甲：今年是一九八二年，一九八二年是壬戌年。
乙：壬戌年，啥叫壬戌年？
甲：壬戌年就是养出来属狗个。
乙：哦，今年养出来属狗个。
甲：养出来属狗个。
乙：今年属狗个。
甲：我哪能熟悉呢，因为我是一九二二年养个，今年是一九八二年，齐巧六十年，六十年一个甲子，六十年风水轮流转，我齐巧六十年，今年养下来个小宝宝也是属狗个，我呢，我也是属狗个。
乙：哦，原来侬也是狗。
甲：迭哪能是狗呢，我是老宝宝，我勿是狗，属狗。
乙：今年养下来属狗，开年属啥？
甲：开年属猪猡。
乙：所以今年养下来属狗个，属狗个小朋友养下来开年属猪猡了，再后年仔呢？
甲：迭个小朋友猪猡勿属了，属老鼠，老鼠属下来属牛，哪能每年属一趟，勿调个。
乙：勿调个？
甲：勿调个，侬迭个勿懂个。
乙：我勿懂个，我好好叫懂个，勿懂？
甲：十二月生肖是子鼠、丑牛、寅虎、卯兔、辰龙、巳蛇、午马、未羊、申猴、酉鸡、戌狗、亥猪，十二样生肖。
乙：侬哪能介懂啊，侬从前做过算命先生啊？
甲：我做过……侬勿要搞呀，我现在脱侬比赛比赛好�？
乙：哪能比赛？
甲：每人讲一样生肖，十二样生肖分开，每人讲六样，好�？
乙：那么哪能讲法呢？
甲：每人一样生肖讲一句成语。
乙：哦，讲一句成语，成语我肚皮里忒多了。
甲：侬来事�？
乙：我来事�，我哪能勿来事呢，笃定，我勿会输脱个。
甲：头一个是老鼠就鼠了。
乙：老鼠，侬讲好了，啥个成语？
甲：我来讲是胆小如鼠。
乙：啥解释？
甲：就是讲我伲随便做啥事体认为好个，一往直前，勿胆子小来兮个，像老鼠一样，胆小如鼠。
乙：哦，老鼠挨下来是啥物事呢？
甲：牛。
乙：牛，讲下去，牛，啥物事，啥成语？
甲：牛哪能又挨着我了，侬呀。
乙：挨着我了。
甲：挨着侬了。
乙：我讲啥，老鼠啊，胆小如鼠。
甲：胆小如鼠我讲过了。
乙：哦，侬讲过了。
甲：侬讲牛呀。
乙：牛。
甲：牛。
乙：牛。
甲：牛。
乙：牛。
甲：多牛牛啥物事啊？
乙：牛个成语，纽子纽襻。
甲：纽子纽襻，哪能纽子纽襻，纽子纽襻哪能是成语呢？
乙：纽子纽襻哪能勿是成语呢，大家侪有个纽子纽襻，有了纽襻没纽子来事�？
甲：勿来事。
乙：有了纽子没纽襻来事�，迭个就像我脱侬两家头搭档一样个，等于纽子纽襻，有侬没我勿来事个，有我没侬阿勿来事个。
甲：迭个物事成语呀？
乙：纽子纽襻哪能勿是成语啊，侪晓得个，人家侪懂个。
甲：应当是气大如牛，力大如牛啊，纽子纽襻弄出来了。
乙：对对勿了。
甲：纽子纽襻，外加两个纽了。
乙：比侬好了，侬胆小如鼠一只鼠，我纽子纽襻两只纽。
甲：勿是迭个纽，随便了，连下来是老虎。
乙：老虎啥个成语？
甲：我来讲。
乙：侬讲。
甲：如虎添翼。
乙：啥解释？
甲：比方讲独脚戏两个人一搭一档，一个上手说学做唱件件皆能，再配上一个好个下手帮助伊，衬托伊，能够如虎添翼。
乙：有道理。
甲：老虎生仔翼稍了。
乙：有道理。
甲：下来是兔子。
乙：兔子，兔子，我做了，是�？
甲：唉。
乙：兔子，兔子个成语，大白兔。
甲：哪能有得大白兔个了？
乙：我问侬啥叫啥成语，成语就是成功一句闲话，大家侪懂，对�，大白兔侪懂个，用勿着多解释得个，侬到食品店，同志我要买两斤大白兔，好了，马上称畀我，好勿要解释个。
甲：迭个是糖呀。
乙：勿要讲糖得个。
甲：大白兔勿是成语。
乙：搿么我要讨教侬了，啥叫啥成语？
甲：成语就是历史典故总结成个语言叫成语，成语一般是四个字个。
乙：有三个字个成语�？
甲：有个。
