粤读时光 39 ：我和粤拼

粤读时光，看见生命中嘅光。

其实百分之九十九嘅广东人都唔识睇粤拼，

应该话系连粤语拼音呢个词都冇听过。

我系二十六岁先知道粤拼呢样野嘅。

二十六岁之前我根本就唔知道粤语拼音。

我识嘅人入面冇识粤拼嘅人，

除咗跟我学粤语嘅人。

粤拼真系一种好冷门嘅知识。

点解我会知道啲咁冷门嘅嘢？

完全系因为二十六岁嗰年我开始教外国人中文，

咁啱有一个外国人想学广东话，

我就开始教佢广东话。

啱啱开始嗰时，

我根本就唔识粤拼，

我都唔知应该点样将佢讲得唔啱嘅字写低俾佢，

我一开始系写汉字嘅，

跟住学生就问你识唔识粤拼啊？

佢系用英文我嘅，

我呆咗一下，

从来都冇听过呢样野，

跟住学生就将自己嘅粤拼笔记发俾我睇，

落课之后我自己上网查，

先至知道原来有粤语拼音呢样野。

我仲查到有汉字粤拼转换器呢样嘢，

开始嗰时因为我睇唔明粤拼，

所以就想依赖呢个转换器上课，

后来我发现转换器冇办法识别多音字，

而且如果我写错汉字，

呢个转换器系唔会帮我改嘅，

我自己又唔识睇，

就会教错学生。

后来冇办法，

我唯有自己学粤拼，

跟住再教学生。

呢个就系我同粤拼嘅开始。

一切都系因为我嘅学生话俾我听佢想我用粤拼写低发音。

广东人系唔系都分得清嗰六个声调啊？

我负责任咁同你讲，

除非佢学过，

唔系嘅话冇可能分得清。

因为呢个就系我嘅经历。

自从嗰个外国学生同我讲想我用粤拼教佢之后，

我就好俾心机咁研究粤拼。

我用咗差唔多一个月先学识咗粤拼，

当然我唔系每日24个钟都学啦。

我每日差唔多抽半个钟到一个钟嘅时间出嚟学。

一个月之后，

我就可以自己根据发音将粤拼写落嚟。

基本上都啱，

但系嗰时仲有错误。

我系点学嘅？

我同你一样都系上网揾教程，

唔同嘅系，

我冇揾到好似小草粤语咁详细嘅教程，

我揾到咗一个教粤拼嘅小视频，

视频差唔多10分钟。

短短10分钟要教完咁多个发音，

你可想而知老师教得几快。

视频入面老师将所有声调同发音认真咁读咗一次。

我反复睇咗几次，

都系发现自己分唔清嗰六个声调。

我一开始嗰时都觉得六个声调都好似。

虽然我系一个土生土长嘅广东人。

所以如果你觉得六个声调好难，

其实好正常，

连识讲广东话嘅人都好难分得清，

更何况系连讲都唔识讲嘅人喔。

我系点学声调嘅？

两个字解释完，

练习。

我本嚟就识讲广东话，

我只系分唔清边个音系边个音，

我当时上网揾到咗汉字同粤拼嘅转换工具，

我自己将一段话靠感觉将粤拼写落嚟，

跟住再用转换器将文字转成粤拼，

然后再检查，

睇下边个写得唔啱，

就自己研究点解唔啱。

开始嗰时，

我好多粤拼都唔识写，

但系我冇放弃，

每日坚持练习，

慢慢咁我就越写越好，

我坚持咗一个月之后，

我就差唔多可以将所有粤拼正确咁写落嚟啦。

我嗰日真系好开心。

其实学嘢真系唔容易，

但系如果你愿意付出努力，

愿意去研究，

其实系可以慢慢学识嘅。

当然如果你可以揾到好嘅学习资料，

会学得更加快。

如果揾唔到，

都冇问题，

重要嘅系研究、练习同坚持。

粤读时光，看见生命中嘅光。