广播专辑 弄堂茄山胡497 时髦个绒线衫

时髦个绒线衫
黄顺福


 天冷了，出门前从箱底翻出一件绒线衫套辣身浪。刚刚走出大楼，辣陌生头碰着外甥女个闺蜜，伊笑嘻嘻对我开玩笑讲：“哇塞，老先生，侬是越老越时髦了嘛！”


我听了木而觉仔（糊里糊涂），勿晓得穿一件衣龄廿多年个绒线衫啥地方时髦了。


 讲到搿件绒线衫，还是我爱人亲手编织嗰。想当年，伊搭我荡马路数电线木头个辰光，勿敢近身挽腰，勿敢头偎肩膀，勿敢让我勾手指，勿敢穿花里八拉个衣裳，碰着熟人就面孔红，神态举止讲勿出个妩媚。勿过，最吸引我嗰，还是伊结绒线个样子。兰花指勾起一根绒线，食指拇指弯弯捏针，针杆轻动，绒线就一圈圈套起来，辣我眼睛里就好像一幅名家笔下个仕女图。


 自从阿拉两家头开始交往，只要我到伊屋里去，大舅哥总要拉我茄山河。每当搿种辰光，伊就拿仔绒线坐辣边浪向，一歇歇到我身浪比比，看看宽窄长短合适口伐，一歇歇拉拉线，线团就辣我脚边滚来滚去，好像一只调皮个小宠物。


 大舅哥欢喜无理争三分，有辰光会激起我个好胜心，阿拉两个人就会争起来。伊就走过来，用绒线针勿痛勿痒戳我一记，讲：“讲白相嘛，争啥。”据说红袖添香是以前读书人追求个乐趣，葛末看伊结绒线就是我最欢喜个享受了。搿件绒线衫穿辣身浪向，暖到心里向。


 有趣个是，结婚辰光，伊个陪嫁品就包括大小粗细各勿相同个绒线针，足足有上百根，啥个竹针、棒针、钩针……交关我根本叫勿出名堂。新房里个布置也离勿开伊个编织品，大到窗帘、台布，小到杯垫、袜子，来祝贺个人侪看得啧啧称赞。


 前几天，有几个外甥囡个闺蜜忽然到阿拉屋里来，讲要向我爱人讨教结绒线个技巧。我猜想，或许伊拉也想用迭种方法拴牢自家个“青蛙王子”？搿真是“三十年河东，三十年河西”了。


 勿过，反过来想，现在个社会风气邪气包容开放，大家侪可以宽容个接纳勿一样个审美观念。为啥勿可以让过去个老时尚重新再时尚一遍，让我也搭一趟顺风车，摘脱老派男人个帽子，走进时髦个行列？