没有毫不费力就能学会的东西

最近我同学生上课，

偶然倾到一个话题，

乜嘢好容易学识呢？

我问佢踩单车容唔容易学啊？

学生话对细路嚟讲唔容易，

我问佢整寿司容唔容易学啊？

佢话唔容易。

咁中文容唔容易学啊？

佢都话唔容易。

咁乜嘢容易学啊？

学生笑咗，

边有嘢容易学喔，

如果容易学就唔使学啦。

我忽然之间有一种强烈嘅感受，

系喔，如果好容易，

仲边使学喔。

我哋嘅身边，

成日都有啲书话三十日教你学识XXX，

仲有XXX速成，

其实边有速成嘅方法喔。

如果真系速成，

其实就系学咗啲皮毛。

真正要学识一样嘢，

要学到比较高嘅水平，

肯定系需要付出好多时间同精力嘅。

如果一个人又唔想努力，

又想学嘢，

咁佢完全就可以选择放弃啦，

咪徙时间。

我觉得冇速成嘅方法学嘢，

但系有正确嘅方法学嘢。

我觉得所谓嘅速成就系教你用正确嘅方法学嘢，

但系市面上好多书所谓嘅速成，

就系将知识复制粘贴，

根本就冇教你去学，

就好似俾一大堆材料你，

但系又冇俾个菜谱俾你，

等你自己自由发挥。

煮过饭嘅人都知，

水平低嘅人唔跟菜谱煮饭，

煮出嚟嘅嘢简直就入唔到口。

如果一个人冇语言学习经验，

就随便揾一本书嚟学，

其实好快就会进入从入门到放弃嘅死循环。

如果你准备学语言，

一定要做好终身学习嘅准备。

如果你谂住可以喺短短几个月之内就掌握一门语言，

我会劝你放弃。

除非你有语言天赋同学语言嘅经验。

有科学研究表明，

要掌握同母语非常相似嘅语言，

至少需要575到600个钟头，

如果你每日学4个钟头，

咁你差唔多要学五个月。

绝大部分人都唔会每日用四个钟头学广东话，

我估计每日可以学一个钟头，

坚持不懈咁学都要学一年半。

所以如果你准备学语言，

咁就要准备好至少要学两年，

而且如果你睇到XX速成，

你千奇唔好即刻就买，

你肯定会失望，

我最近发现学嘢，

你越系想速成，

就越系学得唔好。

反而如果你愿意俾多啲耐心，

愿意慢慢学，

你反而会慢慢进步。

宜家嘅人都好浮躁，

乜嘢都想快，

做乜嘢都想快人一步，

但系乜嘢都快，

一啲弯路都唔愿意走。

其实人生唔系比赛，

学嘢都唔系比赛，

我宜家越嚟越明白，

人生其实系一个人嘅长跑，

只要你冇放弃，

咁你就唔会输。

你有冇跑过长跑？

长跑最忌开头跑得太快，

因为咁样好容易耗尽体力，

通常跑长跑嘅人都唔会喺开头跑得太快，

佢哋会慢慢令身体适应，

然后用匀速跑好长好长一段时间，

剩低最后一圈，

或者最后两圈佢哋先会用尽全力冲刺。

其实通常长跑犀利嘅人到最后都冇乜嘢对手，

因为好多人都已经喺中途耗尽体力，

好多人最后都唔系跑到终点，

佢哋都系行到终点嘅。

学语言都系咁样，

一开始好多人都好兴奋，

好俾心机学，

觉得自己应该会喺一个月到两个月之内学好，

但系好快佢哋嘅学习计划就会因为各种原因打乱晒，

而且喺学习嘅过程中，

遇到各种各样嘅困难，

慢慢咁就开始有人选择放弃，

从每日学习降低到一个星期学一次，

后来一个月都学唔到一次，

到最后不了了之。

佢哋低估咗学语言嘅困难，

所以随便就放弃咗。

学语言嗰时真系唔怕慢，

学识每一样嘢，

搞清楚每一样嘢，

唔好一样未学好就学另一样，

呢个系我作为一个老师最大嘅体悟。

我见过有太多着猴擒嘅学生啦。

而且只要你坚持得足够耐，

就算你语言天分再差，

你嘅语言水平都会有所进步。

我有一个五十几岁嘅美国学生，

佢嘅语言天份好一般，

但系佢坚持每个星期学中文，

到宜家为止，

佢已经学咗一年，

虽然佢进步得好慢，

但系佢确实进步紧，

而且慢慢睇得明简单嘅儿童故事。

对佢嚟讲，

学中文真系好难，

有好多唔识嘅字，

有好多唔明白嘅语法，

但系佢就系咁一直学，

冇放弃。

呢个世界冇容易学嘅嘢，

但系呢个世界都冇学唔识嘅嘢。

正所谓，

世上无难事，

只怕有心人。

阅读时光，看见生命中嘅光。