(表)今朝我来表演一段上海说唱,题目是:《我们见过面》。故事里有四个人物:一个是青年汽车司机,姓陈叫陈强。今年廿八岁,年纪轻,性子急,爱面子,开汽车有一个特点超!勿管侬啥个车子侪要超。脚踏车要超,三轮车要超,两用车要超,摩托车要超,平板车要超,卡车要超,客车要超,顶结棍格辰光火车也要超,人称超车大王!伊为啥要开得介快呢?因为伊完成生产任务以后,自己可以“活络活络”。比方讲,亲戚朋友有啥事体托伊,伊闲话勿多,回答两个字 “有数!”
第二个是陈强最近找到的对象,姓丁单名一个梅花个梅,叫丁梅。伊个名字与伊性格蛮相称,是个慢性子。乃么陈强是急性子,丁梅是慢性子,两个人一定有矛盾哕?勿!因为交朋友日脚还勿长,双方缺点尚未暴露,暂时呒没矛盾,将来总归有矛盾。
第三个是丁梅个娘,待人热情,性格直爽,其他侪好,就是有个缺点,欢喜占小便宜。
第四个是丁梅个爷,共产党员名字叫丁严。伊是长途汽车个驾驶员,为人忠厚、耿直,做事顶真、踏实,大公无私,一丝勿苟。老太婆欢喜占小便宜,老头子大公无私,两个人哪能会呒没矛盾呢?从结婚开始一直矛盾到现在,交朋友阶段还呒没算进去。还有一对矛盾,就是陈强与丁严师傅个矛盾,阿碰着过?呒没。哪能会有矛盾呢?听我唱下去就晓得了。
【节节高】丁梅娘本是浦东人,
老家南汇城厢镇。
最近乡下来封信,
要她回去办事情。
丁梅娘心里暗思忖,
来回车钱要两元零。
(咕白)要两元啦!
两元钱能派大用场,
猪肉称称二三斤,
大米买买靠十升,
开水好泡两百瓶。
以往我趟趟搭便车,
又省铜钿又称心。
搿趟仍旧老规矩,
自己出车钿勿是生意经。
(白)嗳!等一歇搭伲老头子商量商量,伲老头子是开长途汽车,专门跑南汇个。勿来三的,老头子脾气我晓得,商量勿通。伊开车开到现在,我一趟也勿曾揭着过便宜。有一次,我托伊带我到外地去一趟,勿但勿肯,还讲我是卡车个拖斗——老落后。对!我想起来了,伲女儿丁梅个对象也是开汽车的,让我托托看.。
(表)现在再讲陈强。听丁梅讲:伊个娘要搭自己车子去南汇,心里开心来,对象个娘,也就是未来个丈母娘,巴结也来勿及,所以今朝特别卖力。㑚看:一部二吨半个卡车,从车头到车尾,从车头车里,从车身到车底,从踏脚到玻璃,连得轮胎也揩得清清爽爽,勿沾一点点烂泥。伊身浪今朝也打扮得格外“道地”:头发新剃,梳得煞齐,一件雪雪白的衬衣,配件背心是蜡蜡黄的“开丝米”,穿一条笔笔挺的裤子是华达呢,着一件两用衫是藏青“哔叽”,脚浪一双袜子颜色鲜艳,乌黑澄亮的荷兰式皮鞋,的的刮刮是牛皮面子喜喜底。
今朝是三月初三,丁梅约好陈强,汽车上午八点钟开到自己家的弄堂口,只要“嘟嘟嘟”揿三声喇叭,丁梅娘听见声音就会跑出来。搿么陈强为啥勿到丁梅屋里去呢?因为刚刚轧朋友,丁梅怕隔壁邻居看见,小姑娘怕难为情。现在辰光七点半敲过,丁梅搭伊爷去上班了,丁梅娘早已做好一切准备,竖起耳朵在听,只要听见“嘟嘟嘟”喇叭一响,好马上动身“嘟嘟嘟——”哎!来哉!丁梅娘要紧关好门,拎仔两只包裹“蹬蹬蹬”跑到弄堂口一看:是一部清管站的垃圾车。丁梅娘心里想:哪能女儿对象开部垃圾车来接我?再一看,勿对!驾驶员年纪搭我差勿多——弄错了蹬蹬蹬”又跑回来。刚刚进门坐定“嘟嘟嘟”喇叭又响了,丁梅娘又连忙“蹬蹬蹬”跑到弄堂口一看:是隔壁五金厂一部电瓶车。再“蹬蹬蹬”回转来,刚跨进门“嘟嘟嘟——”啥又来啦?“蹬蹬蹬”再跑出去。迭趟速度稍微慢点哉,因为老太已经有点“吼”,奔到弄堂口一看:驾驶员是位女同志,又弄错哉!再“蹬蹬蹬”走回来。因为丁梅娘有过心脏病.,经过迭能“蹬蹬蹬”三个来回,已经心动过速吃勿消哉!“唉!”