乙：那好了。侬要四个字加一个字，大白兔糖，五个字也可以吃大白兔糖，六个字，来吃大白兔糖，七个字，大家来吃大白兔，八个字……
甲：好了，讲三百六十个字也好讲，我们今朝一起来，到糖果店。
乙：兔子，大白兔。
甲：兔子，侬应该讲守株待兔，动如脱兔，狡兔三窟，侬讲大白兔。
乙：啥动如脱兔，啥守株待兔啊，拿手节头弹兔子，吃得消啊。
甲：好了，好了，侬样样勿懂，样样勿懂。
乙：勿懂，笃定，我勿会输脱个，大家比赛。
甲：连下来一条龙。
乙：龙，啥个成语？
甲：龙腾虎跃。
乙：啥个解释？
甲：全国评比出来十大优秀运动员，各个侪是龙腾虎跃。
乙：有意思，龙。
甲：挨下来蛇。
乙：蛇，蛇，让我查查看，蛇。
甲：勿是迭个查呀。
乙：蛇没成语，我查来查去查勿着。
甲：有个。
乙：没个。
甲：有个，打草惊蛇，虎头蛇尾，画蛇添足，蛇交关了。
乙：对对对对，画蛇添足，我讲画蛇添足。
甲：迭个是我讲个呀。
乙：是侬讲个，我齐巧要讲了，畀侬碰插过去，侬闲话插了介快啥体。
甲：搿么画蛇添足啥解释呢？
乙：成语啊，画蛇添足解释就是成语，对�？
甲：啥个意思呢？
乙：啥个意思呢，画蛇添足了，画蛇添足就是，夏蛇就是一条夏天个蛇，自己辣舔自己个脚。
甲：哦，一条蛇自己辣舔自己，蛇没脚个呀。
乙：哪能没脚了。
甲：啥个蛇？
乙：四脚蛇，勿是有脚个。
甲：搿条蛇啥体要舔脚了？
乙：脚痒。
甲：好了，好了，好了，到此刹车。
乙：讲下去，挨着侬了。
甲：讲马了，马多了。
乙：多了，讲得好，讲得勿好要畀人家骂个。
甲：马不停蹄，一马当先，万马奔腾，悬崖勒马，马忒多了。
乙：忒多了，连下来啥物事？
甲：马下来是羊。
乙：羊，羊。
甲：伊勿来事了。
乙：笃定，我勿会输脱个，羊，羊。
甲：辣辣浑身发痒。
乙：对了，成语，浑身发痒。
甲：勿是个，痒勿是迭个羊。
乙：晓得个，羊，养一个好。
甲：勿是个，勿对个。
乙：养一个好勿对啊，侬讲现在养一个勿好，啥人讲勿对，国务院规定个，养一个好处多了，利国家，利人民，父母也放心。
甲：成语，侬重养过。
乙：还重养，重养，坚决勿养，只养一个，我吃勿消了，我破坏计划生育。
甲：好好，侬就养。下来猢狲。
乙：猢狲，啥成语？
甲：猢狲勿大有个。
乙：勿来事个，到底侬勿来事了。
甲：侬来事个？
乙：哪能勿来事啊，笃定。
甲：有了，杀鸡儆猴。
乙：啥解释？
甲：猢狲刚刚捉来个辰光皮勿过了，伊勿听闲话。
乙：勿听闲话，乃好叫听闲话啊，啥体勿听闲话啊？
甲：乃我变猢狲了，猢狲勿听闲话，马上捉只鸡来，当仔猢狲拿只鸡杀脱，一只鸡杀脱猢狲吓了。
乙：我晓得个，迭个是杀只鸡畀猢狲看看，杀鸡儆猴，连下来啥物事？
甲：连下来一只鸡。
乙：挨着我了，我勿讲了。
甲：侬输脱了。
乙：我输脱了，我勿要讲了，讲啥物事讲呀。
甲：鸡哪能勿讲呢？
乙：勿讲可以�，一只鸡畀侬杀脱了，杀鸡儆猴，一只鸡杀脱了还叫我讲，连下来啥物事？
甲：狗。
乙：狗，侬讲，狗啥物事啊，来事�？
甲：狗急跳墙。
乙：狗急跳墙，对个。
甲：连下来猪猡。
乙：猪猡，猪猡，猪猡。
甲：要猪猡。
乙：成语，要四个头字，猪猡，叫嘴五舌六。
甲：哪能叫嘴五舌六呢？
乙：成语啊。
甲：哪能迭个算成语啊？
乙：哪能勿是成语啊？
甲：嘴五舌六是解释呢？
乙：嘴五舌六，猪就是猪头肉五角洋钿一斤。
甲：舌六呢？
乙：舌头倒要六角了。
甲：猪头肉五角，猪舌头六角，嘴五舌六。
乙：苏州人讲个。
甲：哪能舌头贵点呢？
乙：因为舌头好吃，舌头灵个，舌头贵。
甲：我碰到侬实头霉个。
用户评论