生日面，请邻居一道来吃
周钰栋
现在小人过生日，家长一般侪是买蛋糕来庆祝，但是辣我小辰光，假使弄堂里有人过生日要操办一下，侪是要吃生日面嗰。
讲起吃生日面，老底子住辣石库门弄堂里或者住辣工人新村里个人回忆起来侪邪气有劲。记得我还住辣老房子里个辰光，碰到弄堂里有人过生日，整条弄堂侪会闹
猛起来。有邻居帮忙安排，也有邻居帮忙凑票证，因为埃歇辰光菜场里个副食品是需要凭票购买嗰。等到需要个材料买齐了，做生日个人家会提前一天拿红烧大排、四喜烤麸、香菇面筋等浇头先烧好，到第二天中浪
向长寿面出锅，搿点浇头就好派上用场。
而且送面、吃面个场面阿蛮有讲究个。先是由来帮忙个热心邻居从弄堂口开始，一家家送过去，一直送到弄堂底，接下来再送自家楼里向个邻居，请大家一道来吃生日面，基本勿会遗漏。收到生日面个人家，除脱会对来客讲几句祝福语，还会送两只鸡蛋作回礼。
送面结束，接下来就是吃面了，搿个辰光一家人向寿星祝福个场面自然是少勿脱个。假使过生日个是老人，葛末桌头浪向“健康、幸福、长命百岁”是主题。假使过生日个是小囡，葛末除脱“平安、健康”之外，就是五花八门个期望了，一般就是“成龙成凤”唱主角。
正当一家门坐辣一道边吃边聊，其乐融融时，一些邻居就陆续拿汏清爽个碗送回来了。之后勿少人就留下来轧闹猛，有些邻居还会翻出一些有关寿星个逸闻趣事，讲得大家哈哈笑……过生日，请邻居一道来吃面是弄堂生活个一道风景。
用户评论