(唱)倒霉倒霉真倒霉,
今朝搨便宜大吃亏。
断命汽车喇叭侪是“三声头”,
我冤枉路几趟跑来回。
气喘吁吁脚发软,
现在我心跳定有一百廿。
假如我迭能再跑几趟,
(咕白)个是用勿着送我到南汇,
马上送我进急诊间。
(表)丁梅娘刚刚凳子上坐下来,“嘟嘟嘟”啥又来啦!迭趟她“老鬼”了:“让我听听清爽。”所以坐辣凳子上,竖起耳朵在昕,人动也勿动。侬么动也勿动,迭趟真个是陈强来了。刚刚揿仔三声,看看弄堂里没有人跑出来,陈强是个急性子,连忙又揿三声:“嘟嘟嘟”。丁梅娘一听,勿对!讲好是三声头,现在是六声头,看上去勿是丁梅个对象,勿出去!陈强揿仔六声,看看还没有动静,索加“嘟嘟嘟嘟嘟嘟嘟”连牢仔揿,那勿像揿喇叭,赛过辣打电报。周围邻居听见汽车喇叭揿得介结棍,还当发生啥事体,所以男男女女、老老少少统统涌到弄堂口。陈强一看跑出来介许多人,也吃勿准阿里一位是丁梅个娘,呒没办法只好问一声。
(白)老妈妈,请问丁梅姆妈辣啥地方?
(白)噢!侬要寻丁梅个姆妈,侬是丁梅个啥人?
(白)我是……丁梅个……迭个……勿,我伲刚刚认得半个月……勿,人家介绍……勿,老伯伯,情侬勿要问好�,我伲是保密个!
(表)丁梅娘跑到弄堂口一看,苗头勿对,弄下去大家要chai 晓得了,要紧跑上去讲侬阿是叫陈强?我就是丁梅个姆妈
(白)噢!侬就是……姆妈!
(表)一声姆妈喊得大家哈哈大笑。丁梅娘乘上车子,陈强连忙发动汽车,开了就走!
(唱)车轮滚滚向前开,
陈强暗暗喜心怀。
我因公出车去周浦,
另有私事办一办。
辰光一定要巧安排,
千万不能误生产。
挤时间,抢速度,
送丁梅姆妈去南汇。
顺便我显显身手露一露。
(白)让丁梅姆妈看一看,我开车的技术阿来三。
(表)陈强车子越开越快,只见两旁边的树木“哗哗哗”一排排往后倒。坐辣旁边个丁梅娘吓煞哉,像迭种速度个汽车从未乘过,外加伊有心脏病。现在迭颗心,赛过滚烫个米烧粥,“突突突突突突”讲末又勿好讲,今朝第一次碰头,外加乘车子又勿出铜钿,所以只好两只手捏牢前面把手,眼睛闭紧,牙齿咬紧,那勿像坐汽车,赛过啦上刑罚。旁边陈强弄错了,还当丁梅娘乘车子蛮适意辣闭目养神,所以车子也越开越快。一般情况市区到南汇起码要一个半钟点,今朝到南汇只花了五十九分八秒六。陈强送脱丁梅娘,再去办公事,约好下半天四点钟来接丁梅娘回上海。现在已经四点十分,陈强车子刚刚到,一算辰光蛮紧张,为啥?因为车子浪迭批货物一定要在五点钟之前送到厂里,陈强心里蛮着急。丁梅娘一听辰光蛮紧张,心里更加紧张了,所以一上车就老规矩:两只手捏牢把手,眼睛闭牢,牙齿咬紧。心里想:横竖横侬开吧!陈强一看:啥?我汽车还没开,她已经适意啦?乃么蛮好,刚刚来的辰光五十九分八秒六,现在回去四十分钟解决问题!现在汽车开足马力,轮盘赛过我着地,“噌”五百公尺过去哉!