甲：诶。
乙：侬哪能唉声叹气？
甲：搿桩事体还是上礼拜日个事体，怨气冲天。
乙：为点啥事体了？
甲：我告诉侬听哦。上礼拜日我吃完早饭，我预备到公园里去白相相。勿晓得刚刚走出弄堂，被交关红领巾畀围牢了。咦，啊，拿我教训一顿。
乙：搿为点啥事体了？
甲：是呀，开头辰光我也勿晓得为仔啥事体，那当中有一个红领巾传过来一张条子，我一看写了几个字。
乙：写了啥个物事？
甲：同志，请勿随地吐痰。
乙：哦，侬辣马路浪向吐痰，搿当然人家要教训侬了，随地吐痰是桩坏习惯呀。伊不仅要破坏马路浪向个清洁，而且好散播肺道菌。
甲：喂喂喂，好了好了好了，侬迭一套闲话我听得勿要听了，听得多了。
乙：搿么侬听得多啥体要迭能做呢？
甲：迭个，搿么是呀，迭个是交关年数下来个老习惯了，一下子哪能改得脱呢。
乙：搿为啥道理一定要吐到马路浪去呢？
甲：搿啥个闲话我一定要吐到马路浪，齐巧跑到马路浪我喉咙痒了要吐痰，搿迭个有啥办法呢。好了等到我看仔迭张条子，我闷声勿响跑。勿晓得走仔几步喉咙又痒了，有要吐痰了，我一看四面没人，我到墙角落去吐了，刚刚泼吐好畀了一个小人看见，哦牢伊追上来了。
乙：搿么哪能勿要追上来呢，侬痰吐了墙角落还勿来事啊？
甲：哪能？
乙：假使痰里有病菌闲话，迭个病菌辣辣阴暗个地方脱仔阳光底下，伊活个辰光要活得长了。诶，迭能仔个痰危害性是更加大。
甲：喂，好了好了好了，照侬迭能讲起来一个人走辣马路向还要带只痰盂罐了。
乙：搿也从来没有看见过带两只痰盂罐。
甲：搿照侬讲个了。
乙：可以吐了绢头里，或者吐了香烟盒子里。
甲：吐了绢头里，搿忒讨厌了。再讲绢头蛮干净个，吐仔一沰痰搿几化龌龊了，侬来脱我汏。
乙：啥道理我要脱侬汏。
甲：就是迭能讲呀，再讲了现在绢头啥地方去买呢？
乙：绢头没吗，侬好吐了餐巾纸浪。
甲：刚啥我要脱小囡讲闲话个辰光，一个人民警察跑过来了。我一看警察来了苗头勿对，我马上走了，我自己认错，别转屁股就跑，总算畀我冲出重围。
乙：侬是辣打仗是�？
甲：等到跑到电车站，齐巧一部电车开过来，等到门一开我蹦上去。等到我串上去一个卖票员过来了。
乙：叫侬来卖票个。
甲：勿是呀，同志请勿随地吐痰。
乙：啥侬到电车浪去吐啊？
甲：侬勿能怪我个。
乙：勿能怪侬怪我了。
甲：啥人关照电车浪勿摆只痰盂罐。
乙：没听见过电车浪摆痰盂罐个，像啥样子。
甲：好好，我接受我接受。
乙：侬倒有眼勿服气个。
甲：我接受那好了。勿晓得电车到仔一个站头听下来，下头串上来一个人，迭个人面孔涨得血红，气得勿的了，外加哼得勿得了，跑到我门前拿我扎得一把拉牢。
乙：又出啥个事体？
甲：我对迭个人一看我也觉着好笑。
乙：人家气得迭能样子侬也好笑。
甲：诶，侬勿晓得个了，迭个人面孔浪有一一沰痰。
乙：啊？
甲：是刚刚畀我吐着个。
乙：咦咦咦，哪能吐了面孔浪。
甲：搿我哪能晓得呢，搿又没介巧个啦。我齐巧痰吐出来，伊齐巧跑过来。
乙：搿哪能勿要教训侬了
甲：好了好了我认错总好了。假使一个人讲我两句勿要去管伊，一电车个人侪讲我勿好呀，搿侬辣想，伊拉简直是辣帮凶。
乙：哪能讲的出帮凶呢，讲究卫生人人有责任批评侬个。
甲：没关系，没关系，君子勿跟小人斗气。
乙：侬还是君子了？
甲：我准定下车。
乙：侬迭个是啥个行为。
甲：等到我下仔车跑进公园，我齐巧走到荷花池旁边，跑过来一个公园里个服务员，伊讲同志……
乙：请勿随地吐痰。
甲：叶，侬哪能晓得？
乙：我晓得侬，侬又是老毛病呀，我倒弄勿懂，侬到荷花池里吐痰。
甲：我吐痰吐辣荷花池里没关系个。
乙：咦，哪能来事呢，介干净个荷花池，侬当伊垃圾桶啊。
甲：侬勿去讲伊，迭个服务员个态度侠气生硬，讲仔一大通，讲我啥个勿讲公共卫生，勿讲社会道德，妨碍人家身体健康啊，哪能哪能，一口小小叫个痰也没介严重个呀，简直是小题大做。
乙：搿哪能叫小题大做呢，搿痰里有肺道菌，假使吐仔下来一干，随之灰尘飞到天空，没毛病个呼吸进去要生仔肺病。
甲：喂喂喂喂喂，侬啥个路道，今朝碰着我横也肺道菌，竖也肺道菌，我生肺病了，我身体交关结棍了。
乙：侬肺部正常，慢慢叫也有病菌个。
甲：好了好了好了好了，我勿脱侬讲顶凶了，㑚迭种人一眼也没同情心。
乙：诶，是呀，应当同情侬。
甲：好了，㑚埋怨我没关系，公园里勿白相那好了，转去，那总没闲话了。等到回到屋里，一看，台子浪放张条子。一张条子小王写畀我个。
乙：小王是啥人呀？
甲：小王吗，迭个讲也讲搭勿出，难为情。
乙：咦，啥体了，讲出来好了。
甲：是我个未婚妻，伲两家头齐巧辣辣贪恋爱。
乙：大大方方好了，信浪写点啥个物事了？
甲：一张条子写辣辣，亲爱的，今天晚上下班，我已买到两张周星驰个电影票，请侬辣辣八点四十分辣新华电影院门口相会。哎呀，我一听见迭个消息我开心得来勿得了，连饭都勿吃。
乙：就去了？
甲：咦，也没介要紧勿煞。哎呀，我连搭饭勿吃，我勿要打扮打扮。一方面我马上倒揩面水，揩好仔面，拓好雪花粉，一方面马上梳头，头势要清爽。梳好仔头我换上一套赤刮辣新个西装，外加淡颜色个西装。
乙：搿倒漂亮个。
甲：漂亮�。我吗衣裳换好要倒脱揩面水，勿晓得跑过去，只听见，刺啦，啪啦，嘣，破。
乙：侬辣放炮仗？
甲：我滑辣地浪向。
乙：咦，哪能会得滑辣地浪向？
甲：搿一趟完结了，那完结了，一碰龌龊水侪倒了我一套赤刮辣新个西装浪。
乙：哦，大概地板忒滑了。
甲：勿是个辣，我揩面个辰光吐仔交关个痰，一只脚踏辣痰浪，碰，滑出去，扑隆咚一跤。
乙：搿是好个，是应该个。
甲：诶。
用户评论