甲:两旁个花篮使得我非常激动。
乙:交关难为情。
甲:乃当中有一只花篮我特别个激动。
乙:阿里一只花篮啊?
甲:前两日有一个青年送到我伲剧团来个,剧团门房间勿畀伊进来。
乙:是�,啥体,岂有此理。
甲:拦牢伊,还赶伊出去。
乙:哪能有搿种事体个?
甲:后来听见迭个青年工作勿好。
乙:工作哪能勿好,啥工作?
甲:迭个青年是火葬场里工作个。
乙:啊?
甲:门房间拦牢伊勿但勿畀伊进来,还问伊,侬迭只花篮浪个花啥地方来个。
乙:总勿见得花圈浪拔出来个了。
甲:侬一朵一朵鲜花阿派过用场�?迭个辰光我齐巧经过,青年看见我眼泪水淌淌点,赛过看见亲爷娘一样。
乙:哪能勿要哭呢。
甲:迭个青年讲周老师啊,我屋里从老爹开始一共三代,我一直是㑚姚周个老观众。迭个辰光我倒眼泪水洗下来了,我就辣想迭个殡葬工作啥个浪勿好。
乙:就是嘛。
甲:一个人最后一道工序一定要经过殡葬工人,没殡葬工人解决,马路浪向乱厾乱掼,像香烟屁股能介,为仔迭个事体,我特特地地到龙华殡仪馆去体验生活,我连夜搞出迭一只今朝表演,一定要歌颂殡葬工人,同志们,我认为迭个工作比工程师,比设计师没啥个轻微。
乙:我伲一定要为伊拉鸣不平,为点啥看伊拉勿起。
甲:有两个蛮噱个,殡仪馆里有人认得个,等仔屋里向死仔人下来脱迭个火葬场里个要帮忙,要烧得透一眼。
乙:啥体?
甲:要办事体办得清爽点,要头一炉烧,勿要脱其它骨灰混进去。
乙:喂,当伊红烩牛肉了。
甲:到仔殡仪馆电话去,对方接也勿接,睬也勿睬。我采访下来,我今朝脱大家讲一讲,有一位蛮普通个青年,殡葬工人,姓张,叫小张,伊头一日上班就高高兴兴。
乙:当然了。
甲:一眼没啥封建迷信。
乙:想得开。
甲:头一日上班就吃着两记耳光。
乙:喂喂喂,啥体啊,大家得罪了殡葬人家了。
甲:一眼也没得罪,满面笑容,笑容可掬,面孔一只辣笑。丧事人家勿理解了,伲屋里死人侬介开心啊,侬迭个勿是幸灾乐祸啊,“啪”。
乙:搿记耳光冤枉个。
甲:当时间小张人呆一呆啊。
乙:就是哇。
甲:要想回手。
乙:勿来事个。
甲:想到领导浪向再三教导伊,人家屋里死仔人下来应该同情。
乙:搿么第二记耳光哪呢?
甲:第二记录耳光人家丧事人家办好走到门口,还跟人家讲走好,再会再会,有空请过来。
乙:哪能好再会再会,用空请过来呢,迭个真真是……
甲:搿脱两个号头下来,小张比较熟悉点了。有一趟挨着仔小张辣办公室里值夜班。
甲:有一趟挨着小张辣办公室里值夜班。
乙:啊,火葬场值夜班?搿到有眼汗毛泠泠。
甲:开始到还好,到十一点敲过有点吓丝丝。
乙:吓着。
甲:只听见外头“呜——呜——”起风了,一盏路灯摇摇晃晃一明一暗。
乙:喔唷,喔唷。
甲:草地里向油葫芦“嘘虑虑,嘘虑虑”。
乙:迭个是鬼叫呀。
甲:越是吓,越是对外头看呀。一看勿对了,只看见远远叫有一个人,伊勿像人,“蹦蹦蹦”伊拉跳过来。
乙:跳了,迭个是僵尸鬼出现了。
甲:仔细一看面孔雪雪白了。
乙:啊呀,白毛僵尸啊,啊呀哪能弄法呢,快点后门逃,后门逃。
甲:后门逃,伊拉没后门个了。
乙:马上前门一开冲出去。
甲:冲出去迭个老大来了呀。
乙:乃么要死了。
甲:说是迟那时快,只听见门球声音“咯啦啦,咯啦啦”。
乙:啊,鬼辣开门了。
甲:等到跑进来还开口了,小毛头,小毛头,小毛头,我是侬阿爸呀,阿爸来了,啥体了?