一路浪看见前面有车必超,喇叭声“嘟嘟嘟”揿个勿停。车子开过周浦,一个转弯,突然看见前面有辆公共汽车,勿肯靠边让他。陈强心里“火”啊!乃么前面公共汽车为啥勿让呢??因为里档齐巧有部拖拉机辣开,要让也没有办法让。还未等公共汽车靠边,陈强喇叭一揿就强行超车,伸出骷髅头对公共汽车驾驶员骂仔一声:“憨大,㑚爷叔开车,依晓得�?”车子“嘶——”过去了。因为迭部汽车个方向盘在右边个,陈强一只手把方向盘,头伸在窗口外头“骂山门”,勿当心车身朝里一歪啪车头上一只反光镜敲脱,陈强头也勿回,车子仍旧飞速向前。旁边丁梅娘,吓得来已经闲话也讲勿出来哉!心里想:今朝总归凶多吉少,勿晓得阿回得转去?
再讲后面公共汽车个驾驶员,正巧是丁梅个爷,丁严师傅。看见超过去个卡车好像有啥末事碰下来,所以要紧下,拾起来一看是只反光镜,抬头看看前面卡车牌照号码08—13579,心里想:开车子哪能可以迭能横冲直撞?明朝一定要到伊单位去反映。还要骂我“憨大”,还想做我爷叔,我倒要看看,迭只爷叔面孔究竟是方个,还是圆个。丁严师傅下了班,拿情况向领导作了汇报,一路上回转来,刚刚走到弄堂口,突然一呆,为啥?只看见弄堂口停好一部二吨半个卡车,再一看牌照08—13579,“好极哉!原来要做我爷叔个驾驶员就在我一条弄堂里。”进门一看:只见自己老爱人,躺辣椅子上,面色苍白,长吁短叹,丁严师傅连忙问:
(白)老太婆,侬怎么啦?
(白)我……心脏病又发了。
(白)侬哪能又会发心脏病?
(白)我今朝到乡下去仔一趟,断命车子开得太快了,我吓出来的。(白)开得太快,你乘啥个车子?
(白)乘……我……乘……(旁白)要死哉,讲么勿好讲,白乘车子,老头子要请我吃排头的。
(表)丁严师傅一看老太婆迭副吞吞吐吐个样子,再一想弄堂口停的一部车子,心里已经全部明白。
(白)老太婆,你今朝到乡下去,一定是白乘车子,勿出车钱对�?
(白)咦!老头子,侬哪能会晓得?
(白)嘿嘿,我哪能会勿晓个?
(白)嘿嘿,我哪能会勿晓得,搭侬开车个是我爷叔。
(表)丁梅娘一听,勿对个,哪能弄出爷叔来呢?
(白)开车子个,是伲丁梅个对象!
(白)啊?你在讲啥?
(唱)闻听此言吃一惊,却
原来,女儿个对象是开车人。
方才伊横冲直撞开快车,
出了事故车不停。
超车撞脱反光镜,
还出口伤人“骂山门”。
他出车带人办私事,
损公利私做人情。
分明是违反交通规则蛮严重,
思想模糊浑顿顿。
教育青年走正道,
我共产党员有责任。
(表)丁梅娘一听心里全清爽,刚刚陈强骂的就是自己老头子。
(白)老太婆!丁梅个对象现在辣啥地方?我要寻伊!
(表)勿要寻哉,伊自己来哉。刚刚陈强一看丁梅娘心脏病发作,要紧去喊丁梅转来。现在两个人踏进门,女儿丁梅先开口:
(白) 爸爸,迭个就是陈强。
(白)嘿嘿,我们见过面了!
