们两堂课写出一篇作文，我用一堂课个辰光就可以洋洋洒洒写出千把字来。空出一堂课来做做小动作，常常被老师吃牌头。考完语文，我觉得大学个校门可以向我敞开了。

　　最后是历史地理。“万宝全书”发挥出了战斗力。通读地图册也是我个爱好。记得有表述出宝岛台湾地貌、气候与物产个题目。宝岛个地形地貌我画过，伊面个特产我记过。至于考历史更勿在话下。从秦始皇到袁世凯，从唐诗到宋词，从辛亥革命到推翻蒋家王朝，从法国大革命到十月革命一声炮响，里向个事体只要书上有，都看过读过哉。

　　后来我以高分被复旦大学录取，轻松跳过龙门。如果画张漫画，肯定是跃起个鲤鱼背了一大包书。直到现在，去书店翻书、看书、买书一直是我生活中个“连续剧”。“书到用时方恨少”，千真万确。