一年一度个七月初七亦过脱则，今年亦孛相出仔新个花样经：癞团搭仔布谷鸟。
搭小朋友点只癞团：孤寡孤寡叫，反向魔法是布谷鸟：不孤不孤，解除诅咒。
看勒海倒真个蛮闹猛，但不过像煞大家对该个节日侪有点啥个误解勒海。
首先是读音，问十个九个摇头一个读错，苏州闲话里个七夕，真个难倒仔一大片人。
七希？吃一？七夕！
作兴是因为夕该个字勒方言里弗常见仔勒吧，弗用就忘记脱则。
《广韵》，夕，祥易切，席小韵，入声。
实勒，正确个读音应该是ziq8，夕阳、七夕、秋夕，侪是夕。
再一个是节日个含义。
现在像煞全世界侪勒拿七夕当情人节来过，弗晓得是啥个原因，作兴是拨古代搿点浪漫主义诗人误导则？
“迢迢牵牛星，皎皎河汉女……盈盈一水间，脉脉不得语。”
“金风玉露一相逢，便胜却人间无数……两情若是长久时，又岂在朝朝暮暮！”
但不过浪漫主义弗代表轧朋友呀，诗人大多歌颂个确实是牛郎织女葛爱情。不过实梗一只家喻户晓个爱情故事，俚是个悲剧啊！BE啊！
外婆看见仔年年侪要说死话个，“啥人轧朋友一年只碰一趟头个，该个日脚还能过啦？”
隔河向望，鹊桥相会确实浪漫，但不过放到轧朋友个两家头身浪就有点残酷则，实梗个“情人节”阿有点弗吉利啊。
其实骨仔，七夕本生就弗是“情人节”。勒中国的传统文化里，更加多个，可以看作是“女儿节”，女小娘儿过个节。
老法头碰着七夕，苏州个小娘儿要登勒园子里放只供桌，焚香点烛，礼拜双星，向天乞巧。
所谓乞巧，就是搭天老爷许愿，能得一双巧手。常见个有两种乞巧方式，一是浮针乞巧，一是喜蛛乞巧。
所谓浮针乞巧，就是拿井水搭河水混勒一淘，放勒太阳头底下晒，水面浪会结出一层衣。到仔夜里拜月个辰光，小娘儿拿针厾勒水里看针影。针影像云龙花草，就是得巧之兆，针影像棒槌，乃末就完结则。
所谓喜蛛乞巧，就是拿喜蛛放勒水果供品浪，或者采仔荷叶放勒竹头浪，第二日天看看阿有结蛛罗网。因为结蛛结网有点像织女织布啦，实勒有蛛丝就是好兆头。
要漂亮个小娘儿还会得拿秋季新开个凤仙花染节掐子，着得漂漂亮亮来拜月。
该个，再是七夕个正确打开方式。
而真正的中国情人节，其实骨仔是元宵。所谓“月上柳梢头，人约黄昏后”“众里寻他千百度，蓦然回首，那人却在灯火阑珊处。”侪是元夕假日啊。
当然啦，对弗少人来讲，传统节日个意蕴内涵并弗重要，只不过是想借个阴头，吃饭看电影讨礼物轧朋友而已。
搿末倷，是捺亨过个呢？
用户评论