(表)丁梅一听,啥?伊拉老早认识个?
(白)爸爸,㑚哪能会认得个?
(白)哪能会认得?侬只要问伊好了,伊是我爷叔,侬就是憨大个女儿啦!将来啥人讨仔侬变憨大女婿哉!
(表)丁梅弄得丈二和尚摸勿着头脑。陈强一听,大吃一惊!
“啊!刚刚我超车辰光骂的就是丁梅的爸爸。”
(白)爸爸,迭个……伊个……迭个……我骂憨大……爷叔……阿爸个意思,就是依是爷叔,我是憨大啦!
(表)老丁师傅一听,也推板一眼笑出来。
(白)小陈呀,问题勿在于骂我一声憨大勿憨大,侬个做法脱侬个思想很勿对头啊!
(唱)驾驶员肩负着千斤重任,
手握紧方向盘立场坚定。
党教导为人民赤胆忠心,
喇叭响车轮滚路线看清。
四化建设要加紧,
增强节约牢记心。
假公济私真可耻,
忘私为公人人敬。
驾驶员要当好先行官,
多装快跑为人民。
侬怎能耗费汽油办私事,
利用公车开后门。
安全行车全不顾,
强行超车有危险性。
陈强啊!
侬要仔仔细细想一想,
这种做法该应勿该应?
(表)陈强听了丁严师傅一番话,顿时面红耳赤,旁边丁梅娘听听倒过意勿去
(白)老头子呀,迭桩事体是我托伊个,要批评就批评我,“哗啦、哗啦”,今朝陈强第一次上门,侬也稍微客气点。
(表)侬讲勿客气还好,一讲客气,老丁师傅更加勿客气。
(白)老太婆,我是要批评侬个,侬个为啥要搭陈强个车子?
(白)喏!因为陈强车子到周浦去,我顺便叫伊带到南汇。
(白)讲得轻松来,顺便带到南汇,侬晓得�?南汇要比周浦远几十公里,耗费汽油十几公升,侬要好好检讨,认识错误!
(白)认识错误?问题介严重?
(白)还勿严重?侬已经“犯法”哉!
(白)那好哉,搭搭便车也犯法,我乘乘火车要枪毙了?我犯啥法?
(白)侬侵占了国公共财物,侬明朝应该主动到陈强厂里去检讨,还要照价赔偿汽油费!
(表)丁梅娘一听,啥?还要赔钞票?“要赔几钿?”
(白)十几公升汽油,顶起码十几公升汽油,顶起码要赔七元钱。
(表)丁梅娘一听,“我搨便宜只揭两元,赔要赔七元,我要多损失五百瓶开水啦!阿好便宜点?”
(白)没有讨价还价个!
(表)陈强一听,丁严师傅真是铁面无私,抬头一看,墙浪挂着先进奖状,安全行车达六十万公里,的的刮刮是个老先进了今朝不但看到他先进事迹,更学习到的是先进思想,深有感触地讲:“丁师傅,我一定接受教训,改正错误,抓紧学习,提高觉悟。从今以后遵守制度,公事公办,决不含糊,努力工作,将功补过。”
老丁师傅一听,“小青年检讨起来倒蛮快个!”拿出一只反光镜交畀陈强。
(表)小陈同志,驾驶员个眼睛,勿仅要看清前方,还要通过反光镜看清后方。反光镜帮助我们驾驶员找出操作浪缺点,避免事故苗子啊!
(表)经过丁师傅多次帮助,陈强工作大有进步。㑚看伊:积极工作,钻研业务,一心为公,勿怕吃苦,堵塞漏洞,从勿马虎。大家要问伊与丁梅关系哪能?请㑚放心,看上去问题勿大。
(唱)党中央挥笔绘宏图,
神州处处擂战鼓,
九天揽月不畏难,
五洋捉鳖劲更粗。
实现四个现代化,
演出版本:
丁梅娘贪小便车坐,
陈强飞车为赶路,为赶路,
丁严师傅觉悟高,
严格教育不马虎,
齐心协力搞四化,
为灿烂的明天谱新歌。
静思_9e
黄老师唱功了不得,唱腔也功夫了不得,用的恰当