乙:喔唷,阿爸啊,喔唷,我要叫侬祖宗了,侬也没个呀,半夜三更到火葬场来啥体?
甲:啊呀,外头起风了,我怕侬冷,我送件羊毛衫来个。
乙:啊呀,迭个用勿着个,我问侬,侬走路为啥“蹦蹦蹦”跳啊?
甲:㑚辣施工,辣修路,我勿当心畀了钻头绊一绊,跌一跤,脚翘了翘,“蹦蹦蹦”跳过来来。
乙:侬面孔哪能,夹䩍似白,雪雪白呢?
甲:夹䩍似白,我一跤跌了石灰缸里。
乙:好极。
甲:搿脱仔腔下来,小张分配到接尸组里工作。
乙:好个,接尸组好个。
甲:勿容易个。
乙:独立王国,没人提意见了。
甲:勿简单个,首先要问好迭个路是啥个路,几弄几号,还是走前门,还是走后门,还是二层楼,还是三层楼。
乙:喂喂喂,啥体,也没搞得来介繁琐个,调查户口啊?
甲:勿是呀,要问请爽,跑进去冒冒失失,喂,死人辣啥地方,阿拉来车死人来个。
乙:喔唷,迭个吃勿消个。
甲:有一趟小张苦头吃足了,齐巧是高层建筑十三层楼一家人家。
乙:勿要紧个,横竖有得电梯上下个。
甲:啊呀有电梯,上去有电梯呀,等仔背仔死人下来,电梯没了。
乙:迭个勿可能个,有上去板有下来个。
甲:下头开电梯个小姑娘电梯勿开上来了。
乙:为啥?
甲:小姑娘吓个呀。
乙:哦,对对对,搿哪能弄法,对了,横竖有得担架个,开汽车个司机一道抬下来。
甲:司机齐巧勿舒逸。等小张从上头背下来,一直背大搜车子里向,小张自己也昏倒了。
乙:要命啊,迭个是吃力了呀。
甲:巧么也巧勿过,作孽了,死人身浪一块白布头,一日仔齐巧台风,台风一吹,一块白布头吹到嚣张张身浪向。
乙:小张身浪哪能呢?
甲:开到火葬场下来,抬死人个火化组死人勿抬,抬仔小张就走。
乙:迭个小张是死人还是活人啊,也没个,死人身浪一块白布吹辣伊身浪,伊自己勿晓得啊?
甲:昏倒了呀。后来领导拿小张分配到化妆组里工作。
乙:喔唷,化妆组赞个呀,我化妆仔五十年了,我门槛蛮精个,蛮有经验个,脱小张讲讲,帮忙介绍介绍,假使人手勿过,我去划转脱两个,让我赚眼外快吗。
甲:迭个化妆勿容易个,勿是脱活人化,是脱死人化。
乙:脱死人化更加便当了,脱活人化要牵法牵法,死人化妆横竖滥脱八脱。
甲:伊拉碰到工伤事故、交通事故,有种面孔浪个零件侪散开来,侪要一样一样拼起来,外加还要拿针一阵一针缝起来。
乙:侬当伊培罗蒙西装店了。
甲:外加眼光要好,里向有一个眼光深度近视眼个,伊化妆个辰光几乎自己个面孔要脱死人面孔碰着个了。我想着了侬眼光蛮好个,侬倒是好去,我介绍侬去。
乙:侬看看我表面浪眼光蛮好个,实际浪我眼睛一塌糊涂,我一只白内障,一只青光眼,视网膜剥离,眼底神经萎缩,常庄有就两只金苍蝇飞来飞去,眼科医生讲我左面只眼睛已经瞎脱了,马上就要脱我挖脱伊了。
甲:搿么侬要脱医生讲个,还有只眼睛也挖挖脱拉倒了。
乙:啥体了?
甲:侬想伊拉工作艰巨�?
乙:非但艰巨,而且我觉着非常光荣。
甲:光荣是光荣个,小张是全国劳动模范,而且五一劳动像章获得者。
乙:好个呀。
甲:人又是一米八十生得漂亮,到三十六岁现在还没女朋友。
乙:请伊拉亲眷朋友介绍介绍。
甲:是介绍个,介绍交关了,对方听见是火葬场里工作个马上bye bye。
乙:喔唷,迭能样子小张一生一世没女朋友了?
甲:后来来,有个亲眷帮伊介绍一个。
乙:好个。
甲:暂时拿小张工作瞒起来。
乙:瞒起来?
甲:介绍迭个女朋友,姓李叫小李,人生得漂亮,而其是个业余歌唱演员。
乙:是歌唱演员好个。
甲:两家头轧仔四个多月朋友,预备要结婚快了。
乙:好个。
甲:就是还没讲出来。
乙:阿是还没讲明白,好极了,迭个瞒勿过个呀,讲来板要穿帮个,一只定时炸弹。
甲:有一日伊拉约好辣辣复兴公园假山石后头碰头,等到碰头之后还是小李先开口,小张。
乙:小李。
甲:我脱侬认得仔几化日脚了?
乙:一百三十六日半。
甲:侬有啥想法�?
乙:想法有个,我无论辣工作浪,学习浪,吃饭个辰光侪想侬个,连夜到睏觉做梦也想着侬,小李,侬阿想我�?
甲:当我想你的时候我的心在颤抖,当我想你的时候才知道寂寞是什么。
乙:小李,我忒幸福了,谢谢侬,非常感谢。
甲:小张,侬还有啥闲话没告诉我�?
乙:我侪告诉侬啊,我瞒侬啥过了,有种事体阿拉爷娘也勿晓得,只有侬晓得。
甲:侬到底做啥工作个?
乙:啥个工作,我迭个工作是迭能个,因为我单位远勿过,生怕侬来望我走来走去衰瘏,搿咯我瞒脱侬个,侬以后真个要来,我地址告诉侬,侬只要记牢,伲单位里有只大烟囱个。
甲:哦,是炼钢厂,蛮好,蛮好,钢铁对国家,对每个人侪需要个。
乙:需要,每个人当然侪需要个,就是日脚短点了长点。
甲:蛮好,蛮好。
乙:阿拉还着白衣裳了。
甲:原来是白衣战士。蛮好,蛮好,救死扶伤,起死回生。
乙:起死回生也谈勿到个,到伲搿得来个已经看勿好了。
甲:疑难杂症,搿是还要好了,搿是更加有意义了。
乙:意义是瞒有意义个,阿拉还要脱伊拉化妆了。
甲:哦,是美容师,慢慢叫我做新娘子我要侬化。
乙:啊,要我化,我勿脱侬化,我绝对勿脱侬化个,阿拉显龙活跳一个人勿化个,阿拉化个老早动也勿会动,气也没个。
甲:侬勿要讲。迭个辰光两个人相对默默无言,只听见“呜呜呜呜”,路灯是一暗一明摇摇晃晃,只听见草地里 “嘘虑虑,嘘虑虑”。
乙:哪能油葫芦又来了。
甲:迭个辰光小李思想斗争,要想回断小张有眼勿舍得,仔细想想迭个工作啥个勿好,要是没有殡葬工人,全上海人怎么办,要是没有殡葬工人,全中国怎么办。
乙:迭个辰光小张“嘭”立起来,伊也阿辣辣思想斗争,想想勿对。小李,我勿应该瞒侬,我勿怪侬,勿决计勿怪侬,怪来怪去怪我自己,为啥我每日上班要乘43路,到仔迭个地方往仔大烟囱跑进去。小李,我交关对侬勿起,再会,祝侬幸福。
甲:慢,让我再看你一眼,看你那流满泪水的脸,让我再看你一眼,我要把你记在心间。
乙:小李,侬没嫌比我啊,谢谢,谢谢,我们的春天,春天是我们的,小李,谢谢侬。
甲:去,手去汏汏伊,刚刚摸摸死人现在来摸我。
乙:马上去汏,马上去,小李,我一定听侬个,侬叫我做啥我就做啥,侬喊我哪能我就哪能,绝对服从,小李。
甲:好歌,侬唱只歌畀我听听。
乙:我唱勿来个呀。
甲:侬自己讲个,我要侬做啥侬就做啥。
乙:我只会唱一只了。
甲:就一只好了。
乙:23212,32165,22222765,6153哐。
用